Joshua 9

Kamba (Mbivilia) 1956

← Chapter 8 Jump to: Chapter 10 →

1Na kweethĩwa, yĩla asumbĩ onthe ala maĩ mũingo wa Yolotani, nthĩ yĩ iĩma, na nthĩ ndindimalu, na ndeenĩ syonthe sya ũkanga mũnene ũla welekele Levanoni, Mũititi, na Mũamoli, na Mũkanaani, na Mũvelisi, na Mũivi, na Mũyevusi, meewie ũndũ ũsu;

2nĩmoombanie vamwe, mokite na Yosua na Isilaeli, me na ngoo ĩmwe.

3Ĩndĩ yĩla ala matwĩe Ngiveoni meewie ũndũ Yosua wĩkĩte Yeliko na Ai,

4namo meekie na ũseleke, na mathi meeyĩelekan’ya ta atũmwa, na mailĩĩla makunia makũũ mang’oinĩ, na tũthatwa twa mbinyu, tũla tũkũũ, na tũtembũkangu, na tũliĩtwe,

5na mekĩĩte maũũnĩ moo iatũ ngũũ na syĩ ilio, na mekĩĩte ngũa ngũũ; na kĩmũtũ kyonthe kya lĩu woo kyaĩ kyũmũ na kĩkaya mbuuka.

6Na mamũendea Yosua mwakonĩ wa maeema Ngilikali, na mamwĩa we, o na andũ ma Isilaeli, Nĩtumĩte nthĩ yĩ kũasa: na yu kwondũ wa ũu tianĩai ũtianĩo naitũ.

7Na andũ ma Isilaeli mamea Aivi, Nokwĩthĩwa mũtwĩe katĩ waitũ; na twĩtianĩa ũtianĩo nenyu ata?

8Na mamwĩa Yosua, Twĩ athũkũmi maku. Na Yosua amakũlya, Mwĩ aaũ? Na mumĩte va?

9Na mamwĩa, Athũkũmi maku nĩmaumĩte nthĩ yĩ kũasa mũno kwondũ wa syĩtwa ya Yeova Ngai waku: nũndũ nĩtwĩw’ĩte nguma yake, na w’onthe ũla wekie Misili,

10na w’onthe ũla wekie asumbĩ elĩ ma Aamoli, ala maĩ mũingo wa Yolotani, Sioni mũsumbĩ wa Esivoni, na Oku mũsumbĩ wa Mbasani, ũla waĩ Asetalothi.

11Na atumĩa maitũ na onthe ala matwie nthĩ yaitũ maneena naitũ, makĩtwĩa, Osai lĩu wa nzĩanĩ na moko menyu, na mũithi mũmathaũe, na mũimea, Twĩ athũkũmi menyu: na yu tianĩai ũtianĩo naitũ.

12Kĩmũtũ kĩĩ kitũ twaumie nakyo nyũmbanĩ sitũ kĩ kĩvyũ kĩthĩwe lĩu witũ mũthenya ũla twaumaalile tũkomane nenyu; ĩndĩ yu, sisyai, nĩ kyũmũ, na nĩkĩĩte mbuuka:

13na tũthatwa tũũ twa mbinyu, tũla twausũisye, twaĩ tweũ; na, sisyai, nĩ tũtembũkangu: na ngũa ii sitũ na iatũ sitũ nikũĩte nũndũ wa kyalo kũasava mũno.

14Na ala andũ moosa kya ũya kyoo, na matyaakũlya ũtao kanyw’anĩ wa Yeova.

15Na Yosua aseũvya mũuo namo, na atianĩa ũtianĩo namo, nĩ kana mekale thayũ: na anene ma ĩkomano mameavĩa.

16Na kweethĩwa mĩthenya ĩtatũ yathela ĩtina wa matianĩa ũtianĩo namo, nĩmeewie kana maĩ atũi moo, na kana matwĩe katĩ woo.

17Na ana ma Isilaeli maenda kyalo, na mavika ndũa syoo mũthenya wa katatũ. Na ĩndĩ ndũa syoo syeetawa Ngiveoni na Kevila, na Mbeelothi, na Kiliathi‐yealimu.

18Na ana ma Isilaeli matyaamakũna, nĩkwĩthĩwa anene ma yĩla ĩkomano maĩ manameavĩa na Yeova, Ngai wa Isilaeli. Na ĩkomano yonthe yanyũngũnyĩĩsya ala anene.

19Ĩndĩ anene asu onthe matavya ĩkomano yonthe, Nĩtũmeavĩe na Yeova, Ngai wa Isilaeli: kwondũ wa ũu yu tũtitonya kũmakiita.

20Twĩmeka ũũ, na kũmaeka mekale thayũ; ũthatu ndũkese kwĩthĩwa ĩũlũ waitũ, nũndũ wa wĩvĩto ũla twamevĩtĩe.

21Na anene mamea, Nĩmaekwe mekale thayũ: na ĩndĩ matw’ĩka auni ma ngũ na atavi ma manzĩ kwa ĩkomano yonthe, o tondũ anene mamatavĩtye.

22Na Yosua amatũmana, na aneena namo, akĩmea, Mũtũkengete nĩkĩ, mũkĩtwĩa, Twĩ kũasa nenyu mũno; na kaĩ mũtwĩe katĩ waitũ?

23Kwondũ wa ũu yu mwĩ aumanĩe, na kũikatĩa o na ĩndĩĩ kwĩthĩwa amwe menyu ngombo, auni ma ngũ o na atavi ma manzĩ kwondũ wa nyũmba ya Ngai wakwa.

24Na masũngĩa Yosua, na mamwĩa, Nĩkwĩthĩwa athũkũmi maku nĩmataviw’e ki, ũndũ Yeova Ngai waku wamwĩaĩe mũthũkũmi wake Mose amũnenge inyw’ĩ nthĩ ĩno yonthe, na kwananga kuma mbee wenyu onthe ala matwĩe ĩ nthĩ; kwondũ wa ũu twakĩsya mũno mathayũ maitũ kwondũ wenyu, na ĩndĩ tũneekie ũndũ ũũ.

25Na yu, sisya, twĩ kw’okonĩ kwaku: o ũndũ wĩona wĩ ũseo na ũlũngalu kũtwĩka, ũtwĩke.

26Na ameka o ta ũu, na amavonokya mokonĩ ma Isilaeli, matikamoae.

27Na mũthenya ũsu Yosua amatw’ĩkĩthya auni ma ngũ na atavi ma manzĩ kwondũ wa ĩkomano, na kwondũ wa kĩthembeo, kya Yeova, kũvika ũmũnthĩ, o vandũnĩ vala wĩnyuva.

← Chapter 8 Jump to: Chapter 10 →