Joshua 23

Kamba (Mbivilia) 1956

← Chapter 22 Jump to: Chapter 24 →

1Na kweethĩwa ĩtina wa mĩthenya mingĩ, yĩla Yeova waĩ ananenga Isilaeli kũthũmũa kuma amaithanĩ moo onthe ma ngalĩ syonthe, na Yosua aĩ mũkũu na wa myaka mingĩ;

2Yosua ameta Isilaeli onthe, atumĩa moo na atongoi moo, na asili moo na anene ma kwoo, na amea, Nyie nĩ mũkũu na wa myaka mingĩ:

3na nĩmwonete ũndũ w’onthe ũla Yeova Ngai wenyu wĩkĩte mbaĩ ii syonthe nũndũ wenyu; nũndũ Yeova Ngai wenyu, nĩwe wamũkitĩe inyw’ĩ.

4Sisyai, nĩnamũaanĩsye kwa kũlimana mbaĩ ii ila syatialile, syĩthĩwe ũtiĩwa kwondũ wa mbaĩ syenyu, kuma Yolotani, vamwe na mbaĩ syonthe ila nĩvetete, o kũvika ũkanga mũnene kwelekela ũthũĩlonĩ wa syũa.

5Na Yeova Ngai wenyu, akaikuthũa mbee wenyu, na kwilũngya iende vala mũtatonya kũsyona, na mũkamĩmesya nthĩ yasyo, o tondũ Yeova Ngai wenyu waneenie nenyu.

6Kwondũ wa ũu ĩthĩwai na ũkũmbaũ mũnene mũsũvĩe na kwĩka w’onthe ũla ũandĩkĩtwe ĩvukunĩ ya mĩao ya Mose, nĩ kana mũtikethyũũe ngalĩ ya kw’oko kwa aũme kana kwa aka mũmĩtie;

7nĩ kana mũtikalike katĩ wa mbaĩ ii, ii ila itialĩte katĩ wenyu; o na mũtikawete syĩtwa ya ngai syasyo, kana kwĩavĩthya nasyo, kana kwithũkũma, kana kũsyĩkunamĩsya;

8ĩndĩ lũman’yai na Yeova Ngai wenyu, o tondũ mweekie kũvika ũmũnthĩ.

9Nũndũ Yeova nũlũngĩtye mbee wenyu mbaĩ nene syĩ vinya: ĩndĩ ũndũ wenyu, vati mũndũ waaũngama mbee wenyu kũvika ũmũnthĩ.

10Mũndũ ũmwe wenyu akalũngya ngili; nũndũ Yeova Ngai nĩwe ũla ũmũkitĩaa, o tondũ waneenie nenyu.

11Ĩsũvĩei nesa ĩndĩ, mũmwende Yeova Ngai wenyu.

12Na ethĩwa nĩmũũsyoka o vanini, na kũlũman’ya na ũtialo wa mbaĩ ii, o ii ila syatiiwe katĩ wenyu, na kũtwaanĩa nasyo, na kũlika kwasyo, nao kũlika kwenyu;

13manyai ki Yeova Ngai wenyu ndakalũngya ĩngĩ mbaĩ ii iende vala mũtatonya kũsyona; ĩndĩ ikeethĩwa mũkwa na kĩtei kwenyu, na mũsalisa mbaunĩ syenyu, na mĩw’a methonĩ menyu, kũvika yĩla mũkaa kuma nthĩ nzeo ĩla Yeova Ngai wenyu ũmũnengete.

14Na, sisyai, ũmũnthĩ nĩngũthi na nzĩa ya nthĩ yonthe: na inyw’ĩ nĩmwĩsĩ ngoonĩ syenyu syonthe na mathayũnĩ menyu onthe, kũtyaalea kwĩanĩw’a ũndũ ũmwe katĩ wa maũndũ onthe maseo ala Yeova Ngai wenyu waneenie ũndũ wenyu; onthe nĩmeanĩw’e kwenyu, kũtyaalea kwĩanĩw’a ũndũ ũmwe katĩ wamo.

15Na kũkeethĩwa, o tondũ maũndũ onthe maseo nĩmokĩte ĩũlũ wenyu ala Yeova Ngai wenyu waneenie nenyu, o ta ũu Yeova akamũetee maũndũ onthe mathuku, kũvika yĩla ũkamwananga kũmumya nthĩ ĩno nzeo ĩla Yeova Ngai wenyu ũmũnengete.

16Yĩla mũkavĩtya ũtianĩo wa Yeova Ngai wenyu, ũla wamwĩaĩe, na mũkaenda na kũthũkũma ngai ingĩ, na kũsyĩkunamĩsya; nĩvo ĩndĩ ũthatu wa Yeova ũkakanw’a ĩũlũ wenyu, na mũkaaa mĩtũkĩ kuma nthĩ nzeo ĩla ũmũnengete.

← Chapter 22 Jump to: Chapter 24 →