2 Chronicles 32

Kamba (Mbivilia) 1956

← Chapter 31 Jump to: Chapter 33 →

1Ĩtina wa maũndũ asu, na kĩthito kyu, Senakelivu mũsumbĩ wa Asuli ooka, na alika ku Yuta, na amba maeema ataũĩĩe ndũa mbiie, na asũanĩa kwikĩlya vinya syĩthĩwe syake.

2Na yĩla Esekia wonie kana Senakelivu nĩ mũku, na kana nũsũanĩĩte kũkita na Yelusaleme,

3asũanĩa na anene make me mbee ũsumbĩnĩ na ngũmbaũ syake malindĩle manzĩ ma nthongo ila syaĩ ũtee wa ndũa; namo mamũtetheesya.

4Kwondũ wa ũu andũ aingĩ moombana, na malindĩla nthongo syonthe, na kalũsĩ kala kaendele katĩ wa ĩ nthĩ, makyasya, Twĩekea kĩ asumbĩ ma Asuli moke methĩe manzĩ maingĩ?

5Na eeyĩkĩa ũkũmbaũ, na atũngĩĩa ũvai w’onthe ũla waombokete, na awĩanan’ya ũtũlu waw’o na myako mĩtũlu ya mĩnyoolo, na ũvai ũla ũngĩ ũtee, na eekĩa Milo ndũanĩ ya Ndaviti vinya, na aseũvya mĩio ya kaũ na ngao mbingĩ mũno.

6Na aia makavuteni ma kaũ ĩũlũ wa andũ, na amombanĩsya vala ũĩ vala vandũ vathanthau mbingĩlonĩ ya ndũa, na aneena nao aimakiakisya, akĩmea,

7Ĩthĩwai na vinya na ũkũmbaũ mũnene, mũtikakĩe kana kũteva ũndũ wa mũsumbĩ wa Asuli, kana ũndũ wa ĩkomano yonthe yĩla yĩ nake; nũndũ kwitũ ve mũnene kũvĩta ũla wĩ nake:

8kwake ve kw’oko kwa mwĩĩ; ĩndĩ kwĩtũ ve Yeova Ngai waitũ wa ũtũtethya, na kũtũkitĩthasya makaũ. Na andũ nĩmeethũmũisye ndetonĩ sya Esekia mũsumbĩ wa Yuta.

9Ĩtina wa ũu Senakelivu mũsumbĩ wa Asuli atũma athũkũmi make Yelusaleme (nake aĩ vu mbee wa Lakisi, e na ũtonyi wake w’onthe), kwa Esekia mũsumbĩ wa Yuta, na kwa Yuta onthe ala maĩ Yelusaleme, akĩmea,

10Ũũ nĩw’o Senakelivu mũsumbĩ wa Asuli ũnũkwasya, Mwĩkwatĩtye kyaũ, ũndũ mũmĩĩsye kũtw’ĩkanĩw’a ku Yelusaleme?

11Esekia ndeũmũkikya, amũnengane mũkw’e nĩ yũa na waũni, akĩmwĩa, Yeova Ngai waitũ akatũvonokya kuma kw’okonĩ kwa mũsumbĩ wa Asuli?

12Esekia o ũsu ndavetete kũla kũndũ kũtũlu kwake na ithembeo syake, na eaĩĩte Yuta na Yelusaleme, akĩmea, Thaithĩaai mbee wa kĩthembeo kĩmwe, na toeeasyai ũvani ĩũlũ wakyo?

13Mũtyĩsĩ ũndũ nyie na aaĩthe makwa twĩkĩte andũ onthe ma ĩ nthĩ? Ngai sya mbaĩ sya i nthĩ syaĩ itonya nongi kũvonokya nthĩ yoo kuma kw’okonĩ kwakwa?

14Katĩ wa ngai syonthe sya mbaĩ ĩsu ila aaĩthe makwa maanangie vyũ, nĩ yĩva ĩla yaĩ ĩtonya kumya andũ mayo kw’okonĩ kwakwa, nĩ kana Ngai wenyu atonye kũmumya kw’okonĩ kwakwa?

15Kwondũ wa ũu ĩndĩ Esekia ndakamũkenge, kana kũmũkikya ta ũu, o na mũtikamũĩkĩĩe; nũndũ vatyaĩ ngai ya mbaĩ o na yĩva kana ya ũsumbĩ yaĩ ĩtonya kumya andũ mayo kw’okonĩ kwakwa, na kw’okonĩ kwa aaĩthe makwa: Ngai wenyu akatonya ata kũmumya kw’okonĩ kwakwa?

16Na athũkũmi make maendeea na kũmũneenea Yeova Ngai naĩ, o na mũthũkũmi wake Esekia.

