2 Chronicles 35

Kamba (Mbivilia) 1956

← Chapter 34 Jump to: Chapter 36 →

1Na Yosia alilikana vasaka kwondũ wa Yeova ku Yelusaleme: na mooaa vasaka mũthenya wa ĩkũmi na ĩna wa mwei wa mbee.

2Na aia athembi mawĩanĩ moo, na amekĩa vinya ngoonĩ ũthũkũminĩ wa nyũmba ya Yeova.

3Na amea Alivai ala mamanyĩasya Isilaeli onthe, ala maĩ atheu kwa Yeova, Likyai ĩsandũkũ ĩtheu nyũmbanĩ ĩla Solomoni mwana wa Ndaviti mũsumbĩ wa Isilaeli wakie; yĩtikethĩwa ĩngĩ mũio ituonĩ syenyu. Yu thũkũmai Yeova Ngai wenyu, na andũ make Isilaeli;

4na ĩyũmban’yei kwĩanana na nyũmba sya aaĩthe menyu kũatĩanĩa na nguthu syenyu, kwĩanana na ũndũ kwaandĩkiwe nĩ Ndaviti mũsumbĩ wa Isilaeli, na kwĩanana na ũndũ kwaandĩkiwe nĩ Solomoni mwana wake.

5Na ũngamai vala vandũ vatheu kwĩanana na nguthu sya nyũmba sya aaĩthe sya ana‐a‐ĩthe menyu ana ma ala andũ, na nĩkwĩthĩwe kwondũ wa kĩla ũmwe kĩlungu kya nyũmba ya aaĩthe ma Alivai.

6Na ũaai vasaka, na mũkĩĩvathan’ya mwĩthĩwe atheu, na kũseũvya kwondũ wa ana‐a‐ĩthe menyu, mwĩke kwĩanana na ndeto ya Yeova, na kanyw’a wa Mose.

7Na Yosia anenga ana ma andũ onthe ala maĩ vo, kuma ndĩthyanĩ, tũtena twa malondu na twa mbũi, tw’onthe twĩthĩwe nthembo sya vasaka, ũtalo watw’o waĩ ngili mĩongo ĩtatũ, na tũsalũ twa mũew’a ngili itatũ: isu syaĩ sya syĩndũ sya mũsumbĩ.

8Na anene make me mbee ũsumbĩnĩ nĩmanenganie kwondũ wa andũ, na athembi, na Alivai, sya nthembo ya kumya na ngoo ya kwenda. Ilikia na Nzekalia na Yeiieli, anene ma nyũmba ya Ngai, manenga athembi kwondũ wa nthembo sya vasaka kuma ndĩthyanĩ sya mbũi na malondu ngili ilĩ na maana thanthatũ, na ng’ombe maana atatũ.

9O na Konania, na Semaia, na Nethaneli, ana‐a‐ĩthe make, na Asavia na Yeieli na Yosavati, anene ma Alivai, mamanenga Alivai kwondũ wa nthembo sya vasaka kuma ndĩthyanĩ sya mbũi na malondu ngili itano, na ng’ombe maana atano.

10Ũu mĩw’o ũthũkũmi waseũvĩtw’e, na athembi maũngama vandũ voo, na Alivai kwĩanana na nguthu syoo, kwĩanana na mwĩao wa mũsumbĩ.

11Na mooaa vasaka, na athembi maminzangĩsya nthakame ila moosie mokonĩ moo, na Alivai maithĩnza.

12Na maveta nthembo sya kũvĩvw’a, nĩ kana maithembe kwĩanana na nguthu sya nyũmba sya aaĩthe sya ana ma ala andũ, mamũthembee Yeova, o tondũ kũandĩkĩtwe ĩvukunĩ ya Mose. Na now’o meekie na ng’ombe.

13Na mavĩvya vasaka na mwaki kwĩanana na ũtw’ĩo: na nthembo ila ntheu maua na mbisũ, na iteve, na tũteve, na maikua na mĩtũkĩ mamatwaĩa ana onthe ma ala andũ.

14Na ĩtina maseũvya kwondũ woo ene, na kwondũ wa athembi, nĩkwĩthĩwa athembi, ana ma Aluni, makwete wĩa wa kũthemba nthembo sya kũvĩvw’a na mathunya kũvika kwatuka: kwondũ wa ũu Alivai maseũvya kwondũ woo ene o na kwondũ wa athembi, ana ma Aluni.

