Joshua 10

Kamba (Mbivilia) 1956

← Chapter 9 Jump to: Chapter 11 →

1Na ĩndĩ kweethĩwa, yĩla Atoninzeteki mũsumbĩ wa Yelusaleme wewie ũndũ Yosua wakwatie Ai, na ũndũ wamyanangie vyũ (o tondũ wekĩte Yeliko na mũsumbĩ wayo, o ta ũu nĩwekĩte Ai na mũsumbĩ wayo), na ũndũ ala matwĩe Ngiveoni maseũvĩtye mũuo na Isilaeli, na meethĩwa katĩ woo;

2makĩa mũno, nũndũ Ngiveoni yaĩ ndũa nene, o ta ndũa ĩmwe ya kĩũsumbĩ, na nĩkwĩthĩwa yaĩ nene kwĩ Ai, na andũ onthe mayo maĩ ngũmbaũ.

3Kwondũ wa ũu Atoninzeteki mũsumbĩ wa Yelusaleme atũmana Oamu mũsumbĩ wa Eviloni, na Vikamu mũsumbĩ wa Yalimuthi, na Yavia mũsumbĩ wa Lakisi, na Ndevili mũsumbĩ wa Ekeloni, akĩmea,

4Ambatai kwakwa, mũndethye, na tũkũnei Ngiveoni; nũndũ nĩseũvĩtye mũuo na Yosua na ana ma Isilaeli.

5Kwondũ wa ũu asumbĩ asu atano ma Aamoli, mũsumbĩ wa Yelusaleme, na mũsumbĩ wa Eviloni, na mũsumbĩ wa Yalimuthi, na mũsumbĩ wa Lakisi, na mũsumbĩ wa Ekeloni, meeyũmban’ya vamwe, na mambata, mo na nguthu syoo syonthe, na mamba maeema mataũĩĩe Ngiveoni, na makwatya kaũ nayo.

6Na andũ ma Ngiveoni matũmana Yosua mwakonĩ wa maeema Ngilikali, makĩmwĩa, Kw’oko kwaku kũtikethĩwe na kĩkono kũla kwĩ athũkũmi maku; ambata mĩtũkĩ kwitũ, ũtũtangĩĩe, na kũtũtethya: nũndũ asumbĩ onthe ma Aamoli ala matwĩe nthĩ yĩ iĩma nĩmatũmbanĩe.

7Kwondũ wa ũu Yosua ambata kuma Ngilikali, we, na andũ onthe ma kaũ vamwe nake, na ngũmbaũ nene syonthe.

8Na Yeova amwĩa Yosua, Ndũkamakĩe: nũndũ nĩnĩmanenganĩte mokonĩ maku; kũtikaũngama mũndũ wamo mbee waku.

9Na kwondũ wa ũu Yosua amakuthũkĩa na kĩthũlũmũko; nũndũ ambatie kuma Ngilikali ũtukũ w’onthe.

10Na Yeova amathokoan’ya mbee wa Isilaeli, na amoaĩa na ũai mũnene ku Ngiveoni, na amalũngya na nzĩa ya kyambato kya Mbethi‐oloni, na amakũnĩa kũvika Aseka, na kũvika Maketa.

11Na kweethĩwa, makĩkũka mbee wa Isilaeli, me kĩtheeonĩ kya Mbethi‐oloni, Yeova amekya mavia manene kuma ĩtunĩ kũvika Aseka, na makw’a: ala makwie na mbua ya mavia maĩ aingĩ kwĩ ala ana ma Isilaeli mooaie na ũvyũ.

12Nĩvo ĩndĩ Yosua waneenie na Yeova mũthenya ũla Yeova wanenganie Aamoli kũla kwĩ ana ma Isilaeli; na asya Isilaeli mene, Syũa, ũngama ki ĩũlũ wa Ngiveoni; Naku, Mwei, mwandanĩ wa Aiyaloni.

