Joshua 6

Kamba (Mbivilia) 1956

← Chapter 5 Jump to: Chapter 7 →

1Na ĩndĩ Yeliko yaĩ mbinge ki kwondũ wa ana ma Isilaeli: vatyaĩ waaumaala, na vatyaĩ waalika.

2Na Yeova amwĩa Yosua, Sisya, nĩnĩnenganĩte Yeliko, na mũsumbĩ wayo, na ngũmbaũ nene, kw’okonĩ kwaku.

3Nenyu mũkathyũlũlũke ndũa, o andũ onthe ma kaũ, mũkĩthyũlũlũka ndũa ĩmwe. Wĩke ũu mĩthenya thanthatũ.

4Na athembi mũonza makakue masoo mũonza ma mbya sya ndũũme me mbee wa yĩla ĩsandũkũ: na mũthenya wa mũonza mũkathyũlũlũke ĩla ndũa mathyũlũlũka mũonza, na athembi makavuve masoo.

5Na kũkeethĩwa, yĩla mevuva mbya sya ndũũme ĩvuva yĩasa, na yĩla mwĩw’a wasya wa soo, andũ onthe nĩmakokĩlye mawasya mũno mũnene; na ũvai wa ndũa ũkavalũka mbu, na andũ makambata kĩla mũndũ aeleele kuma vala eĩĩ.

6Na Yosua mwana wa Nuni eeta athembi, na amea, Ukĩlyai ĩsandũkũ ya ũtianĩo, na athembi mũonza nĩmakue masoo mũonza ma mbya sya ndũũme me mbee wa yĩla ĩsandũkũ ya Yeova.

7Na mamea andũ, Vĩtai, mũthyũlũlũke ĩla ndũa, na ala andũ mekĩĩte mĩio ya kaũ nĩmavĩte mbee wa yĩla ĩsandũkũ ya Yeova.

8Na kweethĩwa, yĩla Yosua waĩ ananeena na andũ, ala athembi mũonza makuĩte masoo mũonza ma mbya sya ndũũme me mbee wa Yeova maenda mbee, na mavuva masoo: na ĩsandũkũ ya ũtianĩo ya Yeova yamaatĩĩa.

9Na ala andũ mekĩĩte mĩio ya kaũ maenda mbee wa athembi ala mavuvaa masoo, na ala ma ĩtina maatĩĩa yĩla ĩsandũkũ, athembi makĩvuva masoo maendete.

10Na Yosua ameaĩa andũ, akĩmea, Mũtikokĩlye mawasya, o na mawasya menyu matikew’ĩke, o na ndeto o na yĩva ndĩkaume makanyw’anĩ menyu, kũvika mũthenya ũla nĩmwĩaĩa mũkĩlye mawasya: nĩvo ĩndĩ mwĩũkĩlya mawasya.

11Na ĩndĩ atuma ĩsandũkũ ya Yeova yĩthyũlũlũkw’a ndũa, ĩthyũlũlũka yĩmwe: na masyoka mwakonĩ wa maeema, na makoma mwakonĩ wa maeema.

12Na Yosua ookĩla kĩoko tene na ala athembi mookĩlya yĩla ĩsandũkũ ya Yeova.

13Na athembi mũonza ala makuĩte masoo mũonza ma mbya sya ndũũme me mbee wa ĩsandũkũ ya Yeova maendeeaa matekũũngama, na makĩvuva masoo: na ala andũ mekĩĩte mĩio ya kaũ mamatongoesya; na ala ma ĩtina maatĩĩa yĩla ĩsandũkũ ya Yeova, athembi makĩvuva masoo maendete.

14Na mũthenya wa kelĩ mathyũlũlũka ndũa ĩmwe, na masyoka mwakonĩ wa maeema: meekie o ta ũu mĩthenya thanthatũ.

15Na kweethĩwa mũthenya wa mũonza, mookĩla tene w’oa ũitema, na mathyũlũlũka ndũa o ta ũu mathyũlũlũka mũonza: ate o mũthenya ũsu mathyũlũlũkile ndũa mathyũlũlũka mũonza.

