Ezekiel 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Mũthenyanĩ wa katano wa mwei wa thanthatũ, mwaka wa thanthatũ kuma twatwawa nthĩ ya ũeninĩ, nekalĩte nyũmba kwakwa nĩ na atumĩa ma Yuta. Tũilyĩ vau nĩneewie vinya wa Mwĩai Ngai Mũsumbĩ wĩ ĩũlũ wakwa.

2Nĩnasyaisye noona kĩndũ kyaĩ na mũvw'ano wa mũndũ. Kuma vala voonekaa ta kyo kĩnyunyu kyake na kũtheea nthĩ ailyĩ ta mwaki, na kuma kĩnyunyunĩ kwambata atisatisaa ta mbulonzi ngute ĩkathea.

3Nĩwatambũũkisye kĩla kyailyĩ ta kw'oko kwake na ambũkĩlya angwete nzw'ĩĩ yakwa. Veva nĩwambũkĩlilye ambĩkalya katĩ wa ĩtu na nthĩ, na andwaa nginya Yelũsalemu nĩ mawoninĩ ma Ngai. Nĩwandwaie ũlikĩlonĩ ũla wa nthĩnĩ wa mũvĩa wa ngalĩko ya ĩũlũ wa Ĩkalũ vala vaĩ mũvw'anano wa kũthatya, ũla ũthatasya Ngai.

4Nĩnasyaisye noona ũtheu mũtisu wa Ngai wa Ĩsilaeli, o ta woninĩ ũla noonie yĩla naĩ ũiĩnĩ.

5Nĩvo ĩndĩ wambĩie atĩĩ, “Mwana wa mũndũ, sisya ngalĩko ya ĩũlũ.” Kwoou nĩnasyaisye ngalĩko ya ĩũlũ, na noona mũvw'anano ũla ũthatasya Ngai wĩ ngalĩko ya ĩũlũ ya ũlikĩlo wa mũvĩa wa kĩthembeo.

6Nĩwangũlilye atĩĩ, “Mwana wa mũndũ, nũkwona ũndũ mekwĩka? Kwa sisya wone mothatyo manene ala andũ ma Ĩsilaeli mekwĩkĩa vaa, mothatyo ala mekũtuma numa vandũ vakwa vatheu. Ĩndĩ nũkwona maũndũ angĩ ma kũthatya mũno o na mbee wa aya.”

7Nĩwasyokie andwaa mũomonĩ wa ũlikĩlo wa Ĩkalũ, na yĩla nasyaisye, nĩnoonie ĩima ũkũtanĩ.

8Nĩvo ĩndĩ wambĩie atĩĩ, “Mwana wa mũndũ, yu vũthũa ũkũta ũũ.” Yĩla navũthũie ũkũta ũsu, nĩnoonie mũomo.

9Nĩwambĩie atĩĩ, “Lika nthĩnĩ wone maũndũ mathũku na ma kũthatya ala andũ mekwĩkĩa vaa.”

10Kwoou nĩnalikile nthĩnĩ na nasisya. Kĩla vandũ mokũtanĩ asu kwakululĩtwe mavisa ma nyamũ sya kĩla mũthemba, tũsamũ tũnini na nyamũ ingĩ mbuku. O ta ũu nĩkwakululĩtwe mĩvw'anano ya ngai syonthe sya andũ ma Ĩsilaeli.

11Mbee wa syĩndũ isu nĩvaũngamĩte atumĩa mĩongo mũonza ma andũ ma Ĩsilaeli, na Ya-asania mwana wa Savani akaũngama vamwe namo. Kĩla mũtumĩa akwete kĩndũ kya kũtoeesya ũvani, na syũki ya ũvani yĩtoete yambatĩte ĩũlũ.

12Nĩvo ĩndĩ waneenie nakwa angũlya atĩĩ, “Mwana wa mũndũ, nĩwoona kĩla atumĩa ma andũ ma Ĩsilaeli mekwĩkĩa kĩvindunĩ, kĩla ũmwe e nyũmbanĩ ya kũthaithĩa mĩvw'anano? Nĩkwĩthĩwa maneenaa makasya, ‘Mwĩai Ngai ndatwene. Mwĩai Ngai nũekete nthĩ yaitũ.’ ”

13Nĩwasyokie ĩngĩ ambĩa atĩĩ, “Nũkwona ĩngĩ maũndũ ma kũthatya mũno o na mbee, ala andũ aa mekĩte.”

14Nĩvo ĩndĩ wandwaie ũlikĩlonĩ wa mũvĩa wa ngalĩko ya ĩũlũ wa Ĩkalũ ya Mwĩai Ngai. Nĩnoonie iveti iilyĩ nthĩ ikĩĩa nũndũ wa kĩkw'ũ kya ngai ĩla yeetawa Tamusi.

15Nĩwaneenie nakwa angũlya atĩĩ, “Mwana wa mũndũ, nĩwoona ũu? Nũkwona ĩngĩ maũndũ ma kũthatya mũno o na mbee wa aa.”

16Nĩwandwaie kĩwanzanĩ kya nthĩnĩ kya Ĩkalũ ya Mwĩai Ngai. Vau mũomonĩ wa Ĩkalũ, katĩ katĩ wa vala andũ mesĩlaa na kĩthembeo, vaĩ aũme ta mĩongo ĩlĩ na atano. Aũme asu moonetye Ĩkalũ ya Mwĩai Ngai mĩongo yoo, na makasisya ngalĩko ya wumĩlonĩ wa syũa maithaitha syũa yĩkyuma.

17Nĩwaneenie nakwa angũlya atĩĩ, “Mwana wa mũndũ, nĩwoona ũu? Nĩ ũndũ ũnini mũno andũ ma Yuta kwĩka maũndũ ma kũthatya ũndũ mekwĩka vaa, makausũsya nthĩ na ũng'endu na kũnthokoa nĩthate mbeange? Kwa masisye mekĩĩte tũũvonge manyiũũnĩ moo.

18Nũndũ wa maũndũ asu, nĩngũmakany'a nĩ mũthatu. Ndimaeka kana kũmew'ĩa tei. O na maĩĩa matũnĩ makwa na wasya mũnene, ndimethukĩĩsya.”

← Chapter 7 Jump to: Chapter 9 →