Ezekiel 46

Kamba (MBIVILIA ŨVOO MŨSEO)

← Chapter 45 Jump to: Chapter 47 →

1Mwĩai Ngai Mũsumbĩ easya atĩĩ, “Mũvĩa wa ngalĩko ya wumĩlonĩ wa syũa wa kũlika kĩwanzanĩ kya nthĩnĩ kya Ĩkalũ, waĩlĩte kwĩkala wĩ mũvinge mĩthenya thanthatũ ya kũtethya wĩa. Ĩndĩ ũkavingũawa mũthenya wa Savato, na mũthenyanĩ wa Mboka ya Kũtisa kwa Mwei.

2Mũtongoi aumĩte nza akalikaa esĩlĩte nyũmbanĩ ya mumĩlo ya mũvĩa, na aiũngama vakuvĩ na ituĩ sya mũvĩa. Athembi makathembaa nthembo yake ya kũvĩvw'a, na nthembo syake sya ngwatanĩo. E vau mũvĩanĩ, akathaithaa na ĩndĩ ayumaala ĩngĩ. Mũvĩa ũsu ndwaĩlĩte kũvingwa nginya ĩa mawĩoo.

3Mũthenyanĩ wa Savato na wa Mboka ya Kũtisa kwa Mwei, andũ onthe ma Ĩsilaeli makanthaithaa nyie Mwĩai Ngai me mũvĩanĩ.

4Mũthenyanĩ wa Savato, mũtongoi akandeteae nyie Mwĩai Ngai nthembo ya kũvĩvw'a ya tũtena thanthatũ tũũme twa malondu tũte kĩema, na ndũũme ĩte kĩema.

5Akaetanĩasya kĩla ndũũme na nthembo ya ngetha ya mbaa mbeke ya kĩlo ĩkũmi na mũonza na nyusu, na kĩla katena ka ĩlondu akakaetanĩasya na kĩla ũkwenda kũnengane. Nthembo ĩsu ya ngetha ya mbaa mbeke ya kĩlo ĩkũmi na mũonza na nyusu, ĩkaetanĩaw'a na lita itatũ sya mauta.

6Mũthenyanĩ wa Mboka ya Kũtisa kwa Mwei, akanenganae kasalũ, tũtena twa malondu thanthatũ na ndũũme, syonthe ite kĩema.

7Akaumanĩasya kĩla nzaũ, na kĩla ndũũme na nthembo ya ngetha ya mbaa mbeke ya kĩlo ĩkũmi na mũonza na nyusu, na kumanĩsya kĩla katena ka ĩlondu na nthembo ĩla ũkwenda. Kĩla nthembo ya ngetha ya mbaa mbeke ya kĩlo ĩkũmi na mũonza na nyusu, akamyumanĩasya na lita itatũ sya mauta.

8Mũtongoi akalikaa esĩlĩte nyũmbanĩ ya mumĩlo ya mũvĩa, na akaumaalaa na nzĩa o ĩsu.

9“Yĩla andũ ma Ĩsilaeli mooka mbee wakwa nyie Mwĩai Ngai ĩvindanĩ ya mboka ila itw'ĩtwe, mũndũ alikĩla mũvĩanĩ wa ngalĩko ya ĩũlũ akathaithe, akaumaalĩlaa mũvĩanĩ wa ngalĩko ya ĩtheo, na ũla walikĩla mũvĩanĩ wa ngalĩko ya ĩtheo, akaumaalĩlaa mũvĩanĩ wa ngalĩko ya ĩũlũ. Vai mũndũ waĩlĩte kũsyokela mũvĩanĩ ũla walikĩla, ĩndĩ kĩla ũmwe akaumaalĩlaa mũvĩanĩ ũla ũngĩ.

10Yĩla andũ malika, mũtongoi akalikaa vamwe namo, na yĩla maumaala, akaumaalaa vamwe namo.

11Mĩthenyanĩ ya mboka na ya mboka ila itw'ĩtwe, nthembo ya ngetha ya mbaa mbeke ĩla yĩumanĩaw'a na kasalũ, ĩkeethĩawa ya kĩlo ĩkũmi na mũonza na nyusu, na ĩla yĩumanĩaw'a na ndũũme ĩkeethĩawa yĩana o ũu. Kĩla katena ka ĩlondu kakaumanĩaw'a na nthembo ya ngetha ya mbaa mbeke yĩana ũndũ mũndũ ũkwenda. Nthembo ya ngetha ya mbaa mbeke ya kĩlo ĩkũmi na mũonza na nyusu ĩkaumanĩaw'a na mauta ma lita itatũ.

