2 Chronicles 4

Kamba (Mbivilia) 1956

← Chapter 3 Jump to: Chapter 5 →

1Na ĩngĩ aseũvya kĩthembeo kya ũthuku, ũasa wakyo mĩkono mĩongo ĩlĩ, na ũthanthau wakyo mĩkono mĩongo ĩlĩ, na ũtũlu wakyo mĩkono ĩkũmi.

2O na aseũvya ũkanga na syĩndũ ila matwekethetye, wa mĩkono ĩkũmi kuma ũengo kũvika ũengonĩ ũla ũngĩ, wa kĩlingĩlĩ ngalĩ syonthe; na ũtũlu waw’o waĩ mĩkono ĩtano; na kũthima na ũlii waĩ mĩkono mĩongo ĩtatũ kũthyũlũlũka ngalĩ syonthe.

3Na ĩtheo waw’o kwaĩ mĩvw’anano ya nzaũ, yothyũlũlũkĩte ngalĩ syonthe, ĩkũmi kwa kĩla mĩkono, ĩkĩthyũlũlũka ũ ũkanga. Nzaũ syaĩ sya mĩsoa ĩlĩ, syatuanĩw’e naw’o.

4Watũlĩtw’e ĩũlũ wa nzaũ ĩkũmi na ilĩ, itatũ isyaĩtye ngalĩ ya ĩũlũ, na itatũ isyaĩtye ngalĩ ya ũthũĩlonĩ wa syũa, na itatũ isyaĩtye ngalĩ ya ĩtheo, na itatũ isyaĩtye ngalĩ ya wumĩlonĩ wa syũa: na ũkanga wailĩĩlwe ĩũlũ wasyo, na itimba syasyo syonthe syeelekele ngalĩ ya nthĩnĩ.

5Na kĩemo kyaw’o kyaĩ ta kĩtaa kya kw’oko; na ũengo waw’o watuĩtwe ta ũengo wa kĩkombe, ta ĩlaa ya lili: waĩ ũtonya kwĩanĩa vathi ngili itatũ.

6O na aseũvya syĩndũ ĩkũmi sya kũthambĩa, na aia itano ngalĩ ya kw’oko kwa aũme, na itano ngalĩ ya kw’oko kwa aka, mathambĩasye nthĩnĩ wasyo; syĩndũ ila sya nthembo ya kũvĩvw’a maithambĩasya nthĩnĩ wasyo; ĩndĩ ũkanga waĩ wa athembi wa kũthambĩaa nthĩnĩ waw’o.

7Na aseũvya syĩndũ ĩkũmi sya thaavu ila syĩkĩawa mataa kwĩanana na ũtw’ĩo ũndũ wasyo; na asia ĩkalũnĩ, itano ngalĩ ya kw’oko kwa aũme, na itano ngalĩ ya kw’oko kwa aka.

8O na aseũvya mesa ĩkũmi, na asia ĩkalũnĩ, itano ngalĩ ya kw’oko kwa aũme, na ĩtano ngalĩ ya kw’oko kwa aka. Na aseũvya masaani manene ĩana ma thaavu.

9Na ũndũ ũngĩ aseũvya nza ya athembi, na ĩla nza nene, na mĩomo ya nza, na avw’ĩka mĩomo yasyo ũthuku.

10Na aia ũkanga ngalĩ ya kw’oko kwa aũme ya nyũmba ngalĩ ya wumĩlonĩ wa syũa, kwelekela ngalĩ ya ĩtheo.

11Na Ulamu aseũvya mbisũ, na mĩko, na masaani manene. Ũu nĩw’o Ulamu waminie wĩa ũla wamũtetheesye mũsumbĩ Solomoni kwondũ wa nyũmba ya Ngai:

12ila ituĩ ilĩ, na ngulumbe, na ngovia ilĩ ila syaĩ mĩthyanĩ ya ituĩ, na ila seng’eng’e ilĩ sya kũvw’ĩka ila ngulumbe ilĩ sya ngovia ila syaĩ mĩthyanĩ ya ituĩ,

13na makũngũmanga maana ana ũndũ wa ila seng’eng’e ilĩ; mĩsoa ĩlĩ ya makũngũmanga ũndũ wa kĩla seng’eng’e, ya kũvw’ĩka ila ngulumbe ilĩ sya i ngoiva ila syaĩ mĩthyanĩ ya ila ituĩ.

14O na aseũvya matina, na aseũvya syĩndũ sya kũthambĩa ĩũlũ wa matina asu;

15ũkanga ũmwe, na ila nzaũ ĩkũmi na ilĩ ungu waw’o.

16O na mbisũ, na mĩko, na itonyi sya nyama, na mĩio yonthe yayo, Ulamu ĩthe wake amũseũvĩsya mũsumbĩ Solomoni, ya ũthuku mũkute, kwondũ wa nyũmba ya Yeova.

17Mũsumbĩ amĩtũĩe ũiĩnĩ wa Yolotani, nthĩ yĩ yũmba katĩ wa Sukothi na Nzeleta.

18Ũu nĩw’o Solomoni waseũvĩthisye mĩio ĩsu yonthe mingĩ mũno: nũndũ ũito wa ũthuku ndwaĩ ũtonya kũmanyĩka.

19Na Solomoni aseũvya mĩio yonthe ĩla yaĩ nyũmbanĩ ya Ngai, o na kĩthembeo kya thaavu, na mesa ila syaĩ na imũtũ ila siĩawa Yeova;

20na syĩndũ ila syĩkĩawa mataa vamwe na mataa masyo sya thaavu mũtheu, ma kwakanaa kwĩanana na ũtw’ĩo, ngalĩ ya mbee ya vala vandũ va ũneenea;

21na ala malaa, na mataa, na mĩveto, sya thaavu, o thaavu mũtheu ki;

22na mĩkasi, na masaani manene, na syĩko, na tũvũngũlyũ twa ũkua makaa, sya thaavu mũtheu. Na ũndũ wa vandũ va ũlikĩla nyũmba, mĩomo ya nthĩnĩ yavo ya vala vatheu mbee, na mĩomo ya nyũmba, ũu nĩ kwasya ya ĩkalũ, yaĩ ya thaavu.

← Chapter 3 Jump to: Chapter 5 →