Ezekiel 48

Kamba (MBIVILIA ŨVOO MŨSEO)

← Chapter 47 Jump to:

1“Aa nĩmo masyĩtwa ma mbaĩ na isio syasyo: Kuma mũvakanĩ wa ngalĩko ya ĩũlũ vala ve nzĩa ya Ethiloni kũthi kũvika Ũlikĩlonĩ wa Amathi nginya ndũanĩ ya Asali-enoni ĩla yĩ mũvakanĩ wa Ndamasikũ, na Amathi ngalĩko ya ĩũlũ na kũendeea kuma ngalĩko ya wumĩlonĩ wa syũa nginya ũthũĩlonĩ wa syũa, nĩkyo kĩsio kĩla kĩnengwa mbaĩ ya Ndani.

2Mbaĩ ya Aseli ĩkanengwa kĩsio kĩla kĩvakanĩte na kĩla kya mbaĩ ya Ndani, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

3Mbaĩ ya Navutalĩ ĩkanengwa kĩsio kĩla kĩvakanĩte na kĩla kya mbaĩ ya Aseli, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

4Mbaĩ ya Manase ĩkanengwa kĩsio kĩla kĩvakanĩte na kĩla kya mbaĩ ya Navutalĩ, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

5Mbaĩ ya Evalaimu ĩkanengwa kĩsio kĩla kĩvakanĩte na kĩla kya mbaĩ ya Manase, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

6Mbaĩ ya Lũveni ĩkanengwa kĩsio kĩla kĩvakanĩte na kĩla kya mbaĩ ya Evalaimu, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

7Mbaĩ ya Yuta ĩkanengwa kĩsio kĩla kĩvakanĩte na kĩla kya mbaĩ ya Lũveni, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

8“Kĩsio kĩla kĩatĩĩe kĩla kya mbaĩ ya Yuta kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa, nĩkyo kĩvathwa kĩthĩwe kĩsio kya mwanya. Kĩkeethĩwa kĩna ũthanthau wa kĩlomita ĩkũmi na ilĩ na nyusu, kuma ngalĩko ya ĩũlũ kũvika ngalĩko ya ĩtheo. Ũasa wakyo kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa ũkeethĩwa wĩanene na wa isio ila inengetwe mbaĩ ila ingĩ. Ĩkalũ yĩkeethĩwa kĩsionĩ kĩu kĩ katĩ.

9Kĩsio kĩla mũũvatha kwondũ wa Mwĩai Ngai kĩkeethĩwa kĩna ũasa wa kĩlomita ĩkũmi na ilĩ na nyusu, na ũthanthau wa kĩlomita ĩkũmi.

10Athembi makeethĩwa na kĩsio nthĩnĩ wa kĩsio kĩu kĩtheu. Kuma ngalĩko ya wumĩlonĩ wa syũa kũvika ũthũĩlonĩ wa syũa, kĩsio kĩu kyoo kĩkeethĩwa kĩ kya kĩlomita ĩkũmi na ilĩ na nyusu, na kuma ngalĩko ya ĩũlũ kũvika ngalĩko ya ĩtheo kĩkeethĩwa kĩ kya kĩlomita itano. Ĩkalũ ya Mwĩai Ngai yĩkeethĩwa kĩsionĩ kĩu katĩ.

11Kĩsio kĩu kĩkeethĩwa kĩ kya athembi ala avathe, nzyawa sya Nzatoki, ala manthũkũmie na ũĩkĩĩku, na mayaandia yĩla andũ ma Ĩsilaeli mandiie ũndũ Alivai meekie.

12Kwoou makeethĩwa na kĩsio kĩu kya mwanya kuma kĩsionĩ kĩla kĩtheu kya nthĩ, kĩsio kĩla kĩtheu vyũ, kĩla kĩvakanĩte na kĩsio kya Alivai.

13“O ta ũu Alivai makeethĩwa na kĩsio kyoo ngalĩko ya ĩtheo ya kĩla kya athembi. Kĩsio kĩu o nakyo kĩkeethĩwa na ũasa wa kĩlomita ĩkũmi na ilĩ na nyusu, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa. Kĩkeethĩwa na ũthanthau wa kĩlomita itano kuma ngalĩkonĩ ya ĩũlũ kũvika ya ĩtheo.

