Revelation 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1Akaliga ate ne kabembula envumbo eyoomusanvu, ne wabaawo akasiriikiriro mu ggulu nga ka kitundu kya ssaawa.

2Ne ndaba ate bamalayika omusanvu, abayimirira mu maaso ga Katonda; ne baweebwa amakondeere musanvu.

3Ne malayika omulala n'ajja, n'ayimirira ku mwaliiro ng'alina ekyoterezo ekya zaabu; n'aweebwa obubaani bungi abugatte awamu n'essaala z'abatuukirivu bonna ku mwaliiro ogwa zaabu mu maaso ga nnamulondo.

4Omukka gw'obubaani ne guva mu mukono gwa malayika ne gwambuka ewa Katonda awamu n'essaala z'abatuukirivu.

5Malayika n'addira ekyoterezo n'akijjuzaamu omuliro ng'aguggya ku mwaliiro, n'akikasuka ku nsi. Ne wabaawo okubwatuka, amaloboozi n'ebimyanso, n'okukankana kwa musisi.

6Bamalayika omusanvu abaalina amakondeere omusanvu ne beeteekateeka okugafuuwa.

7Malayika omubereberye n'afuuwa ekkondeere: ne wabaawo omuzira n'omuliro nga byetabudde n'omusaayi, ne bikanyugibwa ku nsi; ekyokusatu eky'ensi ne kibengeya, n'ekyokusatu eky'emiti ne kiggya, n'omuddo gwonna omubisi ne guggya.

8Ate malayika owookubiri n'afuuwa ekkondeere: ekintu ekiri ng'olusozi olunene olwaka omuliro ne kikasukibwa mu nnyanja,

9ekitundu ekyokusatu eky'ennyanja ne kifuuka omusaayi, ekitundu ekyokusatu eky'ebitonde ebiramu eby'omu nnyanja ne kifa, n'ekitundu ekyokusatu eky'amaato ne kitokomoka.

10Ne malayika owookusatu n'afuuwa ekkondeere: emmunyeenye eyaka ng'ekitawuliro n'eva mu ggulu, n'egwa ku kitundu ekyokusatu eky'emigga n'enzizi.

11Emmunyeenye eyo eyitibwa Mususa. Ekitundu ekyokusatu eky'amazzi ne kifuuka mususa; abantu bangi ne bafa olw'amazzi ago, kubanga gaali gakaaye.

12Ate malayika owookuna n'afuuwa ekkondeere, ekitundu ekyokusatu eky'enjuba ne kikubwa, n'ekyokusatu eky'omwezi, n'ekyokusatu eky'emmunyeenye; bwe kityo ekyokusatu eky'ekitangaala kyazo ne kizikira; olunaku ne luzikirako ekitundu ekyokusatu, era n'ekiro bwe kityo.

13Ate ne ndaba, ne mpulira empungu, eyali ebuukira mu bbanga, ng'egamba n'eddoboozi eddene nti: “Zibasanze, zibasanze, zibasanze abali ku nsi bamalayika abasatu abasigadde bwe banaafuuwa amakondeere!”

← Chapter 7 Jump to: Chapter 9 →