2 Chronicles 8

Kamba (Mbivilia) 1956

← Chapter 7 Jump to: Chapter 9 →

1Na kweethĩwa ĩtina wa myaka mĩongo ĩlĩ yathela, ĩla Solomoni wakaa nyũmba ya Yeova, na nyũmba yake mwene,

2atĩ ndũa ila Ulamu wanengie Solomoni, Solomoni aitũngĩĩa, na ekalya ana ma Isilaeli kw’o.

3Na Solomoni athi Amathi‐sova, na amĩkĩlya vinya.

4Na aaka ndũa ya Tatimoli weũnĩ, na ndũa syonthe sya kwia mĩio, ila wakie Amathi.

5O na aaka Mbethi‐oloni ĩla yĩ ĩũlũ, na Mbethi‐oloni ĩla yĩ ĩtheo, ndũa mbiie, syĩ na maũvai, na mbingĩlo, na ivingi;

6na Mbaalathi, na ndũa syonthe sya kwia mĩio ila Solomoni waĩ nasyo, na ndũa syonthe kwondũ wa makasya make ma kaũ, na ndũa sya andũ make ala matũlaa mbalasi, na syonthe ila Solomoni wendie kwaka kwondũ wa kwĩtanĩthasya kwake Yelusaleme, na Levanoni, na nthĩ yonthe ya ũsumbĩko wake.

7Na ũndũ wa andũ onthe ala matialile ma Aititi, na Aamoli, na Avelisi, na Aivi, na Ayevusi, ala mataĩ ma Isilaeli;

8ma syana syoo ila syatialile ĩtina woo nthĩ ĩsu, ila ana ma Isilaeli mataaimina, imwe sya isu Solomoni amakwatĩthisye wĩa wa ũkombo kũvika ũmũnthĩ.

9Ĩndĩ ma ana ma Isilaeli Solomoni ndaamatw’ĩkĩthya athũkũmi kwondũ wa wĩa wake; ĩndĩ asu maĩ andũ ma kaũ, na anene ma makavuteni make, na anene ma makasya make ma kaũ na ma andũ make ala matũlaa mbalasi.

10Na asu maĩ anene mbee ma kwa mũsumbĩ Solomoni, o maana elĩ na mĩongo ĩtano, ala masumbĩkaa andũ.

11Na Solomoni ambatya mwĩĩtu wa Valao kũmumya ndũanĩ ya Ndaviti kũmũete nyũmbanĩ ĩla wamwakĩe; nũndũ aisye, Kĩveti kyakwa kĩtikekala nyũmbanĩ ya Ndaviti mũsumbĩ wa Isilaeli, nĩkwĩthĩwa kũndũ kũu nĩ kũtheu, kũla ĩsandũkũ ya Yeova yũkĩte.

12Nĩvo ĩndĩ Solomoni wamũthembee Yeova nthembo sya kũvĩvw’a kĩthembeonĩ kya Yeova, kĩla wakĩte ngalĩ ya mbee ya valasya,

13o tondũ kwaĩlĩte kwĩkawa kĩla mũthenya, akĩthemba kwĩanana na mwĩao wa Mose, masavatonĩ, na mĩtisonĩ ya myei, na ĩvindanĩ ya mboka itw’ĩtwe, kũndũ kũtatũ kĩla mwaka, o mbokanĩ ya kĩmũtũ kĩte ĩlawa, na mbokanĩ ya syumwa, na mbokanĩ ya malwanda.

14Na aia, kwĩanana na ũtw’ĩo wa ĩthe wake Ndaviti, nguthu sya athembi ũthũkũminĩ woo, na Alivai mawĩanĩ moo, mataĩae, na kũthũkũmaa vu mbee wa athembi, o tondũ kwaĩlĩte kwĩkawa kĩla mũthenya; asũvĩi ma mĩomonĩ nao kwĩanana na nguthu syoo kĩla mbingĩlonĩ; nũndũ ũu nĩw’o Ndaviti mũndũ wa Ngai weaie.

15Na matyaatia ũndũ mũsumbĩ weaĩe athembi na Alivai ũndũnĩ o na wĩva, kana ũvoonĩ wa mothwii maie.

16Na ĩndĩ wĩa w’onthe wa Solomoni waseũviw’e kuma mũthenya wa wambĩlĩlyo wa nyũmba ya Yeova, o na kũvika yathela. Na ĩndĩ nyũmba ya Yeova yathela.

17Nĩvo ĩndĩ Solomoni waendie Esioni‐ngeveli, na Elothi, ũtee wa ũkanga nthĩ ya Etomu.

18Na Ulamu amũtwaĩa na moko ma athũkũmi make ngalawa, na athũkũmi ala maĩ na ũmanyi wa ũkanga; na mooka na athũkũmi ma Solomoni ku Ovilu, na malatya kw’o talendi maana ana na mĩongo ĩtano sya thaavu, na maiete kwa mũsumbĩ Solomoni.

← Chapter 7 Jump to: Chapter 9 →