14Kĩsio kĩla kĩvathĩtwe kwondũ wa Mwĩai Ngai nĩkyo kĩsio kĩla kĩseo vyũ nthĩ ĩsu yonthe, na vai kĩmwe kya kĩsio kyakyo kyaĩlĩte kũthoow'a, kũkũanw'a na kĩngĩ kana kũnengwa mũndũ. Kĩsio kĩu nĩ kĩtheu; nĩ kya Mwĩai Ngai.

15“Kĩlungu kya kĩsio kĩu kya mwanya kĩla kĩtialĩte, kya ũasa wa kĩlomita ĩkũmi na ilĩ na nyusu, na ũthanthau wa kĩlomita ilĩ na nyusu, kĩkatũmĩawa kwa maũndũ ala angĩ. Andũ nĩmatonya kũtũa vo na kĩyĩthĩwa na isesi. Ndũa ĩkeethĩwa kĩsionĩ kĩu katĩ.

16Ndũa ĩsu ĩkeethĩwa yĩanene ngalĩko syonthe, kĩla ngalĩko ĩkeethĩwa na ũasa wa mita ngili ilĩ, maana elĩ na mĩongo ĩtano.

17Ndũa ĩsu ĩkeethĩwa ĩthyũlũlũkĩtwe nĩ mwanya wĩ na ũthanthau wa mita ĩana na mĩongo ĩlĩ na itano kĩla ngalĩko.

18Kĩsio kĩla kĩtiala kya kĩsio kĩu kĩtheu kĩkeethĩwa na ũasa wa kĩlomita itano, na ũthanthau wa kĩlomita ilĩ na nyusu ngalĩko ya wumĩlonĩ wa syũa, na ũasa wa kĩlomita itano na ũthanthau wa kĩlomita ilĩ na nyusu ngalĩko ya ũthũĩlonĩ wa syũa. Ũsyao wa kĩsio kĩu ũkeethĩawa lĩu wa ala matethasya wĩa ndũanĩ ĩsu.

19Ala matethasya wĩa ndũanĩ ĩsu ma mbaĩ o na yĩva ya Ĩsilaeli makaĩmaa kĩsionĩ kĩu.

20Kwoou kĩsio kyonthe kĩla mwĩvatha, kĩla nĩ kĩsio kĩtheu vamwe na kĩsio kya ndũa, kĩkeethĩwa kĩanene ngalĩko syonthe; kĩkeethĩwa na ũasa wa kĩlomita ĩkũmi na ilĩ na nyusu kĩla ngalĩko.

21“Kĩsio kĩla kĩtialĩte ngalĩko syelĩ sya kĩsio kĩla kĩtheu, na kĩsio kya ndũa, kĩkeethĩwa kĩ kya mũtongoi. Kĩsio kĩu kĩkeethĩwa kĩendete ngalĩko ya wumĩlonĩ wa syũa, kuma kĩsionĩ kĩla kĩtheu kĩna ũthanthau wa kĩlomita ĩkũmi na ilĩ na nyusu, kũvika mũvakanĩ wa ngalĩko ya wumĩlonĩ wa syũa. O ta ũu kĩsio kĩu kĩkeethĩwa kĩendete ngalĩko ya ũthũĩlonĩ wa syũa, kuma kĩsionĩ kĩu kĩtheu kũvika mũvakanĩ ũla wĩ ngalĩko ya ũthũĩlonĩ wa syũa. Isio isu syelĩ ila syĩ na ũasa wĩana wa isio ila syĩnengwa mbaĩ sya Ĩsilaeli ikeethĩwa syĩ sya mũtongoi. Kĩsio kĩla kĩtheu kĩla katĩ wakyo veĩthĩwa wĩkalo wa Ngai,

22na kĩsio kya Alivai, vamwe na kĩla kya ndũa, ikeethĩwa katĩ wa kĩsio kya mũtongoi. Kĩsio kya mũtongoi kĩkeethĩwa katĩ wa kĩsio kya mbaĩ ya Yuta na kĩsio kya mbaĩ ya Mbengyameni.

