2 Chronicles 29

Kamba (Mbivilia) 1956

← Chapter 28 Jump to: Chapter 30 →

1Esekia ambĩlĩlya kũsumbĩka yĩla waĩ wa myaka mĩongo ĩlĩ na ĩtano; na asumbĩka myaka mĩongo ĩlĩ na kenda Yelusaleme: na syĩtwa ya inyia wake eetawa Aviya, mwĩĩtu wa Nzekalia.

2Na eekaa ũla Yeova wonaa wĩ ũseo, kwĩanana na w’onthe ũla Ndaviti ĩthe wake wekaa.

3Mwaka wa mbee wa kũsumbĩka kwake, mwei wa mbee, nĩwavingũie mĩomo ya nyũmba ya Yeova, na amĩseũvya.

4Na aete athembi na Alivai, na amomban’ya vala vandũ vathanthau ngalĩ ya wumĩlonĩ wa syũa,

5na amea, Mbĩthukĩĩsyai, inyw’ĩ Alivai; ĩvathan’yei mwĩthĩwe atheu, na mũivathan’ya nyũmba ya Yeova, Ngai wa aaĩthe menyu, na mũikua mumaalye ũvuku ũla wĩ vala vandũ vatheu.

6Nũndũ aaĩthe maitũ nĩmavĩtĩtye, na mekĩte ũla Yeova Ngai waitũ wonaa wĩ ũthũku, na nĩmamũtiĩte, na nĩmathyũũĩte mothyũ moo kumya ũtũonĩ wa Yeova, na mawelekelya mĩongo yoo.

7O na nĩmavingĩte mĩomo ya valasya, na mavosya mataa, na matyaatoeeasya ũvani kana kũmũthembea Ngai wa Isilaeli nthembo sya kũvĩvw’a nthinĩ wa vala vandũ vatheu.

8Kwondũ wa ũu ũthilĩku wa Yeova waĩ ĩũlũ wa Yuta na Yelusaleme, na nũmanenganite mokĩlangw’e kũũ na kũũ, methĩwe ũseng’yo, na ma kũtimbwa, o tondũ mũkwona na metho menyu.

9Nũndũ, sisyai, aaĩthe maitũ nĩmavalũkilw’e na ũvyũ, na ana maitũ na eĩtu maitũ na iveti sitũ nĩ atave kwondũ wa ũndũ ũsu.

10Na ĩndĩ kwĩ ngoonĩ yakwa kũtianĩa ũtianĩo na Yeova, Ngai wa Isilaeli, nĩ kana ũthatu wake mwai wĩthyũũe ũtũtie.

11Ana makwa, yu mũikateenyange; nũndũ Yeova nũmũnyuvĩte mũũngame mbee wake mũmũthũkũme, na mwĩthĩwe athũkũmi make, na kũtoeeasya ũvani.

12Nĩvo ĩndĩ Alivai mookĩlile, Maathu, mwana wa Amasai, na Yoeli mwana wa Asalia, na ana ma Akoathi; na ma ana ma Melali, Kisu mwana wa Avati, na Asalia mwana wa Yealeleli; na ma Angelisoni, Yoa mwana wa Nzima, na Eteni mwana wa Yoa;

13na ma ana ma Elisavani, Simili na Yeueli; na ma ana ma Asavu, Nzekelia na Matania;

14na ma ana ma Emani, Yeueli na Simei; oa ma ana ma Yetuthuni, Semaia na Usieli.

15Na moomban’ya ana‐a‐ĩthe moo, na meevathan’ya methĩwe atheu, na malika, kwĩanana na mwĩao wa mũsumbĩ kwondũ wa ndeto sya Yeova mathesye nyũmba ya Yeova.

16Na athembi malika vandũ va nthĩnĩ va nyũmba ya Yeova, mavathesye, na maumaalya nza ya nyũmba ya Yeova ũvuku w’onthe ũla moonie ĩkalũnĩ ya Yeova. Na Alivai mawosa, mawumaalya kũvikya kalũsĩnĩ ka Kitiloni.

17Na ĩndĩ mambĩlĩlye mũthenya wa mbee wa mwei wa mbee mavathan’ye, na mũthenya wa nyanya wa mwei mavika valasya wa Yeova; na mavathan’ya nyũmba ya Yeova vandũ va mĩthenya nyanya yĩthĩwe ntheu: na mũthenya wa ĩkũmi na thanthatũ wa mwei wa mbee mamina.

18Nĩvo ĩndĩ malikile vala ve mũsumbĩ Esekia nthĩnĩ wa nyũmba nene mbanakavye, na masya, Nĩtũtheetye nyũmba yonthe ya Yeova, na kĩthembeo kya nthembo ya kũvĩvw’a, vamwe na mĩio yonthe yakyo, na mesa ya imũtũ ila siĩawa Yeova, vamwe na mĩio yonthe yayo.

19O na ũndũ ũngĩ mĩio yonthe, ĩla mũsumbĩ Aasu yĩla wasumbĩkĩte wavetie ũtee yĩla wavĩtisye, nĩtũmĩseũvĩtye o na kũmĩvathan’ya yĩthĩwe mĩtheu: na, sisya, yĩ mbee wa kĩthembeo kya Yeova.