16Na kweethĩwa ĩthyũlũlũka ya mũonza, yĩla athembi mavuvaa masoo, Yosua amea andũ, Usyai ngemi; nũndũ Yeova nũmũnengete ndũa ĩno.

17Na ndũa ĩkeethĩwa ĩvathĩtwe kwa Yeova, o yo na syonthe ĩla syĩ nthĩnĩ: ate o Laavi yĩla ĩlwaya wĩekwa e thayũ, we na onthe ala me nake nyũmbanĩ, nĩkwĩthĩwa nĩwavithie atũmwa ala twatũmie.

18Ĩndĩ inyw’ĩ ngalĩ ĩ yenyu, ĩsũvĩĩei na kĩndũ kĩla kĩvathĩtwe, nĩ kana, mwamina kũkĩvatha, mũtikese kwosa kĩla kĩvathe; na kwondũ wa ũu mũkĩtw’ĩkĩthya mwako wa maeema wa Isilaeli mũumanĩe, na mũkyũthĩn’ya.

19Ĩndĩ vetha w’onthe, na thaavu, na mĩio ya ũthuku na ya kĩaa, nĩ ntheu kwa Yeova: ikaetwe vala vaiawa ũthwii va Yeova.

20Na ĩndĩ andũ mookĩlya mawasya, na athembi mavuva masoo: na kweethĩwa, yĩla andũ meewie wasya wa soo, andũ mookĩlya mawasya mũno mũnene, na ũvai wavalũka mbu, ũndũ andũ malika ndũanĩ, kĩla mũndũ aelele kuma vala eĩĩ, na makwata ndũa.

21Na maananga vyũ syonthe ila syaĩ ndũanĩ, mũndũ mũũme o na mũndũ mũka, me ma mũika o na ala akũũ, na ng’ombe, na ĩlondu, na ĩng’oi, kwa kũtemanga na ũvyũ.

22Na Yosua atavya andũ elĩ ala mathianie nthĩ, Likai nyũmbanĩ ya yĩla ĩlwaya, na mũimumya vu mũndũ mũka ũsu, na syonthe ila wĩ nasyo, o tondũ mwamwĩvĩtĩe.

23Na ala anake athiani malika, na mamumaalya Laavi, na ĩthe wake, na inyia wake, na ana‐a‐ĩthe, na syonthe ila waĩ nasyo; o na andũ onthe ma mũvĩa wake mamaumaalya; na mamaia ũtee wa mwako wa maeema wa Isilaeli.

24Na mamĩvĩvya ndũa na mwaki, na syonthe ila syaĩ nthĩnĩ; ate o vetha, na thaavu, na mĩio ya ũthuku na ya kĩaa, meekĩie vala vaiawa ũthwii va nyũmba ya Yeova.

25Ĩndĩ Yosua amaeka me thayũ Laavi yĩla ĩlwaya, na andũ ma nyũmba ya ĩthe wake, na syonthe ila waĩ nasyo; nake atũaa katĩ wa Isilaeli kũvika ũmũnthĩ, nĩkwĩthĩwa avithie atũmwa, ala Yosua watũmie mathiane Yeliko.

26Na Yosua ameaĩa na wĩvĩto ĩvinda yĩu, akĩmea, Naumanĩwe kũla kwĩ Yeova mũndũ ũla wĩũkĩla na kwaka ndũa ĩno Yeliko: akĩkwatya wambĩlĩlyo wayo akakw’ĩĩwa nĩ ĩkithathi yake, na akĩũngamya mbingĩlo syayo akakw’ĩĩwa nĩ ĩlumaita yake ya mũndũ mũũme.

27Na ĩndĩ Yeova aĩ vamwe na Yosua; na nguma yake yaĩ nthĩ ĩsu yonthe.

← Chapter 5 Jump to: Chapter 7 →