2 Chronicles 24

Kamba (Mbivilia) 1956

← Chapter 23 Jump to: Chapter 25 →

1Yoasi aĩ wa myaka mũonza yĩla wambĩlĩlye kũsumbĩka; na asumbĩka myaka mĩongo ĩna Yelusaleme: na syĩtwa ya inyia wake eetawa Nzivia, wa ku Mbeeli‐sieva.

2Na Yoasi eekaa ũla Yeova wonaa wĩ ũseo mĩthenya yonthe ya mũthembi Yeoiata.

3Na Yeoiata amũtwaĩa aka elĩ; na asyaa ana na eĩtu.

4Na kweethĩwa ĩtina wa ũu, Yoasi enda kũtũngĩĩa nyũmba ya Yeova.

5Na oomban’ya athembi na Alivai, na amea, Endai ndũanĩ sya Yuta, na ũmban’yai kuma kwa Isilaeli onthe mbesa sya kũtũngĩĩa nyũmba ya Ngai wenyu mwaka na mwaka; na sisyai kana mũkalaate ũndũ ũũ. Ĩndĩ Alivai matyaaũkalaata.

6Na mũsumbĩ amwĩta mũnene Yeoiata, na amũkũlya, Nũndũ wa kĩ ũtaamaandũa Alivai maete kuma Yuta na Yelusaleme koti watwiwe nĩ Mose mũthũkũmi wa Yeova, na ũmbano wa Isilaeli, kwondũ wa ĩeema ya ũkũsĩ?

7Nũndũ ana ma Athalia, mũndũ mũka ũsu mũthũku, nĩmaomboangĩte nyũmba ya Ngai; o na syĩndũ syonthe syavathĩtwe syĩthĩwe ntheu sya nyũmba ya Yeova manenga Mbaalimu.

8Na ĩndĩ mũsumbĩ eeaa, na maseũvya ĩsandũkũ na mayia nza mbingĩlonĩ ya nyũmba ya Yeova.

9Na matavan’ya Yuta na Yelũsaleme kw’onthe, maete kwondũ wa Yeova koti ũla Mose mũthũkũmi wa Ngai wamatw’ĩĩe Isilaeli ku weũnĩ.

10Na anene onthe me mbee ũsumbĩnĩ na andũ onthe matana, na maete, na meekĩa ĩsandũkũnĩ, mũvaka mamina.

11Na kweethĩwa atĩĩ, ĩvinda yĩla ĩsandũkũ yaetiwe kwa anene ma kwa mũsumbĩ na kw’oko kwa Alivai, na yĩla moonie kana kwaĩ mbesa nyingĩ, mũandĩki wa mũsumbĩ na mũnene wa kwa mũthembi mũnene mooka na maumya mbesa ĩsandũkũnĩ vyũ, na mayosa, na mayĩtũnga vandũ vayo. Ũu nĩw’o meekaa mũthenya na mũthenya, na moomban’ya mbesa mbingĩ mũno.

12Na mũsumbĩ na Yeoiata maĩva ala matethasya wĩa wa ũthũkũmi wa nyũmba ya Yeova: na maandĩka aki ma mavia na aseũvya ma mbwaũ matũngĩĩe nyũmba ya Yeova, o na ala matuaa iaa na ũthuku sya kũtũngĩĩa nyũmba ya Yeova.

13Na ĩndĩ athũkũmi matethya wĩa, na ũ wĩa wa kũtũngĩĩa waendeea na mbee wĩ mokonĩ moo, na maũngamya nyũmba ya Ngai kwĩanana na kĩthimo kyayo, na mamĩkĩa vinya.

14Na yĩla maminie, maetee mũsumbĩ na Yeoiata mbesa ila syatialile, na maseũvya mĩio ya nyumba ya Yeova nasyo, o mĩĩo ya kũthũkũma nayo na kũthemba, na syĩko, na mĩio ya thaavu na vetha. Na mathembaa nthembo sya kũvĩvw’a nyũmbanĩ ya Yeova mavinda onthe mĩthenya yonthe ya Yeoiata.

