Joshua 16

Kamba (Mbivilia) 1956

← Chapter 15 Jump to: Chapter 17 →

1Na mũlimano wambĩlĩla wa ana ma Yosevu kuma Yolotani ku Yeliko, manzĩnĩ ma Yeliko ngalĩ ya wumĩlonĩ wa syũa, o weũnĩ, ũkyambata kuma Yeliko kũvĩtĩla nthĩ yĩ iĩma kũvika Mbethi‐eli:

2na wauma Mbethi‐eli wavika Lusu, na waendeea kũvika mũvaka wa Aaliiki ku Atalothi;

3na watheea kwelekela ngalĩ ya ũthũĩlonĩ wa syũa kũvika mũvaka wa Ayavileti, kũvika mũvaka wa Mbethi‐oloni ĩla yĩ ĩtheo, o kũvika Ngeseli, na umalĩlo waw’o waĩ ũkanganĩ.

4Na ana ma Yosevu, Manase na Evalaimu, moosa ũtiĩwa woo.

5Na mũvaka wa ana ma Evalaimu kwĩanana na mĩvĩa yoo wailyĩ ũũ: mũvaka wa ũtiĩwa woo kwelekela ngalĩ ya wumĩlonĩ wa syũa waĩ Atalothi‐atali kũvika Mbethi‐oloni ĩla yĩ ĩũlũ;

6na mũvaka waumĩla kwelekela ngalĩ ya ũthũĩlonĩ wa syũa ku Mikimetha ngalĩ ya ĩũlũ; na mũvaka weelingĩla kwelekela ngalĩ ya wumĩlonĩ wa syũa kũvika Taanathi‐silo, na wavĩtĩla ũtee wayo ngalĩ ya wumĩlonĩ wa syũa ya Yanoa;

7na watheea kũma Yanoa kũvika Atalothi, na kũvika Naala, na wavika Yeliko, na waumĩlĩla Yolotani.

8Kuma Tavua mũvaka waendeea kwelekela ngalĩ ya ũthũĩlonĩ wa syũa kũvika kalũsĩ ka Kana; na umalĩlo waw’o waĩ ũkanganĩ. Ũsu nĩw’o ũtiĩwa wa mbaĩ ya ana ma Evalaimu kũatĩĩa mĩvĩa yoo;

9vamwe na ndũa ila ivathĩtwe kwondũ wa ana ma Evalaimu katĩ wa ũtiĩwa wa ana ma Manase, ndũa syonthe na mĩsyĩ yasyo.

10Na matyaalũngya Akanaani ala matwĩe Ngelesi: ĩndĩ Akanaani matũaa katĩ wa Evalaimu kũvika ũmũnthĩ, na matw’ĩkĩte athũkũmi ma ũtethethaw’a wĩa wa vinya.

← Chapter 15 Jump to: Chapter 17 →