2 Chronicles 36

Kamba (Mbivilia) 1956

← Chapter 35 Jump to:

1Nĩvo ĩndĩ andũ ma ĩ nthĩ moosie Yeoaasi mwana wa Yosia, na mamũtw’ĩkĩthya mũsumbĩ vandũ va ĩthe wake ku Yelusaleme.

2Yeoaasi aĩ wa myaka mĩongo ĩlĩ na ĩtatũ yĩla wambĩlĩlye kũsumbĩka; na asumbĩka myei ĩtatũ Yelusaleme.

3Na mũsumbĩ wa Misili amumya kũsumbĩkanĩ kwake Yelusaleme, na aumĩthya nthĩ vaini ya talendi ĩana sya vetha na talendi ya thaavu.

4Na mũsumbĩ wa Misili amũtw’ĩkĩthya Eliakimu mwana‐a‐ĩthe mũsumbĩ wa Yuta na Yelusaleme, na aalyũla syĩtwa yake etawe Yeoiakimu. Na Neko oosa Yeoaasi mwana‐a‐ĩthe, na amũtwaa Misili.

5Yeoiakimu aĩ wa myaka mĩongo ĩlĩ na ĩtano yĩla wambĩlĩlye kũsumbĩka; na asumbĩka myaka ĩkũmi na ũmwe Yelusaleme: na eekaa ũla Yeova Ngai wake wonaa wĩ ũthũku.

6Nevukatilesa mũsumbĩ wa Mbaviloni ooka okita nake, na amwova na mbĩngũ, amũtwae Mbaviloni.

7O na Nevukatilesa atwaa ĩmwe ya mĩio ya nyũmba ya Yeova Mbaviloni, na amĩkĩa ĩkalũnĩ yake Mbaviloni.

8Na ĩndĩ meko ala angĩ ma Yeoiakimu, na mothatyo make ala wekaa, na ũla woonekie ĩũlũ wake, sisya, nĩmaandĩkĩtwe ĩvukunĩ ya asumbĩ ma Isilaeli na Yuta: na Yeoiakini mwana wake asumbĩka vandũ vake.

9Yeoiakini aĩ wa myaka nyanya yĩla wambĩlĩlye kũsumbĩka; na asumbĩka myeĩ ĩtatũ na mĩthenya ĩkũmi Yelusaleme; na eekaa ũla Yeova wonaa wĩ ũthũku.

10Na mwaka ũkyambĩlĩlya mũsumbĩ Nevukatilesa atũmana, na amũete Mbaviloni, vamwe na mĩio mĩseo ya nyũmba ya Yeova, na amũtw’ĩkĩthya Nzetekia mwana‐a‐ĩthe wake mũsumbĩ wa Yuta na Yelusaleme.

11Nzetekia aĩ wa myaka mĩongo ĩlĩ na ũmwe yĩla wambĩlĩlye kũsumbĩka; na asumbĩka myaka ĩkũmi na ũmwe Yelusaleme:

12na eekaa ũla Yeova Ngai wake wonaa wĩ ũthũku; ndaaĩnyivĩsya mwathani Yelemia akĩneena ndeto syaumĩte kanyw’anĩ wa Yeova.

13O na amũng’endea Nevukatilesa, ũla wamwĩavĩthisye na Ngai: ĩndĩ oomya ngingo yake, na oomanĩlya ngoo yake ndakamwĩthyũũĩe Yeova, Ngai wa Isilaeli.

14O na ĩngĩ anene onthe ma athembi, na andũ, mavĩtasya mũno makĩatĩĩa mothatyo onthe ma i mbaĩ; na mavukasya nyũmba ya Yeova ĩla wamĩvathie yĩthĩwe ntheu ku Yelusaleme.

15Na Yeova, Ngai wa aaĩthe moo, atũmanaa kwoo na kanyw’a wa atũmwa make, akyũkĩla tene na akĩtũmana, nĩkwĩthĩwa amew’ĩaa andũ make ĩnee, o na ũtũo wake:

16ĩndĩ nĩmamathekeeaa atũmwa ma Ngai, na kũvũthasya ndeto syake, na kũmavũthĩĩasya athani make, mũvaka ũthilĩku wa Yeova wamokĩlĩla andũ make, kũvika kũtyaĩ kya kũvosya.

17Kwondũ wa ũu amaetee mũsumbĩ wa Akalitei, ũla woaĩe anake moo na ũvyũ nyũmbanĩ ya vala vandũ vatheu voo, na ndaamwĩw’ĩa mwanake kana mwĩĩtu mũtheu ĩnee, o na mũtumĩa kana ũla wĩ mbuĩ: amanengane onthe kw’okonĩ kwake.

18Na mĩio yonthe ya nyũmba ya Ngai, mĩnene na mĩnini, na mothwii maie ma nyũmba ya Yeova, na mothwii maie ma mũsumbĩ, na ma anene make me mbee ũsumbĩnĩ, atwaa isu syonthe Mbaviloni.

19Na mavĩvya nyũmba ya Ngai, na maomboanga ũvai wa Yelusaleme, na mavĩvya na mwaki nyũmba syonthe nene mbanakavye sya vo, na maananga mĩio mĩseo ya vo yonthe.

20Na ala mavonokie ũvyũ amatwaa Mbaviloni; na maĩ athũkũmi make na ma ana make kũvika kũsumbĩka kwa ũsumbĩ wa Velisia:

21nĩ kana ndeto ya Yeova na kanyw’a wa Yelemia ĩanĩw’e, kũvika nthĩ yatanĩa masavato mayo: nũndũ o yĩla yeethĩiwe ĩei nĩw’o yalilikanaa savato, ĩanĩsye myaka mĩongo mũonza.

22Na ĩndĩ mwaka wa mbee wa kũsumbĩka kwa Kulusi mũsumbĩ wa Velisia, nĩ kana ndeto ya Yeova na kanyw’a wa Yelemia ĩanĩw’e, Yeova aamũkya veva wa Kulusi mũsumbĩ wa Velisia, kũvika atavan’ya ũsumbĩnĩ wake w’onthe, o na aandĩka, akyasya,

23Ũũ nĩw’o Kulusi mũsumbĩ wa Velisia ũnũkwasya, Yeova, Ngai wa ĩtunĩ, nũnengete mosumbĩ onthe ma nthĩ; na nũmbĩaĩĩte nĩmwakĩe nyũmba Yelusaleme, ĩla yĩ Yuta. O ũla wĩ katĩ wenyu wa andũ make onthe, Yeova Ngai wake nĩethĩwe vamwe nake, nake nĩambate.

← Chapter 35 Jump to: