Ezekiel 40 — Kamba (MBIVILIA ŨVOO MŨSEO)

1Mũthenyanĩ wa ĩkũmi wa mwei wa mbee mwaka wa mĩongo ĩlĩ na itano kuma twatwawa nthĩ ya ũeninĩ, ũla waĩ mwaka wa ĩkũmi na inya ĩtina wa kũkwatwa kwa Yelũsalemu, vinya wa Mwĩai Ngai nĩwookie ĩũlũ wakwa.

2Nĩneethĩiwe na woni, na woninĩ ũsu noona Ngai andwaa nthĩ ya Ĩsilaeli, na ambia kĩĩmanĩ kĩtũlu mũno, kĩla ngalĩkonĩ yakyo ya ĩtheo vaĩ myako yailyĩ ta ndũa.

3Yĩla wandwaie vau, nĩnoonie mũndũ wailyĩ kyũma kya mbulonzi. Mũndũ ũsu aũngyĩ mũvĩanĩ, na akwete ũlii mũũmu, na mũtĩ wa kũthima.

4Mũndũ ũsu nĩwaneenie nakwa ambĩa atĩĩ, “Mwana wa mũndũ, ĩthukĩĩsye na ũisisya nesa maũndũ ala ngũkwony'a na ũimasũanĩa, nũndũ maũndũ asu nĩmo matuma ũetwe vaa. Tavya andũ ma Ĩsilaeli maũndũ onthe ala ũkwona.”

5Nĩnoonie ũkũta wathyũlũlũkĩte Ĩkalũ ũkakomana. Mũndũ ũsu nĩwoosie mũtĩ wake wa kũthima, ũla waĩ na ũasa wa mita itatũ, na athima ũkũta ũsu. Ũkũta ũsu waĩ na ũtũlu wa mita itatũ, na ũthanthau wa mita itatũ.

6Nĩvo ĩndĩ waendie mũvĩanĩ ũla wasyaĩtye ngalĩko ya wumĩlonĩ wa syũa, ambata na ngasi syaw'o na athima ũtũlu wa mũvĩa, naw'o waĩ mita itatũ.

7Vaĩ tũsũmba twa asikalĩ twaakĩtwe ngalĩko syelĩ sya ũlikĩlo wa mũvĩa. Kĩla kasũmba kaĩ na ũasa wĩanene na ũthanthau: Ũasa wa mita itatũ na ũthanthau wa mita itatũ. Ngũta ila syaanĩtye tũsũmba tũu syaĩ na ũthanthau wa mita ilĩ na nyusu. Mbee wa tũsũmba tũu twa asikalĩ vaĩ nzĩa yaĩ na ũasa wa mita itatũ, ĩla yaendete nyũmbanĩ ya mumĩlo ĩla yathimanĩte na Ĩkalũ.

8Nĩvo ĩndĩ wathimie nyũmba ĩsu ya mumĩlo, nayo yaĩ na ũtũlu wa mita inya.

9O ta ũu nĩwathimie ngũta sya nyũmba ĩsu, na syaĩ na ũtũlu wa mita inya. Yaĩ na ituĩ syĩ na ũthanthau wa mita ĩmwe. Nyũmba ĩsu ya mumĩlo yaĩ vakuvĩ mũno na Ĩkalũ.

10Kĩla ngalĩko ya nzĩa ĩsu ya kũlikĩla mũvĩanĩ wa ngalĩko ya wumĩlonĩ wa syũa yaĩ na tũsũmba tũtatũ twĩanene. O ta ũu ituĩ ila syaĩ ngalĩko syelĩ nĩsyeanene.

11Nĩvo ĩndĩ mũndũ ũsu wathimie ũthanthau wa mwanya wa kũlika mũvĩanĩ, naw'o waĩ mita thanthatũ na nyusu. Nĩwathimie ũthanthau wa mũvĩa ũsu, naw'o waĩ mita itano.

12Mbee wa tũsũmba twa asikalĩ vaĩ ũkũta mũkuvĩ, ũla waĩ na ũtũlu wa nyusu mita, na o ta ũu ũthanthau wa nyusu mita. Tũsũmba twa asikalĩ tw'onthe twaĩ mita itatũ kĩla ngalĩko.

13Mũndũ ũsu nĩwathimie ũasa wa kuma ũkũta wa ĩtina wa kasũmba kamwe kũvika ũkũta wa ĩtina wa kasũmba kala kangĩ, naw'o waĩ mita ĩkũmi na ilĩ na nyusu.