12“Yĩla mũtongoi wenda kũmbumĩsya nyie Mwĩai Ngai nthembo ya ngoo ya kwenda, ethĩwa nĩ nthembo ya kũvĩvw'a kana nthembo sya ngwatanĩo, akavingũĩawa mũvĩa ũla wĩ ngalĩko ya wumĩlonĩ wa syũa. Akaumasya nthembo isu o ũndũ wĩkaa mũthenyanĩ wa Savato. Nĩvo ĩndĩ wĩumaalaa na mũvĩa ũivingwa.”

13Mwĩai Ngai easya atĩĩ, “Kĩla mũthenya mũkanenganae katena ka ĩlondu kena ũkũũ wa mwaka ũmwe na kate kĩema, kethĩwe nthembo ya kũvĩvw'a yakwa nyie Mwĩai Ngai. Mũkanenganae katena kau kĩla kwakya.

14O ta ũu kĩla kwakya mũkanenganae nthembo ya ngetha ya mbaa mbeke ya kĩlo ilĩ, yĩ na lita ĩmwe ya mauta ma kũvulany'a na mũtu ũsu. Mwĩao ũsu wa kũmbumĩsya nyie Mwĩai Ngai nthembo ya ngetha ya mbaa mbeke ũkaatĩĩawa ĩvinda yonthe yĩla yũkĩte.

15Kwoou katena ka ĩlondu, nthembo ya ngetha ya mbaa mbeke na mauta, ikaumaw'a kĩla kwakya ĩvindanĩ yonthe yĩla yũkĩte syĩthĩwe nthembo ya kũvĩvw'a.”

16Mwĩai Ngai Mũsumbĩ easya atĩĩ, “Ethĩwa mũtongoi nĩwanenga ũmwe wa ana make mũthĩnzĩo kuma kĩsionĩ kyake kya ng'ũndũ, mũthĩnzĩo ũsu ũkeethĩawa wĩ wa mwana ũsu na nzyawa syake; nĩ ng'ũndũ ya mũsyĩ.

17Ĩndĩ mũtongoi anenga ũmwe wa athũkũmi make mũthĩnzĩo kuma ũtiĩwanĩ wake, mũthĩnzĩo ũsu ũkeethĩawa wĩ wa mũthũkũmi ũsu nginya mwakanĩ wa ũthasyo, na ĩndĩ ũisyokea mũtongoi. Ana make no mo matonya kũmesya vyũ mũthĩnzĩo wa ũtiĩwa wake.

18Mũtongoi ndakose ng'ũndũ ya andũ na kũmalũngya kuma ũtiĩwanĩ woo. Akanengae ana make ũtiĩwa woo kuma ng'ũndũnĩ yake, nĩ kana vaikethĩwe ũmwe wa andũ makwa ũvenetwe ng'ũndũ yake.”

19Nĩvo ĩndĩ mũndũ ũsu wandikĩlilye ũlikĩlonĩ ũla waĩ ũtee wa mũvĩa, twathi nyũmbanĩ ntheu sya athembi ila syasyaĩtye ngalĩko ya ĩũlũ. Nĩwambonisye vandũ ngalĩko ya ũthũĩlonĩ wa syũa ya nyũmba isu,

20na ambĩa atĩĩ, “Vaa nĩvo athembi makauĩaa nthembo kwondũ wa mavĩtyo, nthembo kwondũ wa ũekeo wa naĩ na nthembo ya ngetha ya mbaa mbeke, nĩ kana maikasyumaalye kĩwanzanĩ kya nza, na kwa kwĩka ũu maituma andũ makwatwa nĩ ũndũ mũthũku makiita kĩndũ kĩtheu.”

21Nĩvo ĩndĩ mũndũ ũsu wandwaie kĩwanzanĩ kya nza, na andongoesya kũthi konanĩ inya syakyo. Kĩla kona ya kĩwanza kĩu yaĩ na kĩwanza.

22Konanĩ inya sya kĩwanza kya nza vaĩ iwanza ingĩ nini, ila syaĩ na ũasa wa mita mĩongo ĩlĩ na ũthanthau wa mita ĩkũmi na itano. Iwanza isu syĩ inya nĩsyeanene.

23Vaĩ ũkũta wathyũlũlũkĩte kĩla kĩmwe kya iwanza isu inya, na kwaĩ kũndũ kwa kũvuvĩa mwaki kwaseũvĩtw'e wambĩlĩĩlyonĩ wa ũkũta ũsu.

24Nĩvo ĩndĩ mũndũ ũsu wambĩie atĩĩ, “Aa nĩmo maiko ala andũ ala mathũkũmaa Ĩkalũnĩ makauĩaa nthembo ila andũ maumya.”

← Chapter 45 Jump to: Chapter 47 →