13Nayo syũa yaũngama ki, na mwei weeteela Mũvaka ĩla mbaĩ yeeĩvanĩsya amaithanĩ mayo. Ũu ti mũandĩke ĩvukunĩ ya Yasali? Na syũa yaũngama ĩtunĩ katĩ, na yĩtyaaĩkalaata kũthũa ta ĩvinda ya mũthenya mũima.

14Na kũtyaĩ mũthenya ta ũsu mbee waw’o kana ĩtina waw’o, ũndũ Yeova wethukĩĩsye wasya wa mũndũ: nĩkwĩthĩwa Yeova nĩwamokitĩie Isilaeli.

15Na Yosua asyoka, we na Isilaeli onthe vamwe nake, mwakonĩ wa maeema Ngilikali.

16Na asumbĩ asu atano makũka, na meevitha ngunganĩ ku Maketa.

17Na Yosua atavw’a, kũkyaw’a, Asumbĩ asu atano nĩ oneku, mevithĩte ĩla ngunganĩ ku Maketa.

18Na Yosua asya, Vingilitĩĩlyai mavia manene mũomonĩ wa ngunga, na mũkia andũ vakuvĩ nayo mamasũvĩe:

19ĩndĩ inyw’ĩ mũtikaũngame; atĩĩai amaitha menyu, na mũimakũna ala me ĩtina; mũtikamaeke malike ndũanĩ syoo: nũndũ Yeova Ngai wenyu nũmanenganĩte mokonĩ menyu.

20Na kweethĩwa, yĩla Yosua na ana ma Isilaeli maĩ manamina kũmoaa na ũai mũnene mũno, mũvaka mamamina, na ũtialo ũla watialile wamo waĩ ũnalika ila ndũanĩ mbiie,

21andũ onthe masyoka mwakonĩ wa maeema kwa Yosua ku Maketa me na mũuo: kũtyaĩ ũmwe waaũkĩlya ũĩmĩ ĩũlũ wa ana ma Isilaeli o na ũmwe.

22Nĩvo ĩndĩ Yosua waisye, Vingũai mũomo wa ngunga, na mũinũmaalĩĩlya asumbĩ asu atano ngunganĩ.

23Na meeka ũu, na mamumaalĩĩlya asumbĩ asu atano ngunganĩ, ũla mũsumbĩ wa Yelusaleme, na mũsumbĩ wa Eviloni, na mũsumbĩ wa Yalimuthi, na mũsumbĩ wa Lakisi, na mũsumbĩ wa Ekeloni.

24Na kweethĩwa, yĩla mamumaalĩĩlye Yosua asumbĩ asu, Yosua atũmana andũ onthe ma Isilaeli, na amea anene ma andũ ma kaũ ala maendie nake, Thengeeai, mũkinyĩthye maũũ menyu ngingonĩ sya asumbĩ aa. Na mathengeea, na makinyĩthya maũũ moo ngingonĩ syoo.

25Na Yosua amea, Mũikakĩe, o na kũteva; ĩthĩwai na vinya na ũkũmbaũ mũnene: nũndũ ũũ nĩw’o Yeova wĩmeka amaitha menyu onthe ala mũũkita namo.

26Na ĩtina Yosua amakũna, na amoaa, na kũmasũsya mĩtĩnĩ ĩtano: na masũa ĩla mĩtĩnĩ kũvika wĩoo.

27Na kweethĩwa ĩvinda ya syũa yĩkĩthũa, Yosua aumya mwĩao, na mamaumya mĩtĩnĩ, na mamekya ngunganĩ ĩla meevithĩte, na maia mavia manene mũomonĩ wa ngunga, kũvika mũthenya ũũ wa ũmũnthĩ.

28Na Yosua akwata Maketa mũthenya ũsu, na amĩkũna kwa kũmĩtemanga na ũvyũ, na mũsumbĩ wayo: amananga vyũ na andũ onthe ala maĩ nthĩnĩ wayo; ndaatialya o na ũmwe; na amwĩka mũsumbĩ wa Maketa o tondũ waĩ anamwĩka mũsumbĩ wa Yeliko.

