Ezekiel 42

Kamba (MBIVILIA ŨVOO MŨSEO)

← Chapter 41 Jump to: Chapter 43 →

1Nĩvo ĩndĩ mũndũ ũsu wandwaie kĩwanzanĩ kya nza kĩla kyaĩ ngalĩko ya ĩũlũ ya Ĩkalũ, na andwaa tũsũmbanĩ tũla twasyaĩtye kĩwanza kya Ĩkalũ, na nyũmba ĩla yaĩ ngalĩko ya ĩũlũ.

2Nyũmba ĩla yaĩ ngalĩko ya ĩũlũ yaĩ na ũasa wa mita mĩongo ĩtano, na ũthanthau wa mita mĩongo ĩlĩ na itano.

3Ngalĩko ĩmwe ya nyũmba ĩsu yeelekele mwanya wa mita ĩkũmi ũla waĩ ũtee wa Ĩkalũ, na ngalĩko ĩla ĩngĩ ya nyũmba ĩsu yeelekele nzĩa ya kĩwanza kya nza. Nyũmba ĩsu yaĩ ya ngolova itatũ; kĩla ĩmwe yĩ ĩũlũ wa ĩla ĩngĩ.

4Ngalĩko ya ĩũlũ ya nyũmba ĩsu, vaĩ nzĩa yaĩ ya ũthanthau wa mita itano, na ũasa wa mita mĩongo ĩtano. Mĩomo ya nyũmba ĩsu yaĩ ngalĩko ya ĩũlũ.

5Nyũmba ila syaĩ ĩũlũ syaĩ ntheke mbee wa ila syaĩ katĩ, na ila syaĩ nthĩ, nũndũ nzĩa ila syaĩ vo nĩsyoosete mwanya wa nyũmba isu.

6Nyũmba ila syaĩ ngolovanĩ ya katatũ iyaĩ na ituĩ, o ũndũ iwanza syaĩ nasyo. Kwoou syaĩ na mwanya mũnini wa kwĩkalwa mbee wa ila syaĩ katĩ na ila syaĩ nthĩ vyũ.

7Vaĩ ũkũta waĩ nza wasianĩtye na nyũmba isu, na ũkasyaany'a na kĩwanza kya nza. Ũkũta ũsu waĩ wa mita mĩongo ĩlĩ kuma nyũmbanĩ isu.

8Nyũmba ila syaĩ vakuvĩ na kĩwanza kya nza syaĩ na ũasa wa mita mĩongo ĩlĩ na itano, nasyo ila syasyaanĩtye na Ĩkalũ syaĩ na ũasa wa mita mĩongo ĩtano.

9Nyũmba sya nthĩ syaĩ na mũvĩa ngalĩko ya wumĩlonĩ wa syũa, vala mũndũ waĩ atonya kũlikĩla aumĩte kĩwanzanĩ kĩla kĩ nza,

10vala ũkũta wa nza wambĩĩe. Vaĩ nyũmba ingĩ ngalĩko ya ĩtheo, syasyaanĩtye na kĩwanza kya Ĩkalũ na nyũmba ĩsu ĩngĩ,

11na vaĩ nzĩa ngalĩko ya mbee yasyo. Nyũmba isu syailyĩ ũndũ ũmwe na ila syaĩ ngalĩko ya ĩũlũ; nĩsyeanene ũasa na ũthanthau. Mĩvĩa yasyo, mwakĩle wasyo na mĩomo yasyo yailyĩ ũndũ ũmwe.

12Nyũmba sya nthĩ sya nyũmba ĩla yaĩ ngalĩko ya ĩtheo syaĩ na ũlikĩlo ngalĩko ya wumĩlonĩ wa syũa, vala mũndũ waĩ atonya kũlikĩla, na vaĩ ũkũta wa kũaany'a.

13Mũndũ ũsu nĩwambĩie atĩĩ, “Nyũmba ila syĩ ngalĩko ya ĩũlũ, na ila syĩ ngalĩko ya ĩtheo isyaĩtye kĩwanza kya Ĩkalũ nĩ nyũmba ntheu. Vau nĩvo athembi ala maendaa mbee wa Mwĩai Ngai makaĩĩaa nthembo ila ntheu mũno. Nĩ vo makaiaa nthembo ila ntheu mũno nũndũ vandũ vau nĩ vatheu. Nthembo isu nĩ nthembo ya ngetha ya mbaa mbeke, nthembo kwondũ wa ũekeo wa naĩ, na nthembo kwondũ wa mavĩtyo.

14Athembi mamina kũlika Ĩkalũnĩ, mayaĩlĩte kumaala mathi kĩwanzanĩ kĩla kĩ nza mataumĩtye ngũa ntheu ila meeĩkĩĩte maithũkũma Mwĩai Ngai, nũndũ ngũa isu nĩ ntheu. Maĩlĩte kwĩkĩa ngũa ingĩ matanamba kũthi kũla andũ ala angĩ mombanĩaa.”

15Yĩla mũndũ ũsu waminie kũthima kĩsio kya nthĩnĩ kya Ĩkalũ, nĩwambĩsĩlilye mũvĩanĩ ũla wĩ ngalĩko ya wumĩlonĩ wa syũa, na ĩndĩ athima kĩsio kĩla kyaĩ nza ngalĩko syonthe.

16Nĩwathimie ngalĩko ya wumĩlonĩ wa syũa na ũla mũtĩ wa kũthima. Ngalĩko ĩsu yaĩ na ũasa wa mita maana elĩ na mĩongo ĩtano.

17Nĩwavĩndũkie athima ngalĩko ya ĩũlũ na mũtĩ ũsu wa kũthima, nayo yaĩ na ũasa wa mita maana elĩ na mĩongo ĩtano.

18Nĩwavĩndũkie athima ngalĩko ya ĩtheo na mũtĩ ũsu wa kũthima, nayo yaĩ na ũasa wa mita maana elĩ na mĩongo ĩtano.

19Nĩvo ĩndĩ wavĩndũkie athima ngalĩko ya ĩũlũ, na ya ũthũĩlonĩ wa syũa, nasyo kĩla ĩmwe yaĩ na ũasa wa mita maana elĩ na mĩongo ĩtano.

20Kwoou nĩwathimie ngalĩko inya sya kĩsio kĩu kyonthe. Kĩsio kĩu kyathyũlũlũkĩtwe nĩ ũkũta waĩ na ũasa wa mita maana elĩ na mĩongo ĩtano, na ũthanthau wĩana o ũu. Ũkũta ũsu wavathũkanĩtye kĩsio kĩla kĩvathĩtwe kĩthĩwe kya Mwĩai Ngai na kĩla kĩtaĩ kĩvathe.

← Chapter 41 Jump to: Chapter 43 →

Recommended Reading

Commentary Ezekiel Commentaries → Devotional Ezekiel Devotional Guide → Get This Bible Kamba (MBIVILIA ŨVOO MŨSEO) Study Bible →