Ezekiel 41

Kamba (MBIVILIA ŨVOO MŨSEO)

← Chapter 40 Jump to: Chapter 42 →

1Nĩvo ĩndĩ mũndũ ũsu wandwaie nyũmbanĩ ĩla yĩ nthĩnĩ Vandũ vala Vatheu, na athima ituĩ ila syaĩ vo. Ituĩ isu syaĩ na ũthanthau wa mita itatũ kĩla ngalĩko.

2Ũlikĩlo wa nyũmba ĩsu waĩ na ũthanthau wa mita itano, na yaĩ na ngũta syaĩ na ũthanthau wa mita ilĩ na nyusu kĩla ngalĩko. Nĩwathimie nyũmba ĩsu, nayo yaĩ na ũasa wa mita mĩongo ĩlĩ, na ũthanthau wa mita ĩkũmi.

3Mũndũ ũsu nĩwalikile nyũmbanĩ ĩla yaĩ nthĩnĩ vyũ na athima ituĩ sya ũlikĩlo wayo. Ituĩ isu syaĩ na ũasa wa mita itatũ na nyusu na ũthanthau wa mita ĩmwe, na yaĩ na ngũta syaĩ na ũthanthau wa mita itatũ na nyusu kĩla ngalĩko.

4Nĩwathimie nyũmba ĩsu, nayo yaĩ na ũasa wa mita ĩkũmi na ũthanthau wĩana o ũu. Nyũmba ĩsu yaĩ mbee wa nyũmba ĩla yĩ katĩ. Nĩvo ĩndĩ wambĩie atĩĩ, “Vaa nĩvo Vandũ vala Vatheu Mũno.”

5Mũndũ ũsu nĩwathimie ũkũta wa Ĩkalũ, naw'o waĩ na ũthanthau wa mita itatũ. Vaĩ tũsũmba twathyũlũlũkĩte Ĩkalũ, twaĩ na ũthanthau wa mita ilĩ.

6Tũsũmba tũu twaakĩtwe ngolova itatũ, ĩmwe yĩ ĩũlũ wa ĩla ĩngĩ. Ũkũta wa Ĩkalũ waĩ na ituĩ kũũthyũlũlũka ila syambĩte ngolova isu ũkethĩa iitw'ĩĩkĩtwe nĩ ngũta sya Ĩkalũ.

7Nyũmba ila syaakĩtwe ndee kwĩlingĩla Ĩkalũ syaendaa ithanthaĩte o ũndũ ngolova yambatĩte. Mwako ũla waakĩtwe wĩlingĩlĩte Ĩkalũ wongelekete ũthanthau o ũndũ wambatĩte, ũkethĩa nyũmba ila syĩ ĩũlũ nĩ nthanthau kwĩ ila syĩ ungu wasyo. Vaĩ ngasi yambatĩte kuma nyũmba sya nthĩ ĩkesĩla nyũmbanĩ sya katĩ, ĩkavika nyũmbanĩ ila sya ĩũlũ vyũ.

8O ta ũu nĩnoonie kana Ĩkalũ yĩu yaakĩtwe wambĩlĩĩlyonĩ mũtũlu ngalĩko syonthe, ũla now'o waĩ wambĩlĩĩlyo wa nyũmba ila syaakĩtwe ũtee. Wambĩlĩĩlyo wa nyũmba isu syaĩ ũtee wa Ĩkalũ waĩ na ũthanthau wa mita itatũ.

9Ũkũta wa nza wa nyũmba ila syaĩ ũtee wa Ĩkalũ waĩ na ũthanthau wa mita ilĩ na nyusu. Mwanya ũla waĩ katĩ wa nyũmba ila syaĩ ũtee wa Ĩkalũ,

10na nyũmba sya athembi, waĩ na ũthanthau wa mita ĩkũmi kwĩlingĩla Ĩkalũ.

11Kuma mwanyanĩ ũsu, vaĩ mĩomo ya kũlika nyũmbanĩ isu syaĩ ũtee. Mũomo ũmwe waĩ ngalĩko ya ĩũlũ na ũngĩ ngalĩko ya ĩtheo. Mwanya ũla watiĩtwe wĩ mũthei waĩ na ũthanthau wa mita ilĩ na nyusu kũthyũlũlũka.

12Ngalĩko ya ũthũĩlonĩ wa syũa wa Ĩkalũ vaĩ mwako waĩ na ũasa wa mita mĩongo ĩna na itano, na ũthanthau wa mita mĩongo ĩtatũ na itano. Ngũta syaw'o syaĩ na ũthanthau wa mita ilĩ na nyusu.