23“Mbaĩ ila itialĩte ikaaĩwa isio syoo ta ũũ: Mbaĩ ya Mbengyameni ĩkanengwa kĩsio kyayo kuma ngalĩko ya wumĩlonĩ wa syũa kũthi kũvika ũthũĩlonĩ wa syũa.

24Mbaĩ ya Simioni ĩkanengwa kĩsio kĩla kĩvakanĩte na kĩla kya mbaĩ ya Mbengyameni, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

25Mbaĩ ya Isakali ĩkanengwa kĩsio kĩla kĩvakanĩte na kĩla kya mbaĩ ya Simioni, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

26Mbaĩ ya Nzevuluni ĩkanengwa kĩsio kĩla kĩvakanĩte na kĩla kya mbaĩ ya Isakali, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

27Mbaĩ ya Ngandi ĩkanengwa kĩsio kĩla kĩvakanĩte na kĩla kya mbaĩ ya Nzevuluni, kuma ngalĩko ya wumĩlonĩ wa syũa kũvika ngalĩko ya ũthũĩlonĩ wa syũa.

28Kĩsio kĩla kĩvakanĩte na kya mbaĩ ya Ngandi, kwelekela ngalĩko ya ĩtheo, mũvaka ũsu ũkauma ndũanĩ ya Tamalĩ kũthi kũvika kĩw'ũnĩ kĩla kĩ Meliva-katesi, na ĩndĩ ũithi wĩsĩlĩte kalũsĩnĩ ka Misili kũvika Ũkanganĩ wa Menditelenia.

29Ĩsu nĩyo nthĩ ĩla mwĩaanĩsya andũ ma mbaĩ sya Ĩsilaeli yĩthĩwe ũtiĩwa woo; kĩla mbaĩ ĩkanengwa kĩsio kyayo. Nĩasya ũu nyie Mwĩai Ngai Mũsumbĩ.

30“Ndũa ya Yelũsalemu ĩkeethĩwa na mĩvĩa ta ũũ: Ũkũta wa ngalĩko ya ĩũlũ ũkeethĩwa na ũasa wa mita ngili ilĩ, maana elĩ na mĩongo ĩtano,

31na ũkeethĩwa na mĩvĩa ĩtatũ: mũvĩa wa Lũveni, mũvĩa wa Yuta, na mũvĩa wa Livai. Mĩvĩa ĩsu ĩkeetwa masyĩtwa ma mbaĩ sya Ĩsilaeli.

32Ũkũta wa ngalĩko ya wumĩlonĩ wa syũa ũkeethĩwa na ũasa wa mita ngili ilĩ, maana elĩ na mĩongo ĩtano, na ũkeethĩwa na mĩvĩa ĩtatũ: Mũvĩa wa Yosevu, mũvĩa wa Mbengyameni, na mũvĩa wa Ndani.

33Ũkũta wa ngalĩko ya ĩtheo ũkeethĩwa na ũasa wa mita ngili ilĩ, maana elĩ na mĩongo ĩtano, na ũkeethĩwa na mĩvĩa ĩtatũ: Mũvĩa wa Simioni, mũvĩa wa Isakali, na mũvĩa wa Nzevuluni.

34Ũkũta wa ngalĩko ya ũthũĩlonĩ wa syũa ũkeethĩwa na ũasa wa mita ngili ilĩ, maana elĩ na mĩongo ĩtano, na ũkeethĩwa na mĩvĩa ĩtatũ: Mũvĩa wa Ngandi, mũvĩa wa Aseli, na mũvĩa wa Navutalĩ.

35Ũasa wa ũkũta ũsu w'onthe kũthyũlũlũka ndũa ũkeethĩwa mita ngili kenda. Kuma yu na kũendeea ndũa ĩsu ĩkeetawa Mwĩai Ngai E Vo.”

← Chapter 47 Jump to: