Ezekiel 1

Kamba (MBIVILIA ŨVOO MŨSEO)

Jump to: Chapter 2 →

1Mũthenyanĩ wa katano wa mwei wa kana, mwaka wa mĩongo ĩtatũ, yĩla naĩ vamwe na andũ ala maĩ atave twĩ ũtee wa Ũsĩ wa Kevali, matu nĩmavingũkie na noona mawoni ma Ngai.

2Mũthenyanĩ ũsu wa katano wa mwei (ũla waĩ mwaka wa katano kuma Mũsumbĩ Yeoiakini atwawa nthĩ ya ũeninĩ Mbavilonĩ e mũtave),

3Mwĩai Ngai nĩwaneenie nakwa nyie mũthembi Esekieli mwana wa Mbusi, yĩla naĩ ũtee wa Ũsĩ wa Kevali ũla wĩ nthĩ ya Mbavilonĩ. Nĩ vau Mwĩai Ngai nĩwambilĩĩile kw'oko kwake.

4Yĩla nasyaisye nĩnoonie kĩuutani kĩnene kyumĩte ngalĩko ya ĩũlũ. Vaĩ ĩtu ĩnene yathyũlũlũkĩtwe nĩ kyeni na mwaki waumaa ũtisi ũtekũeka. Katĩ katĩ wa mwaki ũsu vaĩ kĩndũ kyatisatisaa ta kyũma kĩtawa mbulonzi.

5Nthĩnĩ wa mwaki ũsu nĩnoonie syĩndũ iilyĩ ta syũmbe inya syĩ thayũ. Syũmbe isu syailyĩ ta ũũ: Syaĩ na mũvw'ano wa mũndũ,

6ĩndĩ kĩla kyũmbe kyaĩ na mothyũ ana na nthwau inya.

7Maũũ masyo maĩ malũngalu na nyaĩĩ syasyo syailyĩ ta mavũngũ ma kasaũ, na syatisatisaa ta mbulonzi ngute.

8Syaĩ na moko ana mailyĩ ta ma mũndũ; kũmwe ungu wa kĩla ũthwau. Syũmbe isu syĩ inya syaĩ na mothyũ na nthwau iilyĩ ta ũũ:

9Mĩthya ya nthwau syasyo nĩyatinanĩte. Kĩla kyũmbe kyaendete mbee kĩlũngalĩte; syũmbe isu iyeethyũũaa iendete.

10Mothyũ masyo mailyĩ ta ũũ: Kĩla kyũmbe kyaĩ na ũthyũ wa mũndũ ngalĩko ya mbee, na ngalĩko ya kw'oko kwa aũme kĩla kĩmwe kyaĩ na ũthyũ wa mũnyambũ, na ngalĩko ya kw'oko kwa aka kĩla kyũmbe kyaĩ na ũthyũ wa nzaũ, na ngalĩko ya ĩtina kĩla kyũmbe kyaĩ na ũthyũ wa ndiũ.

11Mothyũ masyo mailyĩ ũu. Nthwau sya syũmbe isu syatambũũkĩte syelekele ngalĩko ya ĩũlũ. Kĩla kyũmbe kyaĩ na nthwau ilĩ, na kĩla ũthwau watinĩte ũthwau wa kyũmbe kĩla kĩngĩ. Nthwau ila ingĩ ilĩ sya syũmbe isu syaivw'ĩkĩte mĩĩ.

12Kĩla kyũmbe kyaendaa mbee kĩlũngalĩte. Syaendaa kĩla vandũ veva ũkwenda kũthi itekwĩthyũũa.

13Katĩ katĩ wa syũmbe isu syĩ thayũ vaĩ kĩndũ kyailyĩ ta makaa makanĩte mwaki, ta mũĩ ikũthi mbee na kũsyoka na ĩtina syĩ katĩ wa syũmbe isu. Mwaki ũsu waĩ na kyeni kĩtheu na waumaa ũtisi.

14Syũmbe isu o ta ũu syaendaa mbee na ĩtina mĩtũkĩ ta ũtisi.

15Nĩendee kũsyaĩĩsya syũmbe isu syĩ thayũ, nĩnoonie ndĩa ikinyĩte nthĩ vakuvĩ na syũmbe isu, kĩla kyũmbe kĩna ndĩa ĩmwe.

16Ndĩa isu syailyĩ ũndũ ũmwe na syaseũvĩtw'e ta ũũ: Kĩla ndĩa yatisatisaa ta ĩvia ya thooa mũnene yĩtawa nzumalati, na yailyĩ ta ndĩa ĩlikanĩtw'e na ĩngĩ.

17Ndĩa isu iendete, syaendaa o kĩla ngalĩko syeelekela itekũvĩndũka yĩla iendete.

18Ndĩa ila syaĩ ndĩanĩ isu syaĩ nene na sya kũtĩsya na syausũĩte metho ngalĩko syonthe.

19Yĩla syũmbe isu syĩ thayũ iendete, ndĩa isu syaendaa syĩ ũtee wasyo. Yĩla syũmbe isu syookĩla kuma nthĩ, o nasyo ndĩa isu nĩsyookĩlaa.

20Syũmbe isu syaendaa vandũ vonthe vala veva ũendete, nasyo ndĩa isu syaendanasya nasyo, nĩkwĩthĩwa veva wa syũmbe isu syĩ thayũ waĩ ndĩanĩ isu.

21Yĩla syũmbe isu syathi, o nasyo ndĩa isu nĩsyaendaa; yĩla syũmbe isu syaũngama, o nasyo ndĩa isu nĩsyaũngamaa, na yĩla syũmbe isu syookĩla kuma nthĩ, o nasyo ndĩa isu nĩsyookĩlaa. Nĩkwĩthĩwa veva wa syũmbe isu syĩ thayũ waĩ ndĩanĩ isu.

22Ĩũlũ wa mĩtwe ya syũmbe isu syĩ thayũ, vaĩ kĩndũ kĩilyĩ yayaya kyatisatisaa ta kĩoo, kĩtambũũkĩtw'e ĩũlũ wa mĩtwe yasyo.

23Syũmbe isu syaĩ ungu wa yayaya yĩu itambũũkĩtye nthwau; ũthwau ũmwe welekele ũla ũngĩ na ikevw'ĩka mĩĩ yasyo na nthwau ila ingĩ ilĩ.

24Syũmbe isu syambĩĩa kũthi, nĩneewie wasya wa nthwau syasyo; wasya wailyĩ ta wa kĩw'ũ kingĩ, ta wa kĩtundumo kuma kwa Mwene Ũtonyi W'onthe, na wa asikalĩ aingĩ mekũlonzany'a. Yĩla syũmbe isu syaũngama, nĩsyatheeasya nthwau syasyo.

25Nĩneewie wasya kuma ĩũlũ wa kĩla kĩndũ kyailyĩ yayaya, kĩla kyaĩ ĩũlũ wa mĩtwe yasyo. Yĩla syũmbe isu syaũngama, nĩsyatheeasya nthwau syasyo.

26Ĩũlũ wa yayaya yĩu nĩnoonie kĩndũ kyailyĩ ta kĩvĩla kya kĩ-ũsumbĩ, kĩilyĩ ta ĩvia ya thooaa mũnene yĩtawa savaya. Kĩndũ kĩu kyailyĩ ta kĩvĩla kya kĩ-ũsumbĩ, kyekalĩlwe nĩ ũmwe ũla waĩ na wũmbo wa mũndũ.

27Ngalĩko ya ĩũlũ ya mwĩĩ wake kuma kĩnyunyunĩ yatisatisaa ta mbulonzi, ta mwaki ũthyũlũlũkĩte ngalĩko syonthe. Ngalĩko ya ĩtheo ya mwĩĩ wake yailyĩ ta mwaki, na yathyũlũlũkĩtwe nĩ ũtisu

28wailyĩ ta ũtaathi wĩ ĩthweonĩ ĩvindanĩ ya mbua. Ũu nĩ w'o ũtheu mũtisu wa Mwĩai Ngai wailyĩ. Yĩla nawonie nĩnakomie nthĩ na ĩvu, na neew'a wasya wa mũndũ aineena.

Jump to: Chapter 2 →