13Mũndũ ũsu nĩwathimie Ĩkalũ, nayo yaĩ na ũasa wa mita mĩongo ĩtano. Kĩwanza kya Ĩkalũ na mwako ũla waĩ ngalĩko ya wumĩlonĩ wa syũa, wĩ na ngũta syaw'o syaĩ na ũasa wa mita mĩongo ĩtano.

14Ũthanthau wa kuma ngalĩko ya mbee ya Ĩkalũ ĩla yaĩ ngalĩko ya wumĩlonĩ wa syũa, vamwe na kĩwanza kĩla kyaĩ nza wa Ĩkalũ waĩ wa mita mĩongo ĩtano.

15Nĩvo ĩndĩ wathimie ũasa wa mwako ũla wasyaĩtye kĩwanza kĩla kyaĩ ngalĩko ya ũthũĩlonĩ wa syũa, na ngũta ila syaĩ ngalĩko syelĩ, naw'o o ta ũu waĩ wa mita mĩongo ĩtano. Nyũmba ya mumĩlo ya Ĩkalũ, Vandũ vala Vatheu, na Vandũ vala Vatheu Mũno,

16syaanakavĩtw'e kwa kũathĩĩwa mbwaũ kĩla ngalĩko kuma nthĩ kũvika ndĩlĩsyanĩ. Ndĩlĩsya isu syaĩ mbw'ĩke.

17Mwanyanĩ ũla waĩ ngalĩko ya nza ĩũlũ wa mũomo wa kũlika Vandũ vala Vatheu Mũno, na mokũtanĩ onthe ma Vandũ vala Vatheu na Vandũ vala Vatheu Mũno,

18kwatemeleelwe mavisa ma mĩkĩndũ na ma syũmbe syĩ nthwau syĩtawa akelũvi. Kĩla ĩvisa ya mũkĩndũ yaatĩĩwe nĩ ĩvisa ya mũkelũvi, kũthyũlũlũka nyũmba yonthe. Kĩla visa wa mũkelũvi waĩ na mothyũ elĩ.

19Ũthyũ ũmwe waĩ wa mũndũ na wasyaĩtye mũkĩndũ ngalĩkonĩ ĩmwe, na ũla ũngĩ waĩ wa mũnyambũ wa mũika na wasyaĩtye mũkĩndũ ũla waĩ ngalĩko ĩla ĩngĩ. Mavisa asu matemeleelwe ngũtanĩ syonthe sya Ĩkalũ.

20Kuma nthĩ kũvika ĩũlũ wa mũomo wa Vandũ vala Vatheu, vatemeleelwe mavisa ma akelũvi na ma mĩkĩndũ.

21Ituĩ syonthe sya mĩomo ya Vandũ vala Vatheu Mũno nĩsyeanene. Mbee wa mũvĩa wa Vandũ vala Vatheu Mũno vaĩ kĩndũ kyailyĩ

22kĩthembeo kya mbwaũ, kĩla kyaĩ na ũtũlu wa mita ĩmwe na nyusu, ũasa wa mita ĩmwe na ũthanthau wĩana o ũu. Ituĩ syakyo sya konanĩ, ĩtina yakyo, na ngalĩko syakyo syonthe syaseũvĩtw'e na mbwaũ. Mũndũ ũsu nĩwambĩie atĩĩ, “Ĩno nĩyo mesa ĩla yĩ mbee wa Mwĩai Ngai.”

23Vaĩ mũomo wa kũlika Vandũ vala Vatheu, na ũngĩ wa kũlika Vandũ vala Vatheu Mũno. Kĩla ũmwe wa mĩomo ĩsu waĩ kũndũ kwĩlĩ.

24Kĩla mũomo waanĩtw'e kũndũ kwĩlĩ ũkethĩa nũtonya kũvingũkĩla katĩ.

25Mĩomo ya Vandũ vala Vatheu nĩyatemeleelwe mavisa ma mĩkĩndũ na ma syũmbe ilĩ syĩ nthwau syĩtawa akelũvi, o ta ala matemeleelwe mokũtanĩ. Mũomonĩ wa nyũmba ya mumĩlo vaĩ kĩndũ kya kwĩkĩa muunyĩ kĩseũvĩtw'e na mbwaũ.

26Ngalĩkonĩ syonthe sya ũkũta wa nyũmba ĩsu, vaĩ ndĩlĩsya nini syaanakavĩtw'e kwa kũtemeleelwa mavisa ma mĩkĩndũ.

← Chapter 40 Jump to: Chapter 42 →