15Na aini, ana ma Asavu, maĩ vandũ voo, kwĩanana na mwĩao wa Ndaviti, na Asavu, na Emani, na Yetuthuni mwoni wa kwa mũsumbĩ; na asũvĩi ma mĩomonĩ maĩ kĩla mbingĩlonĩ: matyaĩ vata kũtia ũthũkũmi woo; nũndũ ana‐a‐ĩthe moo Alivai nĩmamaseũvĩsye.

16Na ĩndĩ ũthũkũmi w’onthe wa Yeova waseũvw’a mũthenya ũsu, wa kũlilikana vasaka, na kũthemba nthembo sya kũvĩvw’a kĩthembeonĩ kya Yeova, kwĩanana na mwĩao wa mũsumbĩ Yosia.

17Na ana ma Isilaeli ala maĩ vo malilikana vasaka ĩvinda yĩu, na mboka ya kĩmũtũ kĩte ĩlawa mĩthenya mũonza.

18Na kũtyaĩ vasaka waalilikanwa nthĩnĩ wa Isilaeli ĩtina wa mĩthenya ya mwathani Samueli ta ũsu; o na kũtyaĩ mũsumbĩ o na ũmwe wa Isilaeli ũla walilikanile vasaka ta ũsu Yosia walilikanile, vamwe na athembĩ, na Alivai, na Yuta na Isilaeli onthe ala maĩ vo, na ala matwĩe Yelusaleme.

19Vasaka ũsu walilikanilwe mwaka wa ĩkũmi na nyanya wa kũsumbĩka kwa Yosia.

20Ĩtina wa ũu w’onthe, yĩla Yosia waĩ anaseũvya ĩkalũ, Neko mũsumbĩ wa Misili ambata okite na Kalikemisi vakuvĩ na Euvalati: na Yosia aumaala okite nake.

21Ĩndĩ atũma atũmwa vala ũĩ, makamũkũlye, Nĩ ũndũ mwaũ naku, we mũsumbĩ wa Yuta? Ndyũkĩte nũkite naku mũnthĩ ũũ, ĩndĩ nĩ kana nũkite na nyũmba ĩla nĩ na kaũ nayo; na Ngai nũmbĩaĩĩte nĩkalaate: eka kũsiĩĩa Ngai, ũla wĩ vamwe nakwa, ndakakwanange.

22Ĩndĩ Yosia ndaaĩtĩkĩla kũthyũũa ũthyũ wake amũeke, ĩndĩ eeyũlan’ya nĩ kana okite nake, na ndaaĩthukĩĩsya ndeto sya Neko ila syaumĩte kanyw’anĩ wa Ngai, na ooka akwatĩsye kaũ mwandanĩ wa Mekito.

23Na andũ ma mata mamwĩkya mũsumbĩ Yosia mĩsyĩ; na mũsumbĩ amea athũkũmi make, Mbumyai vaa, nũndũ nĩnũkitĩtwe mũno.

24Kwondũ wa ũu athũkũmi make mamumya ĩkasyanĩ ya kaũ, na mamwĩkĩa ĩkasyanĩ ya kelĩ yĩla waĩ nayo, na mamũtwaa Yelusaleme; na akw’a, na athikwa ngunganĩ sya aaĩthe make vala vathikawa akw’ũ. Na Yuta na Yelusaleme onthe mamũmetea Yosia.

25Na Yelemia amũmetea Yosia: na aini onthe aũme na aka nĩmaneenaa ũndũ wa Yosia iĩonĩ syoo kũvika ũmũnthĩ; na maitw’ĩĩa ũtw’ĩo nthĩnĩ wa Isilaeli: na, sisya, niandĩkĩtwe iĩonĩ.

26Na ĩndĩ meko ala angĩ ma Yosia, na maũndũ make maseo, kwĩanana na ũndũ ũandĩkĩtwe mĩaonĩ ya Yeova,

27na meko make, ma mbee na ma mũminũkĩlyo, sisya, nĩmaandĩkĩtwe ĩvukunĩ ya asumbĩ ma Isilaeli na Yuta.

← Chapter 34 Jump to: Chapter 36 →