2 Chronicles 31

Kamba (Mbivilia) 1956

← Chapter 30 Jump to: Chapter 32 →

1Na ĩndĩ yĩla ũu w’onthe wathelile, Isilaeli onthe ala maĩ vo mauma mathi ndũanĩ sya Yuta, na matũlanga ituĩ, na matema Aselimu yavalũka, na maananga kũla kũndũ kũtũlu na ithembeo nthĩ yonthe ya Yuta na Mbenyamini, o na nthĩ ya Evalaimu na Manase, kũvika maananga syonthe. Na ĩndĩ ana onthe ma Isilaeli masyoka, kĩla mũndũ ng’ũndũnĩ yake, ndũanĩ syoo ene.

2Na Esekia aia nguthu sya athembi na Alivai kũatĩanĩsya nguthu syoo, kĩla mũndũ kwĩanana na ũthũkũmi wake, athembĩ o na Alivai, kwondũ wa nthembo sya kũvĩvw’a na nthembo sya mũuo, mathũkũmae, na kũtũngaa mũvea, na kũtaĩaa mbingĩlonĩ sya mwako wa maeema wa Yeova.

3O na ĩngĩ mũsumbĩ aia kĩlungu kya isamũ syake kwondũ wa nthembo sya kũvĩvw’a, nasyo nĩ nthembo sya kũvĩvaw’a kĩoko na wĩoo, na nthembo sya kũvĩvw’a sya masavato, na sya mĩtiso ya myei, na sya mboka itw’ĩtwe, o tondũ kũandĩkĩtwe mĩaonĩ ya Yeova.

4O na ĩngĩ eeaĩa andũ ala matwĩe Yelusaleme manenganae kĩlungu kya athembi na Alivai, nĩ kana menengane mĩaonĩ ya Yeova.

5Na o yĩla mwĩao wanyaĩĩkie, ana ma Isilaeli nĩmanenganie ũsyao wa mbee wa lĩu wa mbaa ngetha, na mbinyu mbĩthĩ, na mauta, na ũkĩ wa nzũkĩ, na wingĩvo w’onthe wa mũũnda, mbingĩ mũno; na kĩlungu kya ĩkũmĩ kya syĩndũ syonthe nĩmaetie, mbingĩ mũno.

6Na ana ma Isilaeli na Yuta, ala matũaa ndũanĩ sya Yuta, nao maete kĩlungu kya ĩkũmi kya ng’ombe na malondu, na kĩlungu kya ĩkũmi kya syĩndũ ila siĩtwe ivathĩtwe syĩthĩwe ntheu kwa Yeova Ngai woo, na masia mbumbu na mbumbu.

7Mwei wa katatũ mambĩlĩlya kwia mbumbu, na mamina mwei wa mũonza.

8Na yĩla Esekia na anene me mbee ũsumbĩnĩ mookĩe na moona i mbumbu, mamũtaĩa Yeova na andũ make Isilaeli.

9Na ĩndĩ Esekia akũlya athembi na Alivai ũndũ wa i mbumbu.

10Na Asalia mũthembi mũnene, wa nyũmba ya Nzatoki, amũsũngĩa na amwĩa, Kuma yĩla andũ mambĩlĩlye kũete nthembo nyũmbanĩ ya Yeova, nĩtũĩsaa na kwĩanĩwa, na tũtialĩtye mwingĩ: nũndũ Yeova nũathimĩte andũ make; na kĩla kĩtialĩte nĩ mbio ĩno mbingĩ.

11Nĩvo ĩndĩ Esekia weaie tũsũmba tũseũvw’e nyũmbanĩ ya Yeova; na matũseũvya;

12na maete nthĩnĩ na kĩthito nthembo na ilungu sya ĩkũmi na syĩndũ ivathĩtwe syĩthĩwe ntheu. Na Konania Mũlivai aĩ mũnene woo, na Simei mwana‐a‐inyia aĩ wa kelĩ;

13na Yeiieli, na Asasia, na Naathi, na Asaeli, na Yelimothi, na Yosavati, na Elieli, na Isimakia, na Maathu, na Mbenaia, maĩ asyaĩĩsya ĩtheo wa Konania na Simei mwana‐a‐inyia, kwĩanana na kwiwa nĩ mũsumbĩ Esekia, na Asalia mũnene wa nyũmba ya Ngai.

14Na Kole mwana wa Imina Mũlivai, mũsũvĩi wa mbingĩlonĩ ya ngalĩ ya wumĩlonĩ wa syũa, aĩ mũsyaĩĩsya wa nthembo ila syaumĩaw’a Ngai na ngoo ya kwenda, aaanasye nthembo sya Yeova na syĩndũ ila ntheu mũno.

15Na ĩtheo wake kwaĩ Eteni na Miniamini, na Yesua, na Semaia, na Amalia, na Sekania, ndũanĩ sya athembi, wĩanĩ woo wa kũĩkĩĩwa, mamanenge ana‐a‐ĩthe moo nguthu na nguthu, kwa anene o na kwa anini ũndũ ũmwe:

16eka aũme ala matalilwe mosyaanĩonĩ, ala mavikĩtye myaka ĩtatũ na mbee, o kĩla ũmwe ũla walikile nyũmbanĩ ya Yeova, o tondũ waĩlĩtwe kwĩkwa kĩla mũthenya, kwondũ wa ũthũkũmi woo mawĩanĩ moo kũatĩĩa nguthu syoo;

17na ala matalilwe mosyaanĩonĩ ma athembi kwĩanana na nyũmba sya aaĩthe moo, vamwe na Alivai ala mavikĩtye myaka mĩongo ĩlĩ na mbee, mawĩanĩ moo kũatĩĩa nguthu syoo;

18na ala matalilwe mosyaanĩonĩ ma syana syoo syonthe nini, na iveti syoo, na ana moo, na eĩtu moo, ũmbanonĩ w’onthe: nũndũ wĩanĩ woo wa kũĩkĩĩwa nĩmeevathanĩtye o ũtheunĩ.

19O na kwondũ wa ana ma Aluni athembi, ala maĩ mĩũndanĩ yĩ syengonĩ sya ndũa syoo, kĩla ndũanĩ, kwaĩ andũ ala mawetiwe na masyĩtwa, mamanenge ilungu aũme onthe katĩ wa athembi, na onthe ala matalilwe mosyaanĩonĩ ma Alivai.

20Na Esekia eekie ũu Yuta kw’onthe; na eekaa ũseo na ũlũngalu e na kĩthito kũla kwĩ Yeova Ngai wake.

21Na kĩla wĩanĩ wambĩlĩlye ũthũkũminĩ wa nyũmba ya Yeova, na mĩaonĩ, na myamũlonĩ, amanthe Ngai wake, awĩkaa na ngoo yake yonthe, na aathimĩka.

← Chapter 30 Jump to: Chapter 32 →