17O na aandĩka mavalũa, amũume Yeova, Ngai wa Isilaeli, na kũmũneenea naĩ, akyasya, O tondũ ngai sya mbaĩ sya i nthĩ, ila itaamavonokya andũ masyo kw’okonĩ kwakwa, now’o Ngai wa Esekia ũtakamaumya andũ make kw’okonĩ kwakwa.

18Na manĩĩsya andũ ma Yelusaleme ala maĩ ũvainĩ na wasya mũnene na kĩthyomo kya Ayuti, mamatelemye, na kũmathĩn’ya; nĩ kana makwate ndũa.

19Na maneenea Ngai wa Yelusaleme, o tondũ maneenee ngai sya ngo sya andũ ma nthĩ, ila nasyo nĩ wĩa wa moko ma andũ.

20Na mũsumbĩ Esekia, na mwathani Isaia mwana wa Amosu, mavoya nũndũ wa ũu, na meekaĩlana ĩtunĩ.

21Na Yeova atũma mũlaĩka, ũla wavetie ngũmbaũ nene syonthe, na atongoi na makavuteni, mwakonĩ wa maeema wa mũsumbĩ wa Asuli. Kwondũ wa ũu asyoka nthĩ yake mwene asoomanĩte. Na yĩla walikile nyũmba ya ngai yake, ala maumie kĩnyunyunĩ kyake mwene mamũaĩa vo na ũvyũ.

22Ũu nĩw’o Yeova watangĩĩe Esekia na ala matwĩe Yelusaleme kuma kw’okonĩ kwa Senakelivu mũsumbĩ wa Asuli, na kuma kw’okonĩ kwa ala angĩ onthe, na kũmatongoesya kĩla ngalĩko.

23Na aingĩ mamũetee Yeova mĩthĩnzĩo ku Yelusaleme, na syĩndũ syĩ vata kwa Esekia mũsumbĩ wa Yuta; kwondũ wa ũu kuma ĩvinda yĩu anenevw’a methonĩ ma mbaĩ syonthe.

24Mĩthenya ĩsu Esekia awaa kũthengeea kũkw’a: na amũvoya Yeova; nake aneena nake, na amũnenga wonan’yo.

25Ĩndĩ Esekia ndaaĩka ĩngĩ kwĩanana na ũseo ũla wekiwe; nũndũ ngoo yake nĩyeetũlilye: kwondũ wa ũu nĩwathilĩkĩlwe, o na Yuta na Yelusaleme.

26Ĩndĩ Esekia eenyivya nũndũ ngoo yake ĩnaĩ ĩneenenevya, we o na ala matwĩe Yelusaleme, kwondũ wa ũu ũthilĩku wa Yeova ndwaamokĩa mĩthenya ya Esekia.

27Na Esekia aĩ na ũthwii na ndaĩa mbingĩ mũno: na eeseũvĩsya kũndũ kũla kwiawa vetha, na thaavu, na tũvila twĩ thooa mũnene, na mĩtĩ ĩla ĩnyungaa nesa, na matumo, na mĩio mĩseo ya mĩthemba yonthe;

28o na nyũmba sya kwia wingĩvo wa nganũ na mbinyu mbĩthĩ na mauta; na itũũ sya mĩthemba yonthe ya nyamũ, na ndĩthya sya mbũi na malondu syengonĩ.

29O na ĩngĩ eemanthĩa ndũa, na ndĩthya sya mbũi na malondu na sya ng’ombe mbingĩ mũno; nũndũ Ngai nĩwamũnengete isamũ nyingĩ mũno.

30O na Esekia ũsu avingĩa mbuluti ya ĩũlũ ya manzĩ ma Ngioni, na amatheesya malũngalĩte ngalĩ ya ũthũĩlonĩ wa syũa ya ndũa ya Ndaviti. Na Esekia aathimĩka mawĩanĩ make onthe.

31Ĩndĩ ũndũnĩ wa ala atũmwa ma anene me mbee ũsumbĩnĩ ma Mbaviloni, ala matũmanie kwake makũlye ũndũ wa ũseng’yo ũla weekiwe ĩ nthĩ, Ngai amũeka amũtate, amanye w’onthe ũla wĩ ngoonĩ yake.

32Na ĩndĩ meko ala angĩ ma Esekia na maũndũ make maseo, sisya, nĩmaandĩkĩtwe woninĩ wa mwathani Isaia mwana wa Amosu, ĩvukunĩ ya asumbĩ ma Yuta na Isilaeli.

33Na Esekia akoma na aaĩthe make, na mamũthika kyambatonĩ vala ve ngunga vala vathikawa akw’ũ sya ana ma Ndaviti: na Yuta onthe na ala matwĩe Yelusaleme mamũtaĩa ĩvinda ya kĩkw’ũ kyake. Na Manase mwana wake asumbĩka vandũ vake.

← Chapter 31 Jump to: Chapter 33 →