Joshua 20

Kamba (Mbivilia) 1956

← Chapter 19 Jump to: Chapter 21 →

1Na Yeova aneena na Yosua, akĩmwĩa,

2Neena na ana ma Isilaeli, ũkĩmea, Ĩyiĩei ndũa sya kwĩvitha ila naneenie nenyu ũndũ wasyo na kanyw’a wa Mose,

3nĩ kana mũndũ ũla ũkoaa mũndũ o na wĩva na mbanga na atesĩ akĩĩe vo: na ikeethĩawa kwenyu kwondũ wa kũmwĩvitha mũĩvanĩsya wa nthakame.

4Nake akakĩĩa ndũa ĩmwe ya isu, na akaũngama ũlikĩlonĩ mbingĩlonĩ ya ndũa, na kũtavan’ya ũvoo wake matũnĩ ma atumĩa ma ndũa ĩsu; nao makamwosa nthĩnĩ wa ndũa vala maĩ, na kũmũnenga vandũ, nĩ kana ekalae katĩ woo.

5Na ethĩwa mũĩvanĩsya wa nthakame akamũatĩĩa, matikamũnengane ũla wũaĩte mũndũ kw’okonĩ kwake; nĩkwĩthĩwa nĩwoaie mũtũi wake atesĩ, na ndatwĩe e ũthũ nake.

6Nake akekalaa ndũanĩ ĩsu, kũvika o yĩla ũkaũngama mbee wa ũmbano asilĩlwe, kũvika yĩla ũla ũkethĩwa mũthembi mũnene mĩthenya ĩsu ũkakw’a: nĩvo ĩndĩ ũla woaie mũndũ akasyoka na kũvika ndũa yake mwene, na nyũmba yake mwene, kũvika ndũa ĩla waumie yĩla wakĩie.

7Na mavatha Ketesi ĩla yĩ Ngalilii yĩ nthĩ yĩ iĩma ya Navitali, na Sekemu yĩ nthĩ yĩ iĩma ya Evalaimu, na Kiliathi‐aliva (nayo nĩ Eviloni) yĩ nthĩ yĩ iĩma ya Yuta.

8Na mũingo wa Yolotani ku Yeliko kwelekela ngalĩ ya wumĩlonĩ wa syũa, mavatha Mbeseli ĩla yĩ weũnĩ ũiĩnĩ kuma mbaĩnĩ ya Leuveni, na Lamothi yĩ Ngileati kuma mbaĩnĩ ya Ngati, na Ngolani yĩ Mbasani kuma mbaĩnĩ ya Manase.

9Isu syaĩ ndũa ivathĩtwe kwondũ wa ana onthe ma Isilaeli, na kwondũ wa mũeni ũla wĩkalaa ũeni katĩ woo, nĩ kana o ũla ũkoaa mũndũ o na wĩva na mbanga nũtonya kũkĩĩa vo, ndakoawe nĩ kw’oko kwa mũĩvanĩsya wa nthakame, atanamba kũũngama mbee wa ũmbano.

← Chapter 19 Jump to: Chapter 21 →