Joshua 11

Kamba (Mbivilia) 1956

← Chapter 10 Jump to: Chapter 12 →

1Na kweethĩwa, yĩla Yavini mũsumbĩ wa Asoli wewie ũndũ ũsu, atũmana Yovavu mũsumbĩ wa Matoni, na mũsumbĩ wa Similoni, na mũsumbĩ wa Akisavu,

2na asumbĩ ala maĩ ngalĩ ya ĩũlũ, nthĩ yĩ iĩma, na Alava ngalĩ ya ĩtheo wa Kinelethi, na nthĩ ndindimalu, na motũlunĩ ma Ndoli ngalĩ ya ũthũĩlonĩ wa syũa,

3kwa Mũkanaani ngalĩ ya wumĩlonĩ wa syũa na ngalĩ ya ũthũĩlonĩ wa syũa, na kwa Mũamoli, na kwa Mũititi, na kwa Mũvelisi, na kwa Mũyevusi nthĩ yĩ iĩma, na kwa Mũivi ũla wĩ ĩtheo wa Elimoni nthĩ ya Misiva.

4Na maumaala, mo na nguthu, syoo syonthe vamwe nao, andũ aingĩ, o ta kĩthangathĩ kĩla kĩ ũtee wa ũkanga ũndũ wa kwingĩva, me na mbalasi na ngalĩ nyingĩ nũno sya kaũ.

5Na asumbĩ asu onthe makomana; na mavika na mamba maeema vamwe ũtee wa manzĩ ma Melomu, mokite na Isilaeli.

6Na Yeova amwĩa Yosua, Ndũkakĩe nũndũ woo; nũndũ ũnĩ ta ĩvinda yĩĩ ngamanengane onthe me oae kũla kwĩ Isilaeli: nĩwĩtilanga mbalasi syoo mĩlangũ, na kũvĩvya makasya moo na mwaki.

7Na ĩndĩ Yosua, e na andũ onthe ma kaũ, mamakitya ũtee wa manzĩ ma Melomu na kĩthũlũmũko, na mamavithũkĩa.

8Na Yeova amanengane kw’okonĩ kwa Isilaeli, na mamakũna na mamalũngya kũvika Sitoni ĩla nene, na kũvika Misilevothi‐maimu, na kũvika mwandanĩ wa Misiva kwelekela ngalĩ ya wumĩlonĩ wa syũa; na mamakũna, mũvaka matyaatialya o na ũmwe.

9Na Yosua ameka o tondũ Yeova wamwĩie: atilanga mbalasi syoo mĩlangũ, na avĩvya makasya moo na mwaki.

10Na Yosua ĩvinda yĩu asyoka, na akwata Asoli, na amũtema mũsumbĩ wayo na ũvyũ: nũndũ tene Asoli yaĩ ndũa nene ya mosumbĩ asu onthe.

11Na makũna andũ onthe ala maĩ nthĩnĩ wayo kwa kũmatemanga na ũvyũ, na kũmina vyũ; kũtyaĩ ũmwe waatiwa aiveva: na avĩvya Asoli na mwaki.

12Na ndũa syonthe sya asumbĩ asu, na asumbĩ onthe masyo, Yosua akwata, na amakũna kwa kũmatemanga na ũvyũ, na amananga vyũ; o tondũ Mose mũthũkũmi wa Yeova weaie.

13Ĩndĩ ũndũ wa ndũa ila syatiĩtwe syĩ nũmũ ũtũlunĩ wasyo, Isilaeli matyaaivĩvya o na ĩmwe, ate o Asoli yoka; nĩyo Yosua wavĩvisye.

14Na mũtavo w’onthe wa ndũa isu, o na ĩndo, ana ma Isilaeli meeyosea itw’ĩke mũtavo; ĩndĩ kĩla mũndũ nĩmamũkũnie kwa kũmũtemanga na ũvyũ, mũvaka mamamina, o na matyaatialya o na ũmwe aiveva.

15O tondũ Yeova wamwĩaĩe Mose mũthũkũmi wake, now’o Mose weaĩe Yosua; na now’o Yosua wekie; ndaatialya ũndũ ũtekĩtwe wa w’onthe ũla Yeova weaĩe Mose.

16O ta ũu Yosua akwata nthĩ ĩsu yonthe, nthĩ yĩ iĩma, na nthĩ yonthe ya ngalĩ ya Ĩtheo, na nthĩ yonthe ya Ngoseni, na nthĩ ndindimalu, na Alava, na nthĩ ya Isilaeli yĩ iĩma, na nthĩ ndindimalu yayo;

17kuma kĩĩma kya Alaki, kĩla kĩtambũũkĩte kũvika Seili, o kũvika Mbaali‐ngati mwandanĩ wa Levanoni itheo wa kĩĩma kya Elimoni: na akwata asumbĩ masyo onthe, na amakũna, na amoaa.

18Yosua okita ĩvinda ĩasa na asumbĩ asu onthe.

19Kũtyaĩ ndũa ĩla yaseũvisye mũuo na ana ma Isilaeli, ate o Aivi ala matwĩe Ngiveoni: ila ingĩ syonthe makwatie na kaũ.

20Nũndũ kwaĩ ũndũ wa Yeova kũmya ngoo syoo, mokite na Isilaeli, nĩ kana amamine vyũ, matikew’ĩwe ĩnee, ĩndĩ nĩ kana amamine, o tondũ Yeova wamwĩaĩe Mose.

21Na Yosua athi ĩvinda yĩu, na amaveta Aanaki nthĩ yĩ iĩma, kuma ku Eviloni, na Ndevili, na Anavu, na nthĩ yonthe ya Yuta yĩ iĩma, na nthĩ yonthe ya Isilaeli yĩ iĩma: Yosua amamina vyũ vamwe na ndũa syoo.

22Kũtyaĩ ũmwe wa Aanaki waatiala nthĩ ya ana ma Isilaeli: ate o amwe matialile Ngasa, na Ngathi, na Asitoti.

23O ta ũu Yosua akwata nthĩ yonthe, kwĩanana na w’onthe ũla Yeova watavisye Mose; na Yosua amĩnengane kwa Isilaeli yĩthĩwe ũtiĩwa kwĩanana na ũaan’yo woo wa mbaĩ. Na nthĩ yathũmũĩa kaũ.

← Chapter 10 Jump to: Chapter 12 →