29Na Yosua avĩta kuma Maketa, e na Isilaeli onthe, kũvika Livina, na mokita na Livina:

30nayo Yeova amĩnengane, na mũsumbĩ wayo, kw’okonĩ kwa Isilaeli; na amĩkũna kwa kũmĩtemanga na ũvyũ, na andũ onthe ala maĩ nthĩnĩ wayo; ndaatialya o na ũmwe vo; na amwĩka mũsumbĩ wayo o tondũ waĩ anamwĩka mũsumbĩ wa Yeliko.

31Na Yosua avĩta kuma Livina, e na Isilaeli onthe, kũvika Lakisi, na mamba maeema mamĩtaũĩĩe, na mokita nayo:

32na Yeova amĩnengane Lakisi kw’okonĩ kwa Isilaeli; na amĩkwata ũnĩ ũsu, na amĩkũna kwa kũmĩtemanga na ũvyũ, na andũ onthe ala maĩ nthĩnĩ wayo, kwĩanana na w’onthe ũla waĩ aneeka Livina.

33Nĩvo ĩndĩ Olamu mũsumbĩ wa Ngeseli wambatie amĩtethye Lakisi; na Yosua amũkũna na andũ make, mũvaka ndaamũtialya o na ũmwe.

34Na Yosua avĩta kuma Lakisi, e na Isilaeli onthe, kũvika Ekeloni; na mamba maeema maĩtaũĩĩe, na mokita nayo;

35na mamĩkwata mũthenya ũsu, na mamĩkũna kwa kũmĩtemanga na ũvyũ; na andũ onthe ala maĩ nthĩnĩ wayo aananga vyũ mũthenya ũsu, kwĩanana na w’onthe ũla waĩ aneeka Lakisi.

36Na Yosua ambata kuma Ekeloni, e na Isilaeli onthe, kũvika Eviloni; na mokita nayo:

37na mamĩkwata, na mamĩkũna kwa kũmĩtemanga na ũvyũ, na mũsumbĩ wayo, na ndũa syonthe syayo, na andũ onthe ala maĩ nthĩnĩ wayo; ndaatĩalya o na ũmwe, kwĩanana na w’onthe ũla waĩ aneeka Ekeloni; ĩndĩ amyananga vyũ, na andũ onthe ala maĩ nthĩnĩ wayo.

38Na Yosua asyoka, e na Isilaeli onthe, kũvika Ndevili, na mokita nayo;

39na amĩkwata, na mũsumbĩ wayo na ndũa syonthe syayo; na mamakũna kwa kũmatemanga na ũvyũ, na mooaa vyũ andũ onthe ala maĩ nthĩnĩ wayo; ndaatĩalya o na ũmwe: o tondũ waĩ aneeka Eviloni, o ta ũu eekie Ndevili, na mũsumbĩ wayo; o na tondũ waĩ aneeka Livina nayo, na mũsumbĩ wayo.

40O ta ũu Yosua akũna nthĩ yonthe, nthĩ yĩ iĩma, na nthĩ yĩ Ĩtheo, na nthĩ ndindimalu, na ivaũũko, na asumbĩ onthe masyo: ndaatialya o na ũmwe, ĩndĩ aananga vyũ onthe ala mavevaa, o tondũ Yeova, Ngai wa Isilaeli, weaie.

41Na Yosua amakũna kuma Katesi‐mbalinea o kũvika Ngasa, na nthĩ yonthe ya Ngoseni, o kũvika Ngiveoni.

42Na asumbĩ asu onthe na nthĩ syoo Yosua akwata ĩvinda yĩmwe, nĩkwĩthĩwa Yeova, Ngai wa Isilaeli, okitĩaa Isilaeli.

43Na Yosua asyoka mwakonĩ wa maeema Ngilikali, e na Isilaeli onthe.

← Chapter 9 Jump to: Chapter 11 →