Revelation 15

Luganda (BIBU1) (BIBULIYA ENTUKUVU)

← Chapter 14 Jump to: Chapter 16 →

1Ate ne ndaba akabonero akalala mu ggulu akanene, akeewuunyisa: Bamalayika musanvu, baali balina ebibonoobono musanvu, by'ebisemba, kubanga obusungu bwa Katonda bwali bwa kumalirizibwa na bino.

2Era ne ndaba ekyali ng'ennyanja ey'ekirawuli omuli n'omuliro, n'abo abaawangula ekisolo n'ekifaananyi kyakyo n'omuwendo gw'erinnya lyakyo nga bayimiridde ku nnyanja ey'ekirawuli nga basuna ennanga za Katonda mu mikono gyabwe.

3Baali bayimba oluyimba lwa Musa omuweereza wa Katonda n'olw'Akaliga, nga bagamba nti: “By'okola nga binene, nga byewuunyisa, ayi Mukama Katonda Omuyinza wa buli kantu! Amakubo go matuufu, ga mazima, ayi Kabaka w'amawanga!

4Ani ataatye n'okussaamu ekitiibwa erinnya lyo, ayi Mukama? Kubanga wekka ggwe mutuukirivu. Amawanga gonna galijja ne geeyala mu maaso go, olw'ebikolwa ebingi eby'obutuukirivu bwo ebyoleseddwa.”

5Ebyo nga biwedde, ne ntunula: Ekiggwa ky'Eweema ey'Endagaano mu ggulu ne kiggulibwawo.

6Bamalayika musanvu abaalina ebibonoobono omusanvu ne bafuluma mu Kiggwa. Baali bambadde engoye ezitukula ezitangalijja, ebifuba byabwe nga bisibiddwa n'emisipi egya zaabu.

7Ekimu ku biramu ebina ne kiwa bamalayika omusanvu ebibya musanvu ebya zaabu ebijjudde obusungu bwa Katonda oyo omulamu emirembe n'emirembe.

8Ekiggwa ne kijjula omukka gw'ekitiibwa kya Katonda n'obuyinza bwe, nga tewali asobola kuyingira mu Kiggwa okutuusa ng'ebibonoobono omusanvu ebya bamalayika omusanvu bimaliriziddwa.

← Chapter 14 Jump to: Chapter 16 →