2 Chronicles 28

Kamba (Mbivilia) 1956

← Chapter 27 Jump to: Chapter 29 →

1Aasu aĩ wa myaka mĩongo ĩlĩ yĩla wambĩlĩlye kũsumbĩka; na asumbĩka myaka ĩkũmi na thanthatũ Yelusaleme: na ndaaĩka ũla Yeova wonaa wĩ ũseo, ta Ndaviti ĩthe wake;

2ĩndĩ aendaa mĩendelenĩ ya asumbĩ ma Isilaeli, o na aseũvya mĩvw’anano na syĩndũ matwekethetye kwondũ wa Mbaalimu.

3Na ũndũ ũngĩ atoeeasya ũvani e kyandanĩ kya mwana wa Inomu, na avĩvĩsya syana syake mwakĩnĩ, kwĩanana na mothatyo ma mbaĩ ila Yeova walũngilye syume mbee wa ana ma Isilaeli.

4Na athembaa na kũtoeeasya ũvani kũla kũndũ kũtũlu, na iĩmanĩ, na ĩtina wa kĩla mũtĩ mwĩũ.

5Kwondũ wa ũu Yeova Ngai wake amũnengane kw’okonĩ kwa mũsumbĩ wa Silia; na mamũkũna, na matwaa ma andũ make aingĩ mũno me atave, na mamavikya Ndamasiku. Nake mwene anenganwe kw’okonĩ kwa mũsumbĩ wa Isilaeli, ũla wamũkũnie na ũai mũnene.

6Nũndũ Veka mwana wa Lemalia nĩwoaie ku Yuta andũ ngili ĩana na mĩongo ĩlĩ mũthenya ũmwe, onthe andũ ngũmbaũ; nĩkwĩthĩwa nĩmatiĩte Yeova, Ngai wa aaĩthe moo.

7Na Nzikili, mũndũ ngũmbaũ wa Evalaimu, ooaa Maaseia mwana wa mũsumbĩ, na Asilikamu mũnene wa nyũmba, na Elikana ũla waĩ wa kelĩ ũsumbĩnĩ.

8Na ana ma Isilaeli matwaa ana‐a‐ĩthe moo mamatavĩte ngili maana elĩ, aka, na ana, na eĩtu, o oa matava mũtavo mwingĩ kuma kwoo, na matwaa mũtavo Samalia.

9Ĩndĩ mwathani wa Yeova aĩ kw’o, ũla wetawa syĩtwa yake Oteti: na aumaala akomane na nguthu ĩla yokĩte Samalia, na amĩtavya, Sisya, nĩkwĩthĩwa Yeova, Ngai wa aaĩthe menyu, nĩwathilĩkĩle Yuta, nũmanenganĩte kw’okonĩ kwenyu, na nĩmũmoaĩte na ũthatu mwai ũvikĩte ĩtunĩ.

10Na yu nĩmũsũanĩĩte kwĩkalya ana ma Yuta na Yelusaleme methĩwe ngombo kwenyu aũme na aka: ĩndĩ inyw’ĩ kũti mavĩtyo o na kwenyu ĩũlũ wa Ngai wenyu?

11Kwondũ wa ũu yu mbĩthukĩĩsyai na mũitũnga ala atave, ala mũtavĩte ma ana‐a‐ĩthe menyu; nũndũ ũthilĩku mwai wa Yeova wĩ ĩũlũ wenyu.

12Nĩvo ĩndĩ amwe ma atongoi ma ana ma Evalaimu, nao nĩ Asalia mwana wa Yoanani, na Mbelekia mwana wa Mesilemothi, na Yeisikia mwana wa Salumu, na Amasa mwana wa Aatilai, maũngamie mamasiĩĩe ala mookie kuma kaũnĩ,

13na mamea, Mũtilikya ala atave vaa: nũndũ nĩmũsũanĩĩte ũndũ ũla wĩtũetee ĩvĩtyo kũla kwĩ Yeova, na kwongeleela naĩ sitũ o na ĩvĩtyo yitũ; nũndũ ĩvĩtyo yitũ nĩ ĩnene, na ve kũthilĩkĩlwa kwai ĩũlũ wa Isilaeli.

