bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (Mbivilia) 1956
/
Joshua 4
Joshua 4
Kamba (Mbivilia) 1956
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 5 →
1
Na kweethĩwa, yĩla mbaĩ yonthe yaminie kũinga Yolotani vyũ, Yeova aneena na Yosua, akĩmwĩa,
2
Osa andũ ĩkũmi na elĩ kuma andũnĩ, kuma kĩla mbaĩ mũndũ ũmwe,
3
na ũimeaĩa, ũkĩmea, Osai mavia ĩkũmi na elĩ Yolotani katĩ, kuma vandũ vala maũũ ma athembi maũngamĩte ki, nenyu mũimakua, na mũkamaie vandũ vala mwĩkoma, o vala mwĩkoma ũtukũ ũũ.
4
Nĩvo ĩndĩ Yosua wametie andũ asu ĩkũmi na elĩ, ala waiie ma ana ma Isilaeli, kuma kĩla mbaĩ mũndũ ũmwe:
5
na Yosua amea, Vĩtĩlai mbee wa yĩla ĩsandũkũ ya Yeova mũlike Yolotani katĩ, na kĩla mũndũ wenyu ose ĩvia mwilĩĩle kĩtuo, o kwĩanana na ũtalo wa mbaĩ sya ana ma Isilaeli;
6
nĩ kana ũu wĩthĩwe wonan’yo katĩ wenyu, kana, yĩla syana syenyu ikakũlya ĩvinda yĩla yĩkoka, ikyasya, Mwĩonan’ya ata na mavia aa?
7
Nĩvo mwĩsyĩa, Nũndũ manzĩ ma Yolotani nĩmavingĩiwe mbee wa ĩsandũkũ ya ũtianĩo ya Yeova; yĩla yaingie Yolotani, manzĩ ma Yolotani nĩmavĩngĩiwe: na mavia aa makeethĩwa ũlilikan’yo kwa ana ma Isilaeli tene na tene.
8
Na ana ma Isilaeli meeka o tondũ Yosua weaie, na moosa mavia ĩkũmi na elĩ kuma Yolotani katĩ, o kwĩanana na ũtalo wa mbaĩ sya ana ma Isilaeli, o tondũ Yeova wamũtavisye Yosua; na mamakua kũvika vandũ vala makomie, na mamaia nthĩ vo.
9
Na Yosua aũngamya mavia ĩkũmi na elĩ Yolotani katĩ, vandũ vala maũũ ma athembi ala makuaa ĩsandũkũ ya ũtianĩo maũngamĩte: na nĩvo maĩ kũvika mũnthĩ ũũ.
10
Nũndũ athembi ala makuaa yĩla ĩsandũkũ maũngamĩte Yolotani katĩ, kũvika maũndũ onthe mathela ala Yeova weaĩe Yosua amatavye andũ, o kwĩanana na onthe ala Mose weaie Yosua: na andũ meekalaata na mainga.
11
Na kweethĩwa, yĩla andũ onthe maingie vyũ, nayo ĩsandũkũ ya Yeova yainga, na athembi, andũ mene.
12
Na ana ma Leuveni, na ana ma Ngati, na nyunzu ya mbaĩ ya Manase, mainga mbee wa ana ma Isilaeli mekĩĩte mĩio ya kaũ, o tondũ Mose wamatavisye:
13
mainga o ta ngili mĩongo ĩna Yeova asyaĩtye mekĩĩte mĩio ya kaũ, kũvika ndiĩnĩ sya Yeliko, nĩ kana mokite.
14
Mũthenya ũsu Yeova anenevya Yosua methonĩ ma Isilaeli onthe: na mamũkĩa mĩthenya yonthe ya thayũ wake, o tondũ makĩĩte Mose.
15
Na Yeova aneena na Yosua, akĩmwĩa,
16
Ĩaĩe athembi ala makuaa ĩsandũkũ ya ũkũsĩ maume Yolotani.
17
Kwondũ wa ũu Yosua ameaĩa athembi, akĩmea, Umai Yolotani.
18
Na kweethĩwa, yĩla athembi ala makuaa ĩsandũkũ ya ũtianĩo ya Yeova mauma Yolotani katĩ, na nyaĩĩ sya athembi syookĩlw’a syakinya nthĩ nyũmũ, manzĩ ma Yolotani masyoka vandũ vamo, na makĩla ngũka syonthe syamo, o ta tene.
19
Na andũ asu mauma Yolotani mũthenya wa ĩkũmi mwei wa mbee, na mamba maeema Ngilikali, mũvakanĩ wa Yeliko ngalĩ ya wumĩlonĩ wa syũa.
20
Na mavia asu ĩkũmi na elĩ, ala maumisye Yolotani, Yosua amaũngamya Ngilikali.
21
Na aneena na ana ma Isilaeli, akĩmea, Yĩla syana syenyu ikamakũlya aaĩthe masyo ĩvinda yĩla yĩkoka, ikĩmea, Mavia aa nĩ ma kĩ?
22
Nĩvo mwĩmanyĩthya syana syenyu, mũkĩsyĩa, Isilaeli nĩmaingie Yolotani ũyũ makinyĩle nthĩ nyũmũ.
23
Nũndũ Yeova Ngai wenyu nĩwang’alĩthisye manzĩ ma Yolotani mbee wenyu, kũvika mwainga, o tondũ Yeova Ngai wenyu wekie Ũkanga Mũtune, ũla wang’alĩthisye mbee waitũ, kũvika twainga;
24
nĩ kana andũ onthe ma nthĩ mamanye kw’oko kwa Yeova, atĩ kwĩ na vinya mũno; nĩ kana mũkĩe Yeova Ngai wenyu tene na tene.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24