2 Chronicles 30

Kamba (Mbivilia) 1956

← Chapter 29 Jump to: Chapter 31 →

1Na Esekia atũmana kwa Isilaeli na Yuta onthe, o na amaandĩkĩa Evalaimu na Manase mavalũa, moke nyũmbanĩ ya Yeova Yelusaleme, malilikane vasaka kwondũ wa Yeova, Ngai wa Isilaeli.

2Nũndũ mũsumbĩ nĩwasũanĩĩte, na anene make me mbee ũsumbĩnĩ, na ũmbano w’onthe ku Yelusaleme, malilikane vasaka mwei wa kelĩ.

3Nũndũ matyaatonya kũlilikana ĩvinda yĩu, nĩkwĩthĩwa ũtalo wa athembi ala meevathanĩtye methĩwe atheu ndwaĩ mwĩanĩu, o na andũ matyaĩ manamba kũmbana Yelusaleme.

4Na mũsumbĩ na ũmbano w’onthe moona ũndũ ũsu nĩ mũseo.

5Kwondũ wa ũu matw’a ũtw’ĩo matavan’ye katĩ wa Isilaeli onthe, kuma Mbeeli‐sieva o na kũvika Ndani, moke malilikane vasaka kwondũ wa Yeova, Ngai wa Isilaeli, ku Yelusaleme: nĩkwĩthĩwa matyaaũlilikana me aingĩ o tondũ kũandĩkĩtwe.

6Kwondũ wa ũu atwai ma mavalũa nĩmaendie katĩ wa Isilaeli na Yuta kw’onthe na mavalũa maumĩte kwa mũsumbĩ na anene make me mbee ũsumbĩnĩ, o kwĩanana na mwĩao wa mũsumbĩ, makyasya, Inyw’ĩ ana ma Isilaeli, mwĩthyũũĩei Yeova Ngai wa Avalaamu, na Isaka, na Isilaeli ĩngĩ, nĩ kana asyokee ũtialo wa inyw’ĩ ala mũvonokete kuma kw’okonĩ kwa asumbĩ ma Asuli.

7Na mũtikethĩwe mũilyĩ ta aaĩthe menyu, na ta ana‐a‐ĩthe menyu, ala mamũvĩtanĩsye Yeova, Ngai wa aaĩthe moo, kũvika amanengane wanangĩkonĩ, o ũndũ mũkwona.

8Na yu mũtikethĩwe na ngingo nyũmũ, o tondũ aaĩthe menyu mailyĩ; ĩndĩ ĩnenganei kwa Yeova, na mũilika vandũnĩ vake vala vatheu, vala ũvathanĩtye tene na tene vethĩwe vatheu, na mũimũthũkũma Yeova Ngai wenyu, nĩ kana ũthatu wake mwai wĩthyũũwe wume kwenyu.

9Nũndũ ethĩwa mwĩmwĩthyũũĩa Yeova ĩngĩ, ana‐a‐ĩthe menyu na syana syenyu makoona ĩnee kwa ala mamatwaie me atave, na makasyoka ĩngĩ nthĩ ĩno: nũndũ Yeova Ngai wenyu nĩ mũseo na e tei, na ndakathyũũa ũthyũ wake amũtie, ethĩwa nĩmũũmũsyokea.

10Kwondũ wa ũu atwai ma mavalũa maendela ndũanĩ na ndũanĩ nthĩ ya Evalaimu na Manase, o kũvika Nzevuluni: ĩndĩ mamathekeea mũno, na kũmavũthya.

11Ĩndĩ andũ amwe ma Aseli na Manase na ma Nzevuluni meenyivya na mooka Yelusaleme.

12Na ĩngĩ kw’oko kwa Yeova kwookĩa Yuta kũmanenga ngoo ĩmwe, meke mwĩao wa mũsumbĩ na wa anene me mbee ũsumbĩnĩ kwĩanana na ndeto ya Yeova.

13Na kwoombana andũ aingĩ Yelusaleme malilikane mboka ya kĩmũtũ kĩte ĩlawa mwei wa kelĩ, ũmbano mũnene mũno.

