Ezekiel 47

Kamba (MBIVILIA ŨVOO MŨSEO)

← Chapter 46 Jump to: Chapter 48 →

1Mũndũ ũsu nĩwandũngie mũomonĩ wa Ĩkalũ. Vau nĩnoonie kĩw'ũ kyumĩlĩĩle ungu wa mũomo ũsu, kĩendete ngalĩko ya wumĩlonĩ wa syũa, ngalĩko ĩla Ĩkalũ yasyaĩtye. Kĩw'ũ kĩu kyatheeete kuma mũomonĩ wa ngalĩko ya ĩtheo ya Ĩkalũ, na kuma ngalĩko ya ĩtheo ya kĩthembeo.

2Mũndũ ũsu nĩwasyokie ambumaalĩlya mũvĩanĩ wa ngalĩko ya ĩũlũ, na andongoesya tweelingĩla twĩsĩlĩte nza twathi mũvĩanĩ wa nza, ũla ũsyaĩtye ngalĩko ya wumĩlonĩ wa syũa. Kĩw'ũ nĩkyatheeete kuma ngalĩko ya ĩtheo ya mũvĩa ũsu.

3Mũndũ ũsu nĩwaendie ngalĩko ya wumĩlonĩ wa syũa akwete ũlii wa kũthima, na athima mita maana atano kũtheea na ũsĩ. Nĩvo ĩndĩ wandongoeisye kwĩsĩla kĩw'ũnĩ kĩu nakyo kyambikĩte ngũlimũnĩ.

4Nĩwasyokie athima mita ingĩ maana atano, na andongoesya kwĩsĩla kĩw'ũnĩ kĩu, nakyo kyambikĩte mau. Nĩwathimie mita ingĩ maana atano na andongoesya kwĩsĩla kĩw'ũnĩ kĩu, nakyo kyambikĩte kĩnyunyunĩ.

5Nĩwasyokie athima mita ingĩ maana atano. Vau ũsĩ ũsu waĩ mũliku ũkethĩa nditonya kũinga, nĩkwĩthĩwa kĩw'ũ kĩu nĩkyongelekete. Ũsĩ ũsu waĩ mũliku ũkethĩa mũndũ ndatonya kũinga ate o kwa kũthambĩa.

6Nĩwangũlilye atĩĩ, “Mwana wa mũndũ, nĩwoona ũu?” Nĩvo ĩndĩ mũndũ ũsu wandongoeisye andũnga twĩsĩlĩte ũtee wa ũsĩ.

7Nĩsyokete, nĩnoonie mĩtĩ mingĩ ĩmeete ũtee wa ũsĩ ũsu ngalĩko syelĩ.

8Mũndũ ũsu nĩwambĩie atĩĩ, “Kĩw'ũ kĩĩ kĩtheete kĩendete kĩsionĩ kya ngalĩko ya wumĩlonĩ wa syũa, na kĩkathi Mwandanĩ wa Yolotani na Ũkanganĩ wa Mũnyũ. Yĩla kyalika ũkanganĩ ũsu kĩtumaa kĩw'ũ kyaw'o kĩla kĩ mũnyũ kĩthela mũnyũ.

9Vala ũsĩ ũũ wĩsĩlĩte, vakeethĩawa syũmbe sya mĩthemba mingĩ syĩ thayũ; vakeethĩawa makũyũ maingĩ, nũndũ kĩw'ũ kĩĩ kyathi vo, kĩw'ũ kĩu kya ũkanga kĩkeethĩawa kĩte mũnyũ. Kwoou kĩla vandũ ũsĩ ũũ wesĩla, syĩndũ syonthe ila syĩ vo ikekalaa thayũ.

10Atei ma makũyũ makaũngamaa ũtee wa ũkanga maitea makũyũ. Kuma Eni-ngeti kũvika Eni-ekilaimu kũkeethĩwa kũndũ kwa kũnyaĩsya neti sya kũtea makũyũ. Makũyũ maw'o makeethĩwa ma mĩthemba mingĩ, ta ala me Ũkanganĩ wa Menditelenia.

11Ĩndĩ kĩw'ũ kĩla kĩ ndianĩ na isoonĩ ila syĩ ũtee wa ũkanga kĩendeea kwĩthĩwa kĩ mũnyũ, nĩ kana andũ maumasye mũnyũ kw'o.

