Joshua 18

Kamba (Mbivilia) 1956

← Chapter 17 Jump to: Chapter 19 →

1Na ũmbano w’onthe wa Isilaeli woombana ku Silo, na mamba ĩeema ya kũmbanĩa kw’o: na nthĩ yakĩlw’a vinya mbee woo.

2Na kwatiala katĩ wa ana ma Isilaeli mbaĩ mũonza, ila itambĩte kũaan’ya ũtiĩwa wasyo.

3Na Yosua akũlya ana ma Isilaeli, Mũkeethĩwa mwĩ aleelu ĩvinda yĩana ata ũndũ wa kũlika mũmĩmesye nthĩ, ĩla Yeova, Ngai wa aaĩthe menyu, ũmũnengete?

4Ĩyiĩei andũ atatũ ma kĩla mbaĩ: na ngamatũma, na makyũkĩla, na kũtambũka katĩ wa nthĩ, na kũandĩka ũndũ ũilyĩ ũtiĩwa woo; na makanzyokee.

5Na makamĩaan’ye ianda mũonza: Yuta ĩkekala mũvakanĩ wayo ngalĩ ya ĩtheo, na nyũmba ya Yosevu ĩkekala mũvakanĩ wayo ngalĩ ya ĩũlũ.

6Na mũkaandĩke nthĩ ĩaanĩtw’e ianda mũonza, na kũndetee maandĩko mayo; na ngalimana kwondũ wenyu vaa kũla kwĩ Yeova Ngai waitũ.

7Nũndũ Alivai mati na kĩanda katĩ wenyu; nũndũ ũthembi wa Yeova nĩw’o ũtiĩwa woo: na Ngati na Leuveni na nyunzu ya mbaĩ ya Manase nĩmosete ũtiĩwa woo mũingo wa Yolotani kweleleka ngalĩ ya wumĩlonĩ wa syũa, ũla Mose mũthũkũmi wa Yeova wamanengie.

8Na andũ asu mookĩla na mathi: na Yosua ameaĩa ala maendie kũandĩka nthĩ, akĩmea, Endai mũvĩtĩle katĩ wa nthĩ, na mũmĩandĩke, na mũinzyokea; na ngalimana kwondũ wenyu vaa Silo kũla kwĩ Yeova.

9Na andũ mathi na mavĩtĩla katĩ wa nthĩ, na mamĩandĩka ndũa syayo ianda mũonza ĩvukunĩ; na mamũsyokea Yosua mwakonĩ wa maeema ku Silo.

10Na Yosua alimana kwondũ woo ku Silo kũla kwĩ Yeova; na kw’o Yosua amaaan’ya ana ma Isilaeli nthĩ kwĩanana na ũndũ maaanĩtye.

11Na mũlimano wa mbaĩ ya ana ma Mbenyamini waumĩla kũatĩĩa mĩvĩa yoo: na mũvaka wa mũlimano woo waumĩla katĩ wa ana ma Yuta na ana ma Yosevu.

12Na mũvaka woo wa ngalĩ ya ĩũlũ waĩ kuma Yolotani; na mũvaka wambata ũtee wa Yeliko ngalĩ ya ĩũlũ, na wambata wavĩta katĩ wa nthĩ yĩ iĩma kwelekela ũthũĩloni wa syũa; na umalĩlo waw’o waĩ weũnĩ wa Mbethi‐aveni.

13Na mũvaka waendeea kuma vau kũvika Lusu, ũtee wa Lusu (nayo nĩ Mbethi‐eli), kwelekela ngalĩ ya ĩtheo; na mũvaka watheea kũvika Atalothi‐atali, vakuvĩ na kĩĩma kĩla kĩ ngalĩ ya ĩtheo ya Mbethi‐oloni ĩla yĩ ĩtheo.

14Na mũvaka waendeea kuma vau, na weelingĩla kĩlungunĩ kya ngalĩ ya wumĩlonĩ wa syũa kwelekela ngalĩ ya ĩtheo, kuma kĩĩma kĩla kĩthengeee Mbethi‐oloni kwelekela ngalĩ ya ĩtheo, umalĩlo waw’o waĩ Kiliathi‐mbaali (nayo nĩ Kiliathi‐yealimu), ndũa ya ana ma Yuta: nĩyo kĩlungu kya ngalĩ ya ũthũĩlonĩ wa syũa.

15Na kĩlungu kya ngalĩ ya ĩtheo kyaĩ kuma mũthelelo wa Kiliathi‐yealimu; na mũvaka waumĩla kwelekela ngalĩ ya ũthũĩlonĩ wa syũa, na waumĩla wavika nthongonĩ ya manzĩ ma Nevitoa;

16na mũvaka watheea kũvika mũthelelo wa kĩĩma kĩla kyelekele kyanda kya mwana wa Inomu, kĩla kĩ mwandanĩ wa Alevai kwelekela ngalĩ ya ĩũlũ; na watheea kũvika kyanda kya Inomu, ũtee wa Mũyevusi kwelekela ngalĩ ya ĩtheo, na watheea wavika Eni‐lokeli;

17na waendeea kwelekela ngalĩ ya ĩũlũ, na waumĩla ku Eni‐semesi, na waendeea kũvika Ngelilothi, ĩla yelekele kyambato kya Atumimu; na watheea wavika ĩvia ya Mboani mwana wa Leuveni;

18na wavĩtĩla ũtee kwelekela Alava kwelekela ngalĩ ya ĩũlũ, na watheea kũvika Alava;

19na mũvaka waendeea kũvika ũtee wa Mbethi‐okila kwelekela ngalĩ ya ĩũlũ; na umalĩlo wa mũvaka waĩ kyokonĩ kya ngalĩ ya ĩũlũ kya Ũkanga wa Mũnyũ, mũthelelo wa ĩtheo wa Yolotani: ũsu nĩw’o mũvaka wa ngalĩ ya ĩtheo.

20Na Yolotani waĩ mũvaka wayo kĩlungunĩ kya ngalĩ ya wumĩlonĩ wa syũa. Ũsu waĩ ũtiĩwa wa ana ma Mbenyamini, kwĩanana na mĩvaka yaw’o ĩla ĩthyũlũlũkĩte, kũatĩĩa mĩvĩa yoo.

21Na ĩndĩ ndũa sya mbaĩ ya ana ma Mbenyamini kũatĩĩa mĩvĩa yoo syaĩ Yeliko, na Mbethi‐okila, na Emeki‐kesisi,

22na Mbethi‐alava, na Nzemalaimu, na Mbethi‐eli,

23na Aavi, na Vala, na Ovala,

24na Kevali‐amimoni, na Oveni, na Ngeva; ndũa ĩkũmi na ilĩ na mĩsyĩ yasyo:

25na Ngiveoni, na Lama, na Mbeelothi,

26na Misiva, na Kevila, na Moosa,

27na Lekemu, na Iliveeli, na Talala,

28na Nzeela, na Elevu, na Mũyevusi (nayo nĩ Yelusaleme), na Ngiveathi, na Kiliathi; ndũa ĩkũmi na ĩnya na mĩsyĩ yasyo. Ũsu nĩw’o ũtiĩwa wa ana ma Mbenyamini kũatĩĩa mĩvĩa yoo.

← Chapter 17 Jump to: Chapter 19 →