15Ĩndĩ Yeoiata atumĩa na aĩ wa matukũ maingĩ na akw’a; aĩ wa myaka ĩana na mĩongo ĩtatũ yĩla wakwie.

16Na mamũthika ndũanĩ ya Ndaviti katĩ wa asumbĩ, nĩkwĩthĩwa nĩwamekie Isilaeli nesa, o na kwa Ngai na nyũmba yake.

17Na ĩtina wa kĩkw’ũ kya Yeoiata anene me mbee ũsumbĩnĩ ma Yuta mooka, na mamwĩkunamĩsya mũsumbĩ vyũ. Na ĩndĩ mũsumbĩ amethukĩĩsya.

18Na matia nyũmba ya Yeova, Ngai wa aaĩthe moo, na mathũkũma Aselimu na mĩvw’anano: na ũthilĩku wamokĩa Yuta na Yelusaleme ũndũ wa kũvĩtan’ya kwoo.

19Ĩndĩ atũma athani kwoo, mamaete ĩngĩ kwa Yeova; na mamakũsĩĩa; ĩndĩ matyaaĩtĩkĩla kwĩthukĩĩsya.

20Na Veva wa Ngai ooka ĩũlũ wa Nzekalia mwana wa mũthembi Yeoiata: na aũngama vu ĩũlangũ wa andũ, na amea, Ũũ nĩw’o Ngai ũnũkwasya, Nĩkĩ mũũvĩtya mĩao ya Yeova, ũndũ mũtatonya kũathimĩka? Nĩkwĩthĩwa nĩmũtiĩte Yeova, nake nũmũtiĩte.

21Na mamũsamĩa, na mamũkimangĩa na mavia vu nza ya nyũmba ya Yeova nũndũ wa mwĩao wa mũsumbĩ.

22Ũu nĩw’o mũsumbĩ Yoasi waekie kũlilikana ũseo ũla Yeoiata ĩthe wake wamwĩkie, ĩndĩ ooaa mwana wake. Na yĩla wakusaa, asya, Yeova nasisye ũndũ ũũ, na kũandũa.

23Na kweethĩwa mũminũkĩlyo wa mwaka, ĩta sya Asilia syooka syũkite nake: na syooka ku Yuta na Yelusaleme, na syaananga anene onthe me mbee ũsumbĩnĩ ma andũ katĩ wa andũ, na syamũtwaĩa mũsumbĩ wa Ndamasiku mũtavo w’onthe ũla syoosie kwoo.

24Nũndũ ita sya Asilia syookie na nguthu nini ya andũ; na Yeova anengane nguthu nene mũno kw’okonĩ kwasyo, nĩkwĩthĩwa nĩmamũtiĩte Yeova, Ngai wa aaĩthe moo. Ũu nĩw’o syamũsilĩle Yoasi.

25Na yila mamũtiie (nũndũ mamũtiie e mũwau mũno), athũkũmi make mwene mamũsamĩa kwondũ wa nthakame ya ana ma mũthembi Yeoiata, na mamũaĩa ũkomonĩ wake, na akw’a; na mamũthika ndũanĩ ya Ndaviti, ĩndĩ matyaamũthika ngunganĩ vala vathikawa asumbĩ.

26Na aa nĩo ala mamũsamĩe: Nzavati mwana wa mũndũ mũka Simeathi Mũamimoni, na Yeosavatu mwana wa mũndũ mũka Similithi Mũmoavi.

27Na ĩndĩ ũvoo wa ana make, na ũnene wa mĩio ĩla yailĩĩlwe ĩũlũ wake, na kũtũngĩĩa nyũmba ya Ngai, sisya, nĩmaandĩkĩtwe maandĩkonĩ ma ĩvuku ya asumbĩ. Na Amasia mwana wake asumbĩka vandũ vake.

← Chapter 23 Jump to: Chapter 25 →