12Mĩtunda ya mĩthemba yonthe ĩkameaa ũtee wa ũsĩ ũsu ngalĩko syelĩ. Matũ mayo maikoma, o na ndĩkaeka kũsyaa matunda. Ĩkasyaa matunda kĩla mwei, nũndũ kĩw'ũ kĩu kyumĩte Ĩkalũnĩ kĩendete vala ve mĩtunda ĩsu. Matunda asu makeethĩwa lĩu, na matũ ma mĩtunda ĩsu makatũmĩawa kũiita andũ.”

13Mwĩai Ngai Mũsumbĩ easya atĩĩ, “Ĩno nĩyo mĩvaka ĩla mwĩĩaany'a nthĩ nayo yĩthĩwe ũtiĩwa wa mbaĩ ĩkũmi na ilĩ sya Ĩsilaeli. Mbaĩ ya Yosevu ĩkanengwa ilungu ilĩ.

14Aany'ai nthĩ ĩsu ilungu syĩanene. Nĩneevĩtie kana nganenga aaũmae menyu nthĩ ĩsu, na nthĩ ĩno ĩkatw'ĩka ũtiĩwa wenyu.

15“Mũvaka wa nthĩ ũkeethĩwa ũilyĩ ta ũũ: Ngalĩko ya ĩũlũ mũvaka ũsu ũkeethĩwa wumĩte Ũkanganĩ wa Menditelenia, ũkesĩla ndũanĩ ya Ethiloni, na ũkesĩla Ũlikĩlonĩ wa Amathi, na ũkathi kũvika ndũanĩ ya Nzetati.

16Kuma vau ũkaendeea nginya ndũanĩ ya Mbelotha na ya Sivilaimu, ila syĩ mũvakanĩ wa Ndamasikũ na wa Amathi. Mũvaka ũsu ũkaendeea nginya ndũanĩ ya Tikoni ĩla yĩ mũvakanĩ wa kĩsio kya Aulani.

17Kwoou mũvaka wa ngalĩko ya ĩũlũ ũkauma Ũkanganĩ wa Menditelenia welekele ngalĩko ya wumĩlonĩ wa syũa nginya ndũanĩ ya Asali-enoni, ĩla yĩ ngalĩko ya ĩũlũ ya mũvaka wa Ndamasikũ, na mũvaka wa Amathi ũkeethĩwa ngalĩko ya ĩũlũ ya mũvaka ũsu. Ũsu nĩ w'o mũvaka wa ngalĩko ya ĩũlũ.

18“Mũvaka wa ngalĩko ya wumĩlonĩ wa syũa ũkambĩĩa vandũ katĩ wa Aulani na Ndamasikũ, na ũitheea kwĩsĩla Ũsĩnĩ wa Yolotani katĩ wa Ngileati na nthĩ ya Ĩsilaeli, kũthi kũvika ũkanganĩ wa wumĩlonĩ wa syũa na kũthi kũvika Tamalĩ ĩla yĩ ũtee wa Ũkanga Mũkw'ũ. Ũsu nĩw'o ũkethĩwa mũvaka wa ngalĩko ya wumĩlonĩ wa syũa.

19“Mũvaka wa ngalĩko ya ĩtheo ũkauma Tamalĩ kũthi kũvika kĩw'ũnĩ kĩla kĩ Meliva-katesi, na ĩndĩ ũithi wĩsĩlĩte kalũsĩnĩ ka Misili, kũvika Ũkanganĩ wa Menditelenia. Ũsu nĩ w'o wĩĩthĩwa mũvaka wa ngalĩko ya ĩtheo.

20“Ngalĩko ya ũthũĩlonĩ wa syũa Ũkanga wa Menditelenia nĩ w'o wĩĩthĩwa mũvaka, kũthi kũvika vandũ vasyaanĩtye na Ũlikĩlo wa Amathi. Ũsu nĩ w'o wĩĩthĩwa mũvaka wa ũthũĩlonĩ wa syũa.

21“Aany'ai nthĩ ĩno katĩ wenyu, kwĩanana na mbaĩ sya Ĩsilaeli.

22Mũkamĩaany'a ĩtw'ĩke ũtiĩwa wenyu na wa aeni ala matwĩe katĩ wenyu, na me na syana isyaĩwe katĩ wenyu. Nĩmethĩwe kwenyu ta nzyawa sya Ĩsilaeli, na maiaĩwa ũtiĩwa vamwe na mbaĩ sya Ĩsilaeli.

23Aeni ala me nthĩ yenyu meaĩwa kĩsio kya nthĩ, vamwe na andũ ma mbaĩ ya Ĩsilaeli ĩla matwĩe nayo.” Nĩasya ũu nyie Mwĩai Ngai Mũsumbĩ.

← Chapter 46 Jump to: Chapter 48 →