Ezekiel 45

Kamba (MBIVILIA ŨVOO MŨSEO)

← Chapter 44 Jump to: Chapter 46 →

1“Yĩla mwĩaanĩsya andũ ma Ĩsilaeli nthĩ yĩthĩwe ũtiĩwa woo, mũkavatha kĩlungu kĩmwe kya nthĩ kĩthĩwe kĩsio kĩtheu kyakwa nyie Mwĩai Ngai. Kĩsio kĩu kĩkeethĩwa na ũasa wa kĩlomita ĩkũmi na ilĩ na nyusu, na ũthanthau wa kĩlomita ĩkũmi. Kĩsio kĩu kyonthe kĩkeethĩwa kĩ kĩtheu.

2Kĩsionĩ kĩu vakeethĩwa kĩlungu kĩna ũasa wa mita maana elĩ na mĩongo ĩtano, na ũthanthau wĩana o ũu kwondũ wa Ĩkalũ. Kĩlungu kĩu kĩkeethĩwa kĩthyũlũlũkĩtwe nĩ kĩsio kĩngĩ kĩthei, kĩna ũthanthau wa mita mĩongo ĩlĩ na itano.

3Kĩsionĩ kĩu kĩtheu, ũkathima kĩlungu kĩna ũasa wa kĩlomita ĩkũmi na ilĩ na nyusu, na ũthanthau wa kĩlomita itano. Vau nĩvo veĩthĩwa Ĩkalũ, vandũ vala vatheu mũno.

4Kĩkeethĩawa kĩ kĩsio kĩtheu kya nthĩ; kĩkeethĩawa kĩ kya athembi ala mokaa Ĩkalũnĩ manthũkũme nyie Mwĩai Ngai. Kĩsio kĩu kĩkeethĩwa na nyũmba syoo na vandũ vatheu kwondũ wa Ĩkalũ.

5Kĩsio kĩla kĩngĩ kĩna ũasa wa kĩlomita ĩkũmi na ilĩ na nyusu, na ũthanthau wa kĩlomita itano, kĩkeethĩwa kĩ kya Alivai ala mathũkũmaa Ĩkalũnĩ. Kĩkeethĩwa ng'ũndũ yoo vala vakethĩwa ndũa syoo sya kwĩkala.

6“Vakuvĩ na kĩsio kĩu kĩtheu, mũkathima kĩsio kĩngĩ kĩna ũasa wa kĩlomita ĩkũmi na ilĩ na nyusu, na ũthanthau wa kĩlomita ilĩ na nyusu kwondũ wa ndũa, vala mũndũ o na wĩva wa Ĩsilaeli ũkethĩwa atonya kũtũa.

7“Mũtongoi akanengwa kĩsio kya nthĩ kĩla kĩvakanĩte na kĩsio kĩu kĩtheu ngalĩko ya wumĩlonĩ wa syũa na ya ũthũĩlonĩ wayo. Kĩsio kĩu kĩkathi ngalĩko ya ũthũĩlonĩ wa syũa kũvika ũkanganĩ wa Menditelenia, na kĩithi ngalĩko ya wumĩlonĩ wa syũa kũvika mũvakanĩ wa nthĩ ũla wĩ wumĩlonĩ wa syũa. Kĩsio kĩu kĩkeethĩwa na ũasa wĩana wa kĩsio kĩla kĩnengetwe kĩla ĩmwe ya mbaĩ sya Ĩsilaeli.

8Kĩsio kĩu kya nthĩ nĩkyo kĩkatw'ĩka ng'ũndũ ya mũtongoi wa Ĩsilaeli. Atongoi makwa maikathĩny'a andũ makwa ĩngĩ, ĩndĩ makaeka andũ ma Ĩsilaeli mamesye nthĩ kwĩanana na mbaĩ syoo.”

9Mwĩai Ngai Mũsumbĩ easya atĩĩ, “Inyw'ĩ atongoi ma Ĩsilaeli, nĩmwĩkĩte ũthũku vandũ va ĩvinda ĩasa; ekanai na ũng'endu na mũieka kũthĩny'a andũ. Ĩkai maũndũ ala ma w'o na malũngalu. Ekai kũlũngya andũ makwa kuma nthĩ yoo. Nĩasya ũu nyie Mwĩai Ngai Mũsumbĩ.

10Mwaĩlĩte kũtũmĩa ithimi na ithimo ila syaĩlĩte.

11Kĩthimo kĩla kĩtawa eva na kĩla kĩtawa vathi ikeethĩawa syĩanene. Eva kwa ngetha ya mbaa mbeke, nayo vathi kwa mauta ikeethĩawa syĩanene. Eva ĩmwe kana vathi ĩmwe ĩkeethĩawa yĩ ũndũ ũmwe na kĩlungu kĩmwe kya ĩkũmi kya omeli. Omeli nĩyo yĩĩthĩwa kĩthimo kya kũthima ithimo ila ingĩ.

12Kwa kũthima ũito wa syĩndũ, ithimo ila syĩtawa ngela syĩ mĩongo ĩlĩ ikeethĩawa syĩ ũndũ ũmwe na sekeli ĩmwe. Sekeli mĩongo thanthatũ nĩ ũndũ ũmwe na mina ĩmwe.

13“Ĩno nĩyo nthembo ĩla mũkaumasya: Kĩlungu kĩmwe kya thanthatũ kya eva kuma kwa kĩla omeli ya nganũ, na kĩlungu kĩmwe kya thanthatũ kya eva kuma kĩla omeli ya nganũ ĩla yĩtawa mbaale.

14Kĩthimo kĩla kyaĩlĩte kumw'a kya mauta, kĩthimĩtwe na vathi, nĩ kĩlungu kĩmwe kya ĩkũmi kya vathi kuma kĩla koli. (Koli ĩmwe nĩ ũndũ ũmwe na omeli ĩmwe, ĩla nĩ ũndũ ũmwe na vathi ĩkũmi.)

15Andũ makaumasya ĩlondu yĩmwe kuma kĩla ndĩthyanĩ ya malondu maana elĩ, ala me isesinĩ syĩ kĩw'ũ sya andũ ma Ĩsilaeli. Syĩndũ isu ikaumaw'a nthembo sya ngetha ya mbaa mbeke, nthembo sya kũvĩvw'a, na nthembo sya mũuo kwondũ wa kwĩw'anĩthw'a kwoo. Nĩasya ũu nyie Mwĩai Ngai Mũsumbĩ.

16Andũ onthe ma Ĩsilaeli makatwaĩaa mũtongoi wa Ĩsilaeli nthembo isu.

17Ũkeethĩawa wĩa wa mũsumbĩ kũnengane nthembo sya kũvĩvw'a, nthembo sya ngetha ya mbaa mbeke, na nthembo sya kũnyuwa sya ndivai ĩvindanĩ ya mboka: Mboka sya Kũtisa kwa Mwei, Savato, na mboka syonthe ila itw'ĩtwe sya andũ ma Ĩsilaeli. Mũsumbĩ akanenganae nthembo kwondũ wa ũekeo wa naĩ, nthembo sya mbaa mbeke, nthembo sya kũvĩvw'a na nthembo sya ngwatanĩo, nĩ kana syĩthĩwe nthembo ya wĩw'anĩthyo kwondũ wa andũ ma Ĩsilaeli.”

18Mwĩai Ngai Mũsumbĩ easya atĩĩ, “Mũthenyanĩ wa mbee wa mwei wa mbee, mũkathembaa kasalũ kate kĩema nĩ kana mũthesye Ĩkalũ.

19Mũthembi akoosaa nthakame ya nthembo ĩsu ya ũekeo wa naĩ, na kũmĩvaka ituĩnĩ sya mĩomo ya Ĩkalũ, konanĩ inya sya ũtiivo wa kĩthembeo, na ituĩnĩ sya mĩvĩa ya kũlika kĩwanzanĩ kĩla kĩ nthĩnĩ.

20Akeekaa o ũu mũthenyanĩ wa mũonza wa mwei ũsu wa mbee, kwondũ wa mũndũ o na wĩva ũla wĩkĩte naĩ atavangĩte kwĩka ũu, kana kwa kũlea kũmanya. Kwa nzĩa ĩsu mũkeethĩawa mwathesya Ĩkalũ.

21“Mũthenyanĩ wa ĩkũmi na inya wa mwei wa mbee, mũkeethĩawa na Mboka ya Vasaka. Mboka ĩsu ĩkeethĩawa yĩ ya mĩthenya mũonza, na ĩvindanĩ yĩu mũkaĩsaa mĩkate ĩuĩtwe ĩte mbota.

22Mũthenyanĩ ũsu mũtongoi akanenganae kasalũ kethĩwe nthembo kwondũ wa ũekeo wa naĩ syake, na sya andũ onthe ma Ĩsilaeli.

23Kĩla mũthenya, ĩvindanĩ ya mĩthenya ĩsu mũonza ya mboka, akanenganae tũsalũ mũonza na ndũũme mũonza ite kĩema, syĩthĩwe nthembo ya kũvĩvw'a yakwa nyie Mwĩai Ngai. O ta ũu kĩla mũthenya akanenganae nthenge yĩthĩwe nthembo kwondũ wa ũekeo wa naĩ.

24Akanenganae nthembo ya mũtu kĩlo ĩkũmi kwa kĩla kasalũ na kwa kĩla ndũũme, na lita itatũ sya mauta kwa kĩla kĩlo ĩkũmi sya mũtu.

25“Mũthenyanĩ wa ĩkũmi na itano wa mwei wa mũonza, na kwa ĩvinda ya mĩthenya mũonza ya mboka, mũtongoi akanenganae syĩndũ o isu syĩthĩwe nthembo sya ũekeo wa naĩ, nthembo sya kũvĩvw'a, nthembo sya ngetha ya mbaa mbeke na mauta.”

← Chapter 44 Jump to: Chapter 46 →