Revelation 14

Luganda (BIBU1) (BIBULIYA ENTUKUVU)

← Chapter 13 Jump to: Chapter 15 →

1Ate bwe natunula, laba Akaliga! Kaali kayimiridde ku lusozi Siyoni, ate ng'akasiriivu kamu mu obukumi buna mu enkumi nnya abaali balina erinnya lyako n'erinnya lya Kitaawe waako nga gawandiikiddwa mu byenyi byabwe baali awo nako.

2Ate ne mpulira eddoboozi okuva mu ggulu nga liri ng'ery'amazzi amangi, era ng'ery'eraddu ey'amaanyi; eddoboozi lye nawulira nga liri ng'ery'abasunyi b'ennanga abaali basuna entongooli zaabwe.

3Baali bayimba oluyimba oluggya mu maaso ga nnamulondo n'ag'ebiramu ebina n'ag'abakadde. Naye tewaali mulala yali ayinza kuluyiga, wabula abo bokka akasiriivu akamu mu obukumi obuna mu enkumi ennya abaali banunuliddwa okuva mu nsi.

4Beebo abateegwagwawazanga na bakazi, anti babeererevu; beebo abagenda bagoberera Akaliga buli we kalaga; be babereberye mu bantu abaanunulirwa Katonda n'Akaliga.

5Mu kamwa kaabwe temusangibwamu bulimba; tebaliiko musango.

6Ate ne ndaba malayika omulala ng'abuuka mu bbanga, ng'alina evangili ey'emirembe gyonna ey'okubuulira abo abali ku nsi, buli ggwanga, buli kika, buli lulimi na buli bantu.

7Yali ayogera n'eddoboozi eddene nti: “Mutye Omukama, mumusseemu ekitiibwa, kubanga obudde bwe butuuse obw'okulamula. Muvunnamire oyo eyakola eggulu n'ensi, ennyanja n'ensulo z'amazzi.”

8Ne malayika omulala owookubiri n'agoberera ng'agamba nti: “Agudde, agudde Babiloni ow'ekitalo, oyo eyanywesa amawanga gonna omwenge gw'obugwagwa bwe.”

9Malayika omulala owookusatu n'abaddirira ng'ayogera n'eddoboozi eddene nti: “Singa wanaabaawo avunnamira ekisolo n'ekifaananyi kyakyo, n'afuna akabonero kaakyo ku kyenyi kye oba ku mukono gwe,

10ajja kunywa omwenge gw'obusungu bwa Katonda nga gufukiddwa mu kikompe ky'obusungu bw'Omukama, nga temuli katabikiddwamu. Ajja kubonyaabonyezebwa n'omuliro n'ebibiriiti mu maaso g'abamalayika abatuukirivu ne mu maaso g'Akaliga.

11Erikka ery'ebibonoobono byabwe lirinyooka emirembe n'emirembe; abasinza ekisolo n'ekifaananyi kyakyo, na buli eyalambibwako akabonero k'erinnya lyakyo, tebaliweerako emisana n'ekiro.”

12Wano abatuukirivu abakuuma ebiragiro bya Katonda ne basigala nga bakkiriza Yezu we basabibwa okubeera abagumiikiriza.

13Ne mpulira eddoboozi eriva mu ggulu nga ligamba nti: “Wandiika nti: ‘Beesiimye abafu n'okuva kati abafiira mu Mukama; Mwoyo agamba nti beesiimidde ddala; bawummulire ddala ku kutegana kwabwe, anti ebikolwa byabwe bibagoberera.’ ”

14Bwe natunula, laba ekire ekyeru! Ku kire kwali kutuddeko eyali afaanana ng'Omwana w'Omuntu, ku mutwe gwe nga kuliko engule eya zaabu, ate mu mukono gwe nga mulimu ekiwabyo ekyogi.

15Awo malayika omulala n'afuluma mu Kiggwa, n'alangiriza n'eddoboozi eddene oli atudde ku kire nti: “Wuuba ekiwabyo kyo, okungule, kubanga obudde butuuse obw'okukungula; kubanga eby'okukungula eby'ensi byengedde.”

16N'oli eyali atudde ku kire n'awuuba ekiwabyo kye mu nsi, ensi n'ekungulibwa.

17Ne malayika omulala n'afuluma mu Kiggwa eky'omu ggulu nga naye alina ekiwabyo ekyogi.

18Ne malayika omulala eyalina obuyinza ku muliro, n'ava eri ku mwaliiro, n'alagiriza n'eddoboozi eddene nti: “Wuuba ekiwabyo kyo ekyogi osale ebirimba by'emizabbibu egy'omu nsi, kubanga emizabbibu gyayo gyengedde.”

19Awo malayika n'awuuba ekiwabyo ekyogi mu nsi, n'akuŋŋaanya emizabbibu gy'ensi, n'agikasuka mu ssogolero eddene ery'obusungu bwa Katonda.

20Okusamba mu ssogolero kwali bweru wa kibuga; omusaayi ne gukulukuta okuva mu ssogolero, nga mu butumbiivu gukoma ku matandiiko g'embalaasi; ne gukulukuta sitadiyo lukumi mu lukaaga.

← Chapter 13 Jump to: Chapter 15 →