Revelation 10

Luganda (BIBU1) (BIBULIYA ENTUKUVU)

← Chapter 9 Jump to: Chapter 11 →

1Ne ndaba malayika omulala ow'amaanyi ng'akkirira ava mu ggulu, ayambadde ekire, ku mutwe gwe nga kuliko musoke, amaaso ge nga gali ng'enjuba, amagulu ge nga gali ng'empagi z'omuliro.

2Mu mukono gwe yalinamu akatabo nga kabikkule; ekigere kye ekya ddyo n'akisimba ku nnyanja, ate ekya kkono ku lukalu.

3N'aleekaana n'eddoboozi eddene kyenkana ng'empologoma ewuluguma; bwe yaleekaana, eraddu omusanvu ne zoogera.

4Eraddu omusanvu bwe zaamala okwogera, nali ŋŋenda nti okuwandiika, ne mpulira eddoboozi eriva mu ggulu nga ligamba nti: “Eraddu omusanvu bye zigambye bisirikire, tobiwandiika.”

5Malayika gwe nalaba ng'ayimiridde ku nnyanja ne ku lukalu, n'asitulira omukono gwe eri eggulu,

6n'alayira Oyo abeera omulamu emirembe n'emirembe, eyatonda eggulu ne byonna ebiririmu, n'ensi na byonna ebigirimu, n'ennyanja, na byonna ebigirimu, nti: “Tekyaliyo kadde kalala;

7wabula mu nnaku ezo malayika owoomusanvu bw'alikoowoola, olwo ekyama kya Katonda kigenda kutuukirizibwa, nga bwe yakirangirira eri abaweereza be abalanzi.”

8Ate eddoboozi lye nali mpulidde okuva mu ggulu ne lyogera nange nate, nga ligamba nti: “Genda okwate ekitabo ekibikkule ekiri mu ngalo za malayika ayimiridde ku nnyanja ne ku lukalu.”

9Ne ŋŋenda eri malayika, ne mmugamba okumpa akatabo. N'aŋŋamba nti: “Kakwate, kalye. Kajja kukukaayirira mu lubuto lwo, naye mu kamwa kajja kuwoomerera ng'omubisi gw'enjuki.”

10Malayika ne mmuggya akatabo mu ngalo, ne nkalya; mu kamwa ne kawoomerera ng'omubisi gw'enjuki, naye bwe namala okukalya, ne kankaayirira mu lubuto.

11Ne baŋŋamba nti: “Oli wa kuddamu buto okulanga eri amawanga mangi, n'abantu bangi, n'ennimi nkumu ne bakabaka bangi.”

← Chapter 9 Jump to: Chapter 11 →