14O ta ũu nĩwathimie nyũmba ĩla yaĩ mumĩlo; nyũmba ĩsu yaĩ na ũthanthau wa mita ĩkũmi.

15Kuma ngalĩko ya mbee ya mũvĩa kũthi kũvika ngalĩko ya nthĩnĩ ya nyũmba ĩla yaĩ mumĩlo, vaĩ ũasa wa mita mĩongo ĩlĩ na itano.

16Ũkũta wa nza wa tũsũmba tũu waĩ na ndĩlĩsya, na o ta ũu ngũta sya nthĩnĩ sya tũsũmba tũu syaĩ na ndĩlĩsya. Ngũta sya nthĩnĩ sya tũsũmba tũu ila syasyaĩtye ngalĩko ya kũlikĩla, syaĩ na mavisa matemeleelwe ma mĩkĩndũ.

17Nĩvo ĩndĩ mũndũ ũsu wandwaie kĩwanzanĩ kya nza kya Ĩkalũ. Vau nĩnoonie tũsũmba twathyũlũlũkĩte kĩwanza kĩu, na mbee watw'o vaĩ nzĩa yaseũvĩtw'e na mavia. Tũsũmba tũu tw'onthe twaĩ mĩongo ĩtatũ.

18Nzĩa ĩsu yesĩlĩte ũtee wa mĩvĩa, na ũthanthau wayo weanaa ũasa wa mĩvĩa ĩsu. Ĩno nĩyo yaĩ nzĩa ya ĩtheo.

19Nĩwathimie ũasa wa kuma ngalĩko ya nthĩnĩ ya mũvĩa ũla wa ĩtheo, kũthi kũvika ngalĩko ya nza ya kĩwanza kĩla kya nthĩnĩ, naw'o waĩ mita mĩongo ĩtano ngalĩko ya wumĩlonĩ wa syũa, na mita mĩongo ĩtano ngalĩko ya ĩũlũ.

20Mũndũ ũsu nĩwathimie ũasa na ũthanthau wa mũvĩa ũla ũsyaĩtye ngalĩko ya ĩũlũ, wa kũthi kĩwanzanĩ kĩla kĩ nza.

21Mũvĩa ũsu waĩ na tũsũmba tũtatũ twa asikalĩ kĩla ngalĩko, ituĩ syaw'o na nyũmba yaw'o ya mumĩlo syeanene na sya mũvĩa ũla waĩ ngalĩko ya wumĩlonĩ wa syũa. Mũvĩa ũsu waĩ na ũasa wa mita mĩongo ĩlĩ na itano, na ũthanthau wa mita ĩkũmi na ilĩ na nyusu.

22Nyũmba yaw'o ya mumĩlo, ndĩlĩsya syaw'o, na mavisa ma mĩkĩndũ ala matemeleelwe mũvĩanĩ ũsu, syailyĩ ila syaĩ mũvĩanĩ ũla ũsyaĩtye ngalĩko ya wumĩlonĩ wa syũa. Vaĩ ngasi mũonza syambatĩte mũvĩanĩ ũsu, na nyũmba ĩsu ya mumĩlo yaĩ mũthyanĩ ĩsyaĩtye kĩwanza kya Ĩkalũ.

23Vaĩ mũvĩa wa kũlika kĩwanzanĩ nthĩnĩ wasyaĩtye mũvĩa wa ngalĩko ya ĩũlũ, o ũndũ mũvĩa wa ngalĩko ya wumĩlonĩ wa syũa wailyĩ. Nĩwathimie ũasa wa kuma mũvĩa ũmwe kũthi ũla ũngĩ, naw'o waĩ mita mĩongo ĩtano.

24Mũndũ ũsu nĩwasyokie andwaa mũvĩanĩ ũla waĩ ngalĩko ya ĩtheo, na vau nĩtwoonie mũvĩa ũngĩ. Nĩwathimie ituĩ syaw'o na nyũmba yaw'o ya mumĩlo. Kĩthimo kyasyo kyaĩ ũndũ ũmwe na kya ila ingĩ.

25Vaĩ ndĩlĩsya mũvĩanĩ ũsu na nyũmbanĩ yaw'o ya mumĩlo, o tondũ mĩvĩa ĩla ĩngĩ yailyĩ. Mũvĩa ũsu waĩ na ũasa wa mita mĩongo ĩlĩ na itano, na ũthanthau wa mita ĩkũmi na ilĩ na nyusu.