20Na ĩndĩ mũsumbĩ Esekia ookĩla kĩoko tene, na oomban’ya anene me mbee ũsumbĩnĩ ma ndũa, na ambata nyũmbanĩ ya Yeova.

21Na maete tũsalũ twa mũew’a mũonza, na ndũũme mũonza, na tũtena twa malondu mũonza, na nthenge mũonza, syĩthĩwe nthembo kwondũ wa naĩ kwondũ wa ũsumbĩ na kwondũ wa vala vandũ vatheu na kwondũ wa Yuta. Na eeaĩa athembi, ana ma Aluni, maithembe kĩthembeonĩ kya Yeova.

22Na ĩndĩ mooaa tũsalũ, na athembi moosa nthakame, na mamĩminzangĩsya kĩthembeonĩ: na mooaa ndũũme, na maminzangĩsya nthakame kĩthembeonĩ: o na mooaa tũtena twa malondu, na maminzangĩsya nthakame kĩthembeonĩ.

23Na mathengeesya nthenge vu mbee wa mũsumbĩ na ũmbano syĩthĩwe nthembo kwondũ wa naĩ; na mailĩĩla moko moo ĩũlũ wasyo:

24na athembi masyũaa, na nthakame yasyo mathemba kĩthembeonĩ kwondũ wa naĩ, kwondũ wa wĩw’anĩthyo wa Isilaeli onthe: nũndũ mũsumbĩ nĩweaie kana nthembo ya kũvĩvw’a na nthembo kwondũ wa naĩ ĩkathembwe kwondũ wa Isilaeli onthe.

25Na aia Alivai nyũmbanĩ ya Yeova me na tũmasaya, na inanda, na mbeve, kwĩanana na mwĩao wa Ndaviti, na wa Ngati mwoni wa kwa mũsumbĩ, na mwathani Nathani; nũndũ mwĩao waĩ wa Yeova na kanyw’a wa athani make.

26Na Alivai maũngama me na syĩndũ sya kũinga sya Ndaviti, na athembi me na masoo.

27Na Esekia eeaa nthembo ya kũvĩvw’a ĩthembwe kĩthembeonĩ Na yĩla nthembo ya kũvĩvw’a yambĩlĩlw’e, wathi wa Yeova naw’o wambĩlĩlw’a, o na masoo, vamwe na syĩndũ sya kũinga sya Ndaviti mũsumbĩ wa Isilaeli.

28Na ũmbano w’onthe wathaitha, na aini maina, na masoo mavuvwa; na ũu w’onthe weekwa kũvika nthembo ya kũvivw’a yathela.

29Na yĩla maminie kũthemba, mũsumbĩ na onthe ala maĩ vo vamwe nake makunama na mathaitha.

30O na ĩngĩ mũsumbĩ Esekia na anene me mbee ũsumbĩnĩ meeaĩa Alivai mamũkumye Yeova na ndeto sya Ndaviti, na sya Asavu ũla mwini. Na maina ndaĩa na ũtanu, na makunamya mĩtwe yoo na mathaitha.

31Nĩvo ĩndĩ Esekia wasũngĩie na asya, Yu nĩmwĩvathanĩtye mwĩthĩwe atheu kwa Yeova; thengeeai na mũiete nthembo sya kũtonywa na nthembo sya mũvea nyũmbanĩ ya Yeova. Na ũmbano waete nthembo sya kũtonywa na nthembo sya mũvea; na o ũndũ meana ala maĩ na ngoo ya kwenda maete nthembo sya kũvĩvw’a.

32Na ũtalo wa nthembo sya kũvĩvw’a ila syaetiwe nĩ ũmbano waĩ tũsalũ twa mũew’a mĩongo mũonza, na ndũũme ĩana, na tũtena twa malondu maana elĩ; isu syonthe syaĩ sya nthembo ya kũmũvĩvĩsya Yeova.

33Na syĩndũ ila syavathiwe syĩthĩwe ntheu syaĩ ng’ombe maana thanthatũ na malondu ngili itatũ.

34Ĩndĩ athembi maĩ anini, ũndũ mataatonya kũthĩnza nthembo syonthe sya kũvĩvw’a: kwondũ wa ũu ana‐a‐ĩthe moo Alivai mamatetheesya, kũvika yĩla wĩa wathelile, na kũvika yĩla athembi meevathie methĩwe atheu; nũndũ Alivai maĩ alũngalu ngoonĩ ũndũnĩ wa kwĩvathan’ya kũthonoka athembi.

35O na nthembo sya kũvĩvw’a syaĩ nyingĩ mũno, vamwe na mathunya ma nthembo sya mũuo, na vamwe na nthembo sya kũnyuwa kwondũ wa kĩla nthembo ya kũvĩvw’a. Ũu nĩw’o ũthũkũmi wa nyũmba ya Yeova walanilw’e.

36Na Esekia atana, o na andũ onthe, nũndũ wa ũla Ngai waseũvĩsye andũ: nũndũ ũndũ ũsu nĩweekĩkie na mĩtũkĩ.

← Chapter 28 Jump to: Chapter 30 →