14Na mookĩla na maveta ithembeo ila syaĩ Yelusaleme, na maveta ithembeo syonthe sya kũtoeesya ũvani, na masyĩkya kalũsĩnĩ ka Kitiloni.

15Na ĩndĩ mooaa vasaka mũthenya wa ĩkũmi na ĩna wa mwei wa kelĩ: na athembi na Alivai masonoka, na meevathan’ya methĩwe atheu, na maete nthembo sya kũvĩvw’a nyũmbanĩ ya Yeova.

16Na maũngama vandũ voo maatĩanĩe, kwĩanana na mwĩao wa Mose mũndũ wa Ngai: athembi maminzangĩsya nthakame ĩla moosie kuma mokonĩ ma Alivai.

17Nũndũ kwaĩ aingĩ ũmbanonĩ ala mataaĩvathan’ya methĩwe atheu: kwondũ wa ũu Alivai maĩ na wĩaĩo wa kũaa mavasaka kwondũ wa kĩla ũmwe ũtetheetye, mamavathan’ye methĩwe atheu kwa Yeova.

18Nũndũ wingĩ wa andũ, o aingĩ ma Evalaimu na Manase, na Isakali na Nzevuluni, matyeetheetye, ĩndĩ maya vasaka ũndũ kũtaandĩkĩtwe. Nũndũ Esekia aĩ anamavoyea, akyasya, Yeova mũseo naekee kĩla ũmwe

19ũla wĩlũmya ngoo yake amanthe Ngai, Yeova, Ngai wa aaĩthe make, o na ethĩwa ndetheetye kwĩanana na ũthesyo wa vala vandũ vatheu.

20Na Yeova amwĩthukĩĩsya Esekia, na avosya andũ.

21Na ana ma Isilaeli ala maĩ Yelusaleme malĩlĩkana mboka ya kĩmũtũ kĩte ĩlawa mĩthenya mũonza me na ũtanu mwingĩ; na Alivai na athembi mamũtaĩa Yeova mũthenya na mũthenya, makĩmwinĩa Yeova na syĩndũ sya kũinga syĩ wasya mũnene.

22Na Esekia aneena aimakiakiasya Alivai onthe ala maĩ na ũmanyi mũseo ũthũkũminĩ wa Yeova. Na ĩndĩ maya mboka mĩthenya ĩsu mũonza, makĩthemba nthembo sya nthembo sya mũuo, na makyumbũlĩla Yeova, Ngai wa aaĩthe moo.

23Na ũmbano w’onthe wasũanĩa kũlilikana mĩthenya ĩngĩ mũonza; na malilikana mĩthenya ĩngĩ mũonza me na ũtanu.

24Nũndũ Esekia mũsumbĩ wa Yuta anenga ũmbano tũsalũ twa mũew’a ngili na malondu ngili mũonza syĩthĩwe nthembo; na anene me mbee ũsumbĩnĩ manenga ũmbano tũsalũ twa mũew’a ngili na malondu ngili ĩkũmi: na athembi aingĩ meevathan’ya methĩwe atheu.

25Na ũmbano w’onthe wa Yuta, vamwe na athembi na Alivai, na ũmbano w’onthe ũla waumie nthĩnĩ wa Isilaeli, na ekali ma ũeninĩ ala maumie nthĩ ya Isilaeli, na ala matwĩe Yuta, matana.

26Kwondũ wa ũu kwaĩ ũtanu mwingĩ Yelusaleme; nũndũ kuma ĩvinda ya Solomoni mwana wa Ndaviti mũsumbĩ wa Isilaeli kũtyaaĩthĩwa ũndũ ta ũsu Yelusaleme.

27Nĩvo ĩndĩ athembi Alivai maũngamie na maathima andũ: na wasya woo weew’ĩka, na kũvoya kwoo kwambata kũvika ũtũonĩ wake mũtheu, o kũvika ĩtunĩ.

← Chapter 29 Jump to: Chapter 31 →