26Vaĩ ngasi mũonza syambatĩte mũvĩanĩ ũsu, na nyũmba yaw'o ya mumĩlo yaĩ mũthya ĩsyaĩtye kĩwanza. Vaĩ mavisa ma mĩkĩndũ matemeleelwe ituĩnĩ sya mũvĩa ũsu, ĩvisa yĩmwe kĩla ngalĩko.

27O ta ũu vaĩ mũvĩa wa kũthi kĩwanzanĩ kĩla kyaĩ nthĩnĩ ngalĩko ya ĩtheo. Mũndũ ũsu nĩwathimie ũasa wa kuma mũvĩanĩ ũmwe kũthi ũla ũngĩ wĩ ngalĩko ya ĩtheo, naw'o waĩ mita mĩongo ĩtano.

28Mũndũ ũsu nĩwandwaie kĩwanzanĩ kya nthĩnĩ kwĩsĩla mũvĩanĩ wa ngalĩko ya ĩtheo. Nĩwathimie mũvĩa ũsu, na kĩthimo kyaw'o kyaĩ ũndũ ũmwe na kya mĩvĩa ĩla ĩngĩ.

29Tũsũmba twa asikalĩ twa mũvĩa ũsu, ituĩ syaw'o na nyũmba yaw'o ya mumĩlo syeanene na sya mĩvĩa ĩla ĩngĩ. Vaĩ ndĩlĩsya mũvĩanĩ ũsu na nyũmbanĩ yaw'o ya mumĩlo, o tondũ mĩvĩa ĩla ĩngĩ yailyĩ. Mũvĩa ũsu waĩ na ũasa wa mita mĩongo ĩlĩ na itano, na ũthanthau wa mita ĩkũmi na ilĩ na nyusu.

30Vaĩ nyũmba sya mumĩlo ithyũlũlũkĩte kĩwanza kĩu kya nthĩnĩ. Nyũmba isu syaĩ na ũasa wa mita mĩongo ĩlĩ na itano, na ũthanthau wa mita ĩkũmi na ilĩ na nyusu.

31Nyũmba ya mumĩlo ya mũvĩa ũsu yasyaĩtye kĩwanza kya nza na mavisa ma mĩkĩndũ matemeleelwe ituĩnĩ syaw'o. Vaĩ ngasi yaĩ na matambya nyanya ya kwambata mũvĩanĩ ũsu.

32Mũndũ ũsu nĩwandwaie kĩwanzanĩ kĩla kĩ nthĩnĩ kwĩsĩla mũvĩanĩ ũla wĩ ngalĩko ya wumĩlonĩ wa syũa. Nĩwathimie mũvĩa ũsu, na kĩthimo kyaw'o kyaĩ ũndũ ũmwe na kya mĩvĩa ĩla ĩngĩ.

33Tũsũmba twa asikalĩ twa mũvĩa ũsu, ituĩ syaw'o na nyũmba yaw'o ya mumĩlo, syeanene na sya mĩvĩa ĩla ĩngĩ. Vaĩ ndĩlĩsya mũvĩanĩ ũsu na nyũmbanĩ yaw'o ya mumĩlo, o tondũ mĩvĩa ĩla ĩngĩ yailyĩ. Mũvĩa ũsu waĩ na ũasa wa mita mĩongo ĩlĩ na itano, na ũthanthau wa mita ĩkũmi na ilĩ na nyusu.

34Nyũmba ya mumĩlo ya mũvĩa ũsu yasyaĩtye kĩwanza kya nza. Mavisa ma mĩkĩndũ matemeleelwe ituĩnĩ syaw'o kĩla ngalĩko. Vaĩ ngasi yaĩ na matambya nyanya ya kwambata mũvĩanĩ ũsu.

35Nĩvo ĩndĩ mũndũ ũsu wandwaie mũvĩanĩ ũla wĩ ngalĩko ya ĩũlũ na aũthima. Kĩthimo kyaw'o kyaĩ ũndũ ũmwe na kya mĩvĩa ĩla ĩngĩ.

36Tũsũmba twa asikalĩ twa mũvĩa ũsu, ituĩ syaw'o na nyũmba yaw'o ya mumĩlo syeanene na sya mĩvĩa ĩla ĩngĩ, na waĩ na ndĩlĩsya iwĩlingĩlĩte. Mũvĩa ũsu waĩ na ũasa wa mita mĩongo ĩlĩ na itano, na ũthanthau wa mita ĩkũmi na ilĩ na nyusu.

