Joshua 22

Kamba (Mbivilia) 1956

← Chapter 21 Jump to: Chapter 23 →

1Na ĩndĩ Yosua ameta Aleuveni na Angati, na nyunzu ya mbaĩ ya Manase,

2na amea, Nĩmũsũvĩĩte w’onthe ũla Mose mũthũkũmi wa Yeova wamwĩaĩe, na mweethukĩĩsya wasya wakwa ũndũnĩ w’onthe ũla namwĩaĩe:

3mũtyaamatia ana‐a‐ĩthe menyu mĩthenya ĩsu mingĩ kũvika ũmũnthĩ, ĩndĩ nĩmũsũvĩĩte wĩaĩo wa mwĩao wa Yeova Ngai wenyu.

4Na yu Yeova Ngai wenyu nũnengete ana‐a‐ĩthe menyu ũthũmũo, o tondũ waneenie nao; kwondũ wa ũu yu ĩthyũũei, na mũienda maeemanĩ menyu, kũvika nthĩ ĩla ya ng’ũndũ yenyu, ĩla Mose mũthũkũmi wa Yeova wamũnengie mũingo wa Yolotani.

5Ĩsũvĩei mũno mwĩkae ũtw’ĩo na mĩao ĩla Mose mũthũkũmi wa Yeova wamwĩaĩe, mwende Yeova Ngai wenyu, na kũenda nzĩanĩ syake syonthe, na kũkwata mĩao yake, na kũlũman’ya nake, na kũmũthũkũma na ngoo syenyu syonthe na thayũ wenyu w’onthe.

6Na ĩndĩ Yosua amaathima, na amaeka maende; na mathi maeemanĩ moo.

7Na ĩndĩ Mose aĩ ananenga nyunzu ya mbaĩ ya Manase ũtiĩwa ku Mbasani; ĩndĩ nyunzu ĩla ĩngĩ Yosua amanenga katĩ wa ana‐a‐ĩthe moo mũingo wa Yolotani kwelekela ũthũĩlonĩ wa syũa. O na ĩngĩ yĩla Yosua wamaekie mathi maeemanĩ moo, amaathima,

8na aneena nao, akĩmea, Syokai mwĩ na ũthwii mwingĩ maeemanĩ menyu, na mwĩ na indo nyingĩ, na vetha, na thaavu, na ũthuku, na kĩaa, na ngũa nyingĩ mũno: aan’yai mũtavo wa amaitha menyu na ana‐a‐ĩthe menyu.

9Na ana ma Leuveni na ana ma Ngati na nyunzu ya mbaĩ ya Manase masyoka, na mauma vala vaĩ ana ma Isilaeli kuma Silo, ĩla yĩ nthĩ ya Kanaani, maende nthĩ ya Ngileati, kũvika nthĩ ya ng’ũndũ yoo, ĩla manengiwe yĩthĩwe ng’ũndũ yoo, kwĩanana na mwĩao wa Yeova na kanyw’a wa Mose.

10Na yĩla mavikie nthĩ ĩla yĩ ũtee wa Yolotani, ũla wĩ nthĩ ya Kanaani, ana ma Leuveni na ana ma Ngati na nyunzu ya mbaĩ ya Manase maaka kĩthembeo kw’o ũtee wa Yolotani, kĩthembeo kĩnene kya kũsiw’a.

11Na ana ma Isilaeli meew’a kũkyaw’a, Sisyai, ana ma Leuveni na ana ma Ngati na nyunzu ya mbaĩ ya Manase nĩmakĩte kĩthembeo kwelekela nthĩ ya Kanaani, nthĩ ĩla yĩ vakuvi na Yolotani, ngalĩ ĩla ya ana ma Isilaeli.

12Na yĩla ana ma Isilaeli meewie ũu, ũmbano w’onthe wa ana ma Isilaeli moombana vamwe ku Silo, mambate mokite nao.

13Na ana ma Isilaeli matũma kwa ana ma Leuveni, na ana ma Ngati, na nyunzu ya mbaĩ ya Manase, ku nthĩ ya Ngileati, Vineasi mwana wa mũthembi Eleasali,

14na vamwe nake anene ĩkũmi, mũnene ũmwe wa nyũmba ya aaĩthe kwondũ wa kĩla mbaĩ ya Isilaeli; na kĩla ũmwe woo aĩ mũtongoi wa nyũmba sya aaĩthe katĩ wa ngili sya Isilaeli.

15Na mamokĩa ana ma Leuveni, na ana ma Ngati, na nyunzu ya mbaĩ ya Manase, kũvika nthĩ ya Ngileati, na maneena nao, makĩmea,

16Ũũ nĩw’o ũmbano w’onthe wa Yeova ũkwasya, Yĩĩ nĩ ĩvĩtyo yaũ yĩla mũmũvĩtanĩsye Ngai wa Isilaeli, mweethyũũa ũmũnthĩ mũeke kũmũvikĩla Yeova, ũndũ mwakĩte kĩthembeo, mũmũng’endee Yeova ũmũnthĩ?

17Naĩ ya Veoli no nini kwĩtũ, ĩla tũtaaĩthesya kwayo kũvika ũmũnthĩ, o na kau nĩkwookie ũthĩn’yo ũmbanonĩ wa Yeova,

18no mũvaka mwĩthyũũe ũmũnthĩ mũeke kũmũvikĩla Yeova? Na kũkeethĩwa atĩĩ, nũndũ ũmũnthĩ nĩmũũmũng’endea Yeova, ũnĩ akathatĩa ũmbano w’onthe wa Isilaeli,

19Ĩndĩ, ethĩwa nthĩ ĩla ya ng’ũndũ yenyu ti ntheu, ingai ĩndĩ kũvika nthĩ ĩla ya ng’ũndũ ya Yeova, vala wĩkalo wa Yeova wĩkalaa, na mũimĩmesya mwĩkale katĩ waitũ: ĩndĩ mũtikamũng’endee Yeova, o na mũtikatũng’endee ithyĩ, nũndũ wa kwaka kĩthembeo eka kĩthembeo kya kĩthembeo kya Yeova Ngai waitũ.

