2 Chronicles 2

Kamba (Mbivilia) 1956

← Chapter 1 Jump to: Chapter 3 →

1Na ĩndĩ Solomoni asũanĩa kwaka nyũmba kwondũ wa syĩtwa ya Yeova, na nyũmba kwondũ wa ũsumbĩ wake.

2Na Solomoni atala andũ ngili mĩongo mũonza ma ũkua mĩio, na andũ ngili mĩongo nyanya ala masũvĩasya iĩmanĩ, na andũ ngili itatũ na maana thanthatũ ma kũmaũngamĩaa.

3Na Solomoni atũmana kwa Ulamu mũsumbĩ wa Tile, akĩmwĩa, O tondũ wamwĩkie Ndaviti ĩthe wakwa, na wamũetee mĩkũũ ya kũmwakĩa nyũmba ya kwĩkala, mbĩka ũu o nakwa.

4Sisya, nĩkilĩlye kwaka nyũmba kwondũ wa syĩtwa ya Yeova Ngai wakwa, nĩmĩvathe yĩthĩwe ntheu kwondũ wake, na ya kũmũtoeeasya ũvani wa mĩtĩ ĩla ĩnyungaa nesa, na kwondũ wa imũtũ ila siĩawa Yeova itatw’ĩkanaa, na kwondũ wa nthembo sya kũvĩvw’a kĩoko na wĩoo, masavatonĩ, na mĩtisonĩ ya myei, na mbokanĩ itw’ĩtwe sya Yeova Ngai waitũ. Ũsũ nĩ ũtw’ĩo wa tene na tene kwa Isilaeli.

5Na nyũmba ĩla ngwaka nĩ nene; nũndũ Ngai waitũ nĩ mũnene kwĩ ngai syonthe.

6Ĩndĩ nũũ ũtonya kũmwakĩa nyũmba, nũndũ ĩtu, na ĩtu yĩla yĩ ĩũlũ wa matu yĩtitonya kũmwĩanĩa? Nyie nĩ ũũ ĩndĩ, aĩ nĩmwakĩe nyũmba, ate o kũmũtoeeasya ũvani?

7Kwondũ wa ũu yu ndetee mũndũ ndũĩka wa kũtethya wĩa na thaavu, na vetha, na ũthuku, na kĩaa, na langi ũilyĩ ta mũtune, na ũla mũtune mũno, na vuluu, na ũla wĩsĩ kũvana mĩthemba yonthe ya movano, methĩwe vamwe na andũ ndũĩka ala me nakwa kũũ Yuta na Yelusaleme, ala ĩthe wakwa Ndaviti waiie.

8O na ndetee mĩtĩ ya mĩkũũ, na ya mĩsonovali, na ya mĩsandali, kuma Levanoni; nũndũ nĩnĩsĩ athũkũmi maku nĩmesĩ kũtema mĩtĩ Levanoni. Na, sisya, athũkũmi makwa makeethĩwa na athũkũmi maku,

9nĩ kana manzeũvĩsye mĩtĩ mingĩ mũno; nũndũ nyũmba ĩla nĩkilĩlye kwaka ĩkeethĩwa nene na ya ũseng’ya.

10Na, sisya, nganenga athũkũmi maku, atemi ma mĩtĩ, ithimi ngili mĩongo ĩlĩ sya nganũ mbũe, na ithimi ngili mĩongo ĩlĩ sya mbaale, na vathi ngili mĩongo ĩlĩ sya mbinyu, na vathi ngili mĩongo ĩlĩ sya mauta.

11Nĩvo ĩndĩ Ulamu mũsumbĩ wa Tile wamũsũngĩie na valũa, ũla wamũtwaĩe Solomoni, Nĩkwĩthĩwa Yeova nũmendete andũ make, nũkũtw’ĩte mũsumbĩ woo.

12Na ĩngĩ Ulamu asya, Nataĩwe Yeova, Ngai wa Isilaeli, ũla wombie ĩtu na nthĩ, ũla ũmũnengete mũsumbĩ Ndaviti mwana mũĩ, wĩ na kĩlĩko na ũmanyi, amwakĩe Yeova nyũmba, na nyũmba ya ũsumbĩ wake.

13Na yu nĩnatũma mũndũ ndũĩka, wĩ na ũmanyi, wa ĩthe wakwa Ulamu,

14mwana wa mũndũ mũka wa eĩtu ma Ndani; na ĩthe wake aĩ mũndũ wa Tile, ndũĩka ya kũtethya wĩa na thaavu, na vetha, na ũthuku, na kĩaa, na mavia, na mĩtĩ, na langi ũilyĩ ta mũtune, na vuluu, na katane nzeo, na ũla mũtune mũno, o na wa kũvana mũthemba o na wĩva wa ũvano, na wa kũseũvya kĩndũ kĩtaaoneka; nĩ kana aiwe vamwe na andũ maku ndũĩka, na vamwe na andũ ndũĩka ma mwĩaĩi wakwa Ndaviti ĩthe waku.

15Yu ĩndĩ nganũ na mbaale, mauta na mbinyu, ila mwĩaĩi wakwa ũwetete, natwaĩe athũkũmi make:

16na tũkatema mĩtĩ Levanoni, kwĩanana na vata waku; na tũkakũetee ĩthambĩĩle ũkanganĩ ĩvike Yova; naku ũimyambatya Yelusaleme.

17Na Solomoni atala onthe ala mookie kwĩkala ũeni nthĩ ya Isilaeli, kũatĩĩa ũtalo ũla ĩthe wake Ndaviti wamatalĩte; na mooneka ngili ĩana na mĩongo ĩtano na itatũ na maana thanthatũ.

18Na atila mamo ngili mĩongo mũonza ma ũkua mĩio, na ngili mĩongo nyanya ma kwasũvĩsya iĩmanĩ, na aũngamĩi ngili itatũ na maana thanthatũ ma kũmanengae andũ wĩa.

← Chapter 1 Jump to: Chapter 3 →