37Nyũmba ya mumĩlo ya mũvĩa ũsu yasyaĩtye kĩwanza kya nza. Mavisa ma mĩkĩndũ matemeleelwe ituĩnĩ syaw'o kĩla ngalĩko. Vaĩ ngasi yaĩ na matambya nyanya ya kwambata mũvĩanĩ ũsu.

38Vaĩ nyũmba yaĩ na mũomo wakwatanĩte na nyũmba ya mumĩlo ya mũvĩa wa ngalĩko ya ĩũlũ. Nyũmbanĩ ĩsu nĩvo vathambĩaw'a nthembo sya kũvĩvw'a.

39Nyũmbanĩ ya mumĩlo ya mũvĩa ũsu vaĩ mesa ilĩ kĩla ngalĩko, vala nyamũ sya nthembo sya kũvĩvw'a, nthembo kwondũ wa ũekeo wa naĩ, na nthembo kwondũ wa mavĩtyo syathĩnzĩawa.

40Nza wa nyũmba ya mumĩlo ũlikĩlonĩ wa mũvĩa wa ngalĩko ya ĩũlũ vaĩ mesa ilĩ, na ngalĩko ĩla ĩngĩ ya nyũmba ĩsu ya mumĩlo vaĩ mesa ingĩ ilĩ.

41Mesa syonthe ila syatũmĩawa kũthĩnzĩa nyamũ sya nthembo syaĩ nyanya. Mesa inya syaĩ nthĩnĩ wa nyũmba ĩsu, na ila ingĩ inya syaĩ nza wayo.

42O ta ũu vaĩ mesa inya ila syatũmĩawa kũthĩnzĩa nyamũ sya nthembo ya kũvĩvw'a. Mesa isu syaseũvĩtw'e na mavia masũvye. Kĩla mesa yaĩ na ũtũlu wa nyusu mita, na yaĩ na ũasa wa sendimita mĩongo mũonza na itano na ũthanthau wĩana o ũu. Mĩio yonthe ĩla yatũmĩawa kwa kũthĩnza nyamũ sya nthembo ya kũvĩvw'a na nthembo ingĩ, yailĩĩlawa mesanĩ ĩsu.

43Nyũmbanĩ ĩsu vaĩ mboloi syaathĩĩwe kũthyũlũlũka. Mboloi isu syaĩ na ũasa wa sendimita mũonza na nyusu. Nyama syonthe sya nthembo syailĩĩlawa mesanĩ isu.

44Nĩvo ĩndĩ mũndũ ũsu wandwaie kĩwanzanĩ kya nthĩnĩ. Vaĩ nyũmba ilĩ; ĩmwe yaĩ ũtee wa mũvĩa wa ngalĩko ya ĩũlũ ĩsyaĩtye ngalĩko ya ĩtheo, na ĩla ĩngĩ yaĩ ũtee wa mũvĩa wa ngalĩko ya ĩtheo ĩsyaĩtye ngalĩko ya ĩũlũ.

45Mũndũ ũsu nĩwaneenie nakwa ambĩa atĩĩ, “Nyũmba ĩno ĩsyaĩtye ngalĩko ya ĩtheo nĩ ya athembi ala mathũkũmaa Ĩkalũnĩ,

46na nyũmba ĩno ĩsyaĩtye ngalĩko ya ĩũlũ nĩ ya athembi ala mathũkũmaa kĩthembeonĩ. Asu nĩ nzyawa sya Nzatoki ala katĩ wa nzyawa sya Livai, nomo matonya kũthengeea Mwĩai Ngai mamũthũkũme.”

47Mũndũ ũsu nĩwathimie kĩwanza kya nthĩnĩ, nakyo kyaĩ na ũasa wa mita mĩongo ĩtano, na kyaĩ na ũthanthau wĩana o ũu. Kĩthembeo kyaĩ mbee wa Ĩkalũ.

48Nĩvo ĩndĩ mũndũ ũsu wandwaie ĩla nyũmbanĩ ya mumĩlo ya Ĩkalũ. Nĩwathimie ituĩ sya nyũmba ĩsu nasyo syaĩ na ũasa wa mita ilĩ na nyusu, na ũthanthau wĩana o ũu. Mũvĩa waĩ na ũthanthau wa mita mũonza, na ngũta syayo syaĩ na ũthanthau wa mita ĩmwe na nyusu ngalĩko syonthe.

49Nyũmba ĩsu ya mumĩlo yaĩ na ũasa wa mita ĩkũmi, na ũthanthau wa mita thanthatũ. O ta ũu vaĩ ituĩ ilĩ, kĩtuĩ kĩmwe kĩ kĩla ngalĩko ya mũvĩa.