14Kwondũ wa ũu andũ ala meekĩe mĩio ya kaũ matia ala atave o na mũtavo kũla kwĩ anene me mbee ũsumbĩnĩ na ũmbano w’onthe.

15Na andũ ala mawetetwe masyĩtwa mookĩla, na moosa ala matavĩtwe, na kumya vu mũtavonĩ mamavw’ĩka onthe katĩ woo ala maĩ athei, na mamekĩa ngũa, na mamekĩa iatũ, na memanenga kya ũya na kya ũnyw’a, na mametĩkĩsya mauta, na makuĩthya onthe moo ala mataĩ na vinya mang’oinĩ, na mamaete Yeliko, ndũa ya mĩtende, kwa ana‐a‐ĩthe moo: na ĩndĩ masyoka Samalia.

16Ĩvinda yĩu mũsumbĩ Aasu atũmana kwa asumbĩ ma Asuli mamũtethye.

17Nĩkwĩthĩwa Aetomu nĩmookie ĩngĩ na makũna Yuta, na matwaa andũ me atave.

18O na Avilisiti nao nĩmalikĩte ndũa sya nthĩ ndindimalu, na sya ngalĩ ya Ĩtheo ya Yuta, na nĩmoosete Mbethi‐semesi, na Aiyaloni, na Ngetelothi, na Soko na tũtũla twayo, na Timina na tũtũla twayo, o na Ngimiso na tũtũla twayo: na matũa kw’o.

19Nũndũ Yeova nĩwanyivisye Yuta nũndũ wa Aasu mũsumbĩ wa Isilaeli; nĩkwĩthĩwa nĩwekĩie ũmalwaya ku Yuta, na amũvĩtanĩsya Yeova mũno.

20Na Tilikathi‐vilineseli mũsũmbĩ wa Asuli amũkĩa, na amũthĩn’ya ĩndĩ ndaamwĩkĩa vinya.

21Nũndũ Aasu aumisye kĩlungu nyũmbanĩ ya Yeova, na nyũmbanĩ ya mũsumbĩ na ya anene me mbee ũsumbĩnĩ, na amũnenga mũsumbĩ wa Asuli: ĩndĩ kĩtyaamũtethya.

22Na ĩvinda ya thĩna wake amũvĩtanĩsya Yeova mũno mbee, o mũsumbĩ ũsu Aavu.

23Nũndũ nĩwathembeie ngai sya Ndamasiku, ila syamũkũnie; nake asya, Nĩkwĩthĩwa ngai sya asumbĩ ma Silia nĩsyamatethisye, kwondũ wa ũu ngaithembea, nĩ kana indethye. Ĩndĩ nĩsyamwanangie we, na Isilaeli onthe.

24Na Aasu oomban’ya mĩio ya nyũmba ya Ngai, na atilanga ilungu mĩio ya nyũmba ya Ngai, na avinga mĩomo ya nyũmba ya Yeova; na eeseũvĩsya ithembeo kĩla kĩkotonĩ kya Yelusaleme.

25Na kĩla ndũanĩ ya Yuta aseũvya kũla kũndũ kũtũlu kwa kwitoeeasya ngai ingĩ ũvani, na athatya Yeova, Ngai wa aaĩthe make.

26Na ĩndĩ meko ala angĩ make, na mĩendele yake yonthe, ma mbee na ma mũminũkĩlyo, sisya, nĩmaandĩkĩtwe ĩvukunĩ ya asumbĩ ma Yuta na Isilaeli.

27Na Aasu akoma na aaĩthe make, na mamũthika ndũanĩ, o Yelusaleme; nũndũ matyaamũete ngunganĩ vala vathikawa asumbĩ ma Isilaeli: na Esekia mwana wake asumbĩka vandũ vake.

← Chapter 27 Jump to: Chapter 29 →