Joshua 17

Kamba (Mbivilia) 1956

← Chapter 16 Jump to: Chapter 18 →

1Na ũu nĩw’o mũlimano kwondũ wa mbaĩ ya Manase; nũndũ aĩ ĩkithathi ya Yosevu. Na ũvoo wa Makili ĩkithathi ya Manase, ĩthe wa Ngileati, nĩkwĩthĩwa aĩ mũndũ wa kaũ, kwondũ wa ũu aĩ na nthĩ sya Ngileati na Mbasani.

2Kwondũ wa ũu mũlimano waĩ kwondũ wa ana ala angĩ ma Manase kũatĩĩa mĩvĩa yoo: kwondũ wa ana ma Avieseli, na kwondũ wa ana ma Eleki, na kwondũ wa ana ma Asilieli, na kwondũ wa ana ma Sekemu, na kwondũ wa ana ma Eevieli, na kwondũ wa ana ma Semita: asu maĩ ana aũme ma Manase mwana wa Yosevu kũatĩĩa mĩvĩa yoo.

3Ĩndĩ Nzeloveati, mwana wa Eevieli, mwana wa Ngileati, mwana wa Makili, mwana wa Manase, ndaĩ na ana ma aũme, ate o eĩtu: na aa nĩo masyĩtwa ma eĩtu make: Maala, na Noa, na Okila, na Milika, na Tilisa.

4Na mamũthengeea mũthembi Eleasali, na Yosua mwana wa Nuni, na anene, makyasya, Yeova amwĩaĩa Mose atũnenge ũtiĩwa katĩ wa ana‐a‐asa maitũ: kwondũ wa ũu kwĩanana na mwĩao wa Yeova amanenga ũtiĩwa katĩ wa ana ma ĩthe woo.

5Na ianda ĩkũmi syamũvalũkĩla Manase, eka nthĩ ya Ngileati na Mbasani, ĩla yĩ mũingo wa Yolotani;

6nũndũ eĩtu ma Manase maĩ na ũtiĩwa katĩ wa ana aũme make. Na nthĩ ya Ngileati yaĩ ya ana ala angĩ ma Manase.

7Na mũvaka wa Manase waĩ kuma Aseli kũvika Mikemetha, ĩla yelekele Sekemu, na mũvaka waendeea kwelekela ngalĩ ya kw’oko kwa aũme, kũvika ala matwĩe Eni‐tavua.

8Nthĩ ya Tavua yaĩ ya Manase; ĩndĩ Tavua mũvakanĩ wa Manase yaĩ ya ana ma Evalaimu.

9Na mũvaka watheea kũvika kalũsĩ ka Kana, kwelekela ngalĩ ya ĩtheo ya kalũsĩ: ndũa isu syaĩ sya Evalaimu katĩ wa ndũa sya Manase: na mũvaka wa Manase waĩ ngalĩ ya ĩũlũ ya kalũsĩ, na umalĩlo waw’o waĩ ũkanganĩ:

10kwelekela ngalĩ ya ĩtheo yaĩ ya Evalaimu, na kwelekela ngalĩ ya ĩũlũ yaĩ ya Manase, na ũkanga waĩ mũvaka wake; na mavika Aseli ngalĩ ya ĩũlũ, na Isakali ngalĩ ya wumĩlonĩ wa syũa.

11Na nthĩnĩ wa Isakali na Aseli, Manase aĩ na Mbethi‐seani na tũtũla twayo, na Ivileamu na tũtũla twayo, na ala matwĩe Ndoli na tũtũla twayo, na ala matwĩe Eni‐ndoli na tũtũla twayo, na ala matwĩe Taanaki na tũtũla twayo, na ala matwĩe Mekito na tũtũla twayo, o kũndũ kũtatũ kũtũlu.

12Ĩndĩ ana ma Manase matyaatonya kũlũngya ala matwĩe ndũanĩ isu; ĩndĩ Akanaani meevinyĩlĩlya nthĩ ĩsu.

13Na kweethĩwa, yĩla ana ma Isilaeli mongelekile vinya, mamatethethya Akanaani wĩa wa vinya, na matyaamalũngya vyũ.

14Na ana ma Yosevu maneena na Yosua, makĩmũkũlya, Nũndũ wa kĩ ũnengete mũlimano ũmwe na kĩanda kĩmwe syĩthĩwe ũtiĩwa, nũndũ nyie nĩ mbaĩ nene, nũndũ kũvika yu Yeova nũngathimĩte?

15Na Yosua amea, Ethĩwa wĩ mbaĩ nene, ambata mũtitũnĩ, ũkeyengee kw’o nthĩ ya Mũvelisi na Mũlevai; nũndũ nthĩ yĩ iĩma ya Evalaimu nĩ ntheke kwaku.

16Na ana ma Yosevu masya, Nthĩ yĩ iĩma ndĩtwĩanĩa: na Akanaani onthe ala matwĩe nthĩ ya mwanda me na makasya ma iaa, o ala me Mbethi‐seani na tũtũla twayo, na ala me mwandanĩ wa Yesileeli.

17Na Yosua aneena na nyũmba ya Yosevu, o Evalaimu na Manase, akĩmĩtavya, We wĩ mbaĩ nene, na wĩ na vinya mwingĩ; ndũkethĩwa na mũlimano ũmwe w’oka:

18ĩndĩ nthĩ yĩ iĩma ĩkeethĩwa yaku; nũndũ o na kau nĩ mũtitũ, ũkootemanga, na umalĩlo waw’o ũkeethĩwa waku; nũndũ ũkalũngya Akanaani, o na kau me na makasya ma iaa, o na ethĩwa me na vinya.

← Chapter 16 Jump to: Chapter 18 →