2 Chronicles 3

Kamba (Mbivilia) 1956

← Chapter 2 Jump to: Chapter 4 →

1Na ĩndĩ Solomoni ambĩlĩlya kwaka nyũmba ya Yeova Yelusaleme kĩĩmanĩ kya Molia, vala Yeova wamumĩlĩle Ndaviti ĩthe wake, ĩla waseũvĩsye vandũ vala vatw’ĩtwe nĩ Ndaviti kĩvũĩonĩ kya Olinani Mũyevusi.

2Na ambĩlĩlya kwaka mũthenya wa kelĩ wa mwei wa kelĩ, mwaka wa kana wa kũsumbĩka kwake.

3Na ĩndĩ ĩno nĩyo myambĩlĩlyo ĩla Solomoni wakwatisye kwondũ wa kwaka nyũmba ya Ngai. Ũasa ũitalwa mĩkono kwĩanana na kĩthimi kya mbee waĩ mĩkono mĩongo thanthatũ, na ũthanthau, mĩkono mĩongo ĩlĩ.

4Na valasya wa ĩ nyũmba, ũasa waw’o, kwĩanana na ũthanthau wa nyũmba, waĩ mĩkono mĩongo ĩlĩ, na ũtũlu mĩkono ĩana na mĩongo ĩlĩ; na oovw’ĩka nthĩnĩ thaavu mũtheu.

5Na nyũmba ĩla nene amĩseũvya nthĩnĩ na mbwaũ sya mĩtĩ ya mĩsonovali, ila wavw’ĩkie thaavu mũtheu, na aseũvĩĩsya ĩũlũ waw’o mĩtende na mĩnyololo.

6Na aanakavya nyũmba na tũvila twĩ thooa mũnene yĩthĩwe nzeo mũno: na thaavu ũsu waĩ thaavu wa Valivaimu.

7O na avw’ĩka nyũmba, na mĩamba, na myalyo, na mawako mayo, na mĩomo yayo, thaavu; na avanĩa akeluvi mawakonĩ.

8Na aakĩĩa nyũmba ĩla ntheu mbee: ũasa wayo, kwĩanana na ũthanthau wa nyũmba, waĩ mĩkono mĩongo ĩlĩ; na ũthanthau wayo mĩkono mĩongo ĩlĩ; na amĩvw’ĩka thaavu mũtheu, wa talendi maana thanthatũ.

9Na ũito wa mĩsumaa waĩ sekeli mĩongo ĩtano sya thaavu. Na avw’ĩka tũsũmba twa ĩũlũ thaavu.

10Na nthĩnĩ wa nyũmba ĩla ntheu mbee aseũvya mũvw’anano wa akeluvi elĩ; na mamavw’ĩka thaavu.

11Na ũasa wa nthwau sya akeluvĩ waĩ mĩkono mĩongo ĩlĩ: ũthwau wa mũkeluvi ũmwe waĩ mĩkono ĩtano, ũvikĩte wakonĩ wa nyũmba; na ũthwau ũla ũngĩ o ta ũu waĩ mĩkono ĩtano, ũvikĩte ũthwaunĩ wa mũkeluvĩ ũla ũngĩ.

12Na ũthwau wa mũkeluvi ũla ũngĩ waĩ mĩkono ĩtano, ũvikĩte wakonĩ wa nyũmba: na ũthwau ũla ũngĩ naw’o waĩ mĩkono ĩtano, ũkwatene na ũthwau wa mũkeluvi ũla ũngĩ.

13Nthwau sya akeluvi asu kũtambũũka kwasyo kwaĩ mĩkono mĩongo ĩlĩ: na maũngeme na maũũ, na mothyũ moo meelekele ĩ nyũmba.

14Na aseũvya tũtũ wa ndii sya vuluu, na ila itilyĩ ta ndune, na ĩla ndune mũno, na katane nzeo, na atumĩĩa ngelekan’yo ya akeluvi ĩũlũ waw’o.

15Na ĩngĩ aseũvya ituĩ ilĩ ngalĩ ya mbee ya nyũmba ila ũtũlu wasyo waĩ mĩkono mĩongo ĩtatũ na ĩtano, na ngovia ĩla yaĩ ĩũlũ wa kĩla kĩmwe yaĩ mĩkono ĩtano.

16Na aseũvya mĩnyololo nthĩnĩ wa vandũ va Ngai va ũneenea, na amĩkĩa mĩthyanĩ ya ituĩ; na aseũvya makũngũmanga ĩana, na amakolany’a mĩnyololonĩ.

17Na aũngamya ituĩ ngalĩ ya mbee ya ĩkalũ, kĩmwe ngalĩ ya kw’oko kwa aũme, na kĩla kĩngĩ ngalĩ ya kw’oko kwa aka; na akĩta kĩla kĩ ngalĩ ya kw’oko kwa aũme syĩtwa yakyo Yakini, na syĩtwa ya kĩla kya ngalĩ ya kw’oko kwa aka akĩta Mboasi.

← Chapter 2 Jump to: Chapter 4 →