20Akani mwana wa Nzela ndaavĩtya kwondũ wa kwosa kĩndũ kĩla kĩvathĩtwe, na ũthatu wa Yeova wavalũkĩla ũmbano w’onthe wa Isilaeli? Na mũndũ ũsu ndaaa e weka naĩnĩ yake.

21Nĩvo ĩndĩ ana ma Leuveni na ana ma Ngati na nyunzu ya mbaĩ ya Manase masũngĩie, na maneena na atongoi ma ngili sya Isilaeli,

22Ũla Mwene Vinya, Ngai, Yeova, Ũla Mwene Vinya, Ngai, Yeova, nĩwĩsĩ; na Isilaeli nake akamanya: ethĩwa kweekiwe na ũng’endu, kana ũndũ wa kũmũvĩtanĩsya Yeova (ndũkatũtangĩĩe ũmũnthĩ),

23atĩ nĩtwakĩte kĩthembeo twĩthyũũe tũeke kũmũvikĩla Yeova; kana ethĩwa nĩ kya kũthemba nthembo ya kũvĩvw’a kana nthembo ya mũtu ĩũlũ wakyo, kana ethĩwa nĩ kya kũthemba nthembo sya mũuo ĩũlũ wakyo, Yeova e mwene aandũe;

24na ethĩwa tũtyaaika ũndũ ũũ ũndũ wa kũsũvĩa, na ũndũ wa kĩtumĩ, tũkyasya, Ĩvinda yĩla yũkĩte syana syenyu itonya kũneena na syana sitũ, ikĩsyĩa, Inyw’ĩ mwĩ na ũndũ mwaũ na Yeova, Ngai wa Isilaeli?

25Nũndũ Yeova nũtw’ĩĩte Yolotani mũvaka katĩ waitũ nenyu, inyw’ĩ ana ma Leuveni na ana ma Ngati; inyw’ĩ mũti na kĩanda nthĩnĩ wa Yeova: o ta ũu syana syenyu nitonya kũtuma syana sitũ ieka kũkĩa Yeova.

26Kwondũ wa ũu twasya, Twĩyũmban’yei yu twĩyakĩe kĩthembeo, ti kwondũ wa nthembo ya kũvĩvw’a, o na nthembo ya kũtonywa:

27ĩndĩ kĩkeethĩwa ũkũsĩ katĩ waitũ nenyu, na katĩ wa nzyawa sitũ ĩtina waitũ, nĩ kana twĩke ũthũkũmi wa Yeova mbee wake na nthembo sitũ sya kũvĩvw’a, na nthembo sitũ sya kũtonywa, na nthembo sitũ sya mũuo; nĩ kana syana syenyu itikaatonye kũtavya syana sitũ ĩvinda yĩla yũkĩte, Mũti na kĩanda nthĩnĩ wa Yeova.

28Kwondũ wa ũu twasya, Kũkeethĩwa, yĩla metũtavya ta ũu ithyĩ kana nzyawa sitũ ĩvinda yĩla yũkĩte, ithyĩ tũkasya, Sisyai, ngelekan’yo ya kĩthembeo kya Yeova, kĩla aaĩthe maitũ maseũvisye, ti kwondũ wa nthembo sya kũvĩvw’a, kana nthembo sya kũtonywa; ĩndĩ nĩ ũkũsĩ katĩ waitũ nenyu.

29Nĩkwĩthĩwe kũasa naitũ kũmũng’endea Yeova, na kwĩthyũũa ũmũnthĩ tũeke kũmũvikĩla Yeova, twake kĩthembeo kĩthĩwe kya kũthemba nthembo ya kũvĩvw’a, kana nthembo ya mũtu, kana nthembo sya kũtonywa; ate o kĩthembeo kya Yeova Ngai waitũ kĩla kĩ mbee wa wĩkalo wake.

30Na yĩla mũthembi Vineasi, na anene ma ũmbano, o atongoi ma ngili sya Isilaeli ala maĩ nake, meewie ndeto ila ana ma Leuveni na ana ma Ngati na ana ma Manase maneenie, mendeew’a mũno.

31Na Vineasi mwana wa mũthembi Eleasali amea ana ma Leuveni, na ana ma Ngati, na ana ma Manase, Ũmũnthĩ nĩtũũmanya Yeova e katĩ waitũ, nũndũ mũtyaamũvĩtanĩsya Yeova.

32Na Vineasi mwana wa mũthembi Eleasali, na ala anene, masyoka kuma vala vaĩ ana ma Leuveni, na ana ma Ngati, kuma nthĩ ya Ngileati, kũvika nthĩ ya Kanaani, vala ve ana ma Isilaeli, na mamatũngĩa ũvoo.

33Na ũndũ ũsu wendeesya ana ma Isilaeli; na ana ma Isilaeli mamũtaĩa Ngai, na matyaaneena ĩngĩ ũvoo wa kwambata mokite nao, manange nthĩ vala ana ma Leuveni na ana ma Ngati matũaa.

34Na ana ma Leuveni na ana ma Ngati makĩta kĩthembeo kyu Eti: masya, Nũndũ nĩ ũkũsĩ katĩ waitũ atĩ Yeova nĩwe Ngai.

← Chapter 21 Jump to: Chapter 23 →