Revelation 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Oluvannyuma, ne ndaba: laba, mu ggulu omulyango omuggule! Eddoboozi eryali lyogedde nange okusooka, eryali lyogera nga liri ng'ekkondeere, ne ligamba nti: “Yambuka eno, nkulage ebitalirema kutuuka ng'ebyo biwedde.”

2Amangu ago ne nkwatibwa Mwoyo; laba, mu ggulu waali wateekeddwayo nnamulondo; nga waliwo atudde ku nnamulondo!

3Eyali atuddeko mu ndabika ng'ali ng'ejjinja lya yasipi ne saridiyo, yali yeetooloddwa musoke mu ndabika eyali ng'ejjinja lya simaragido.

4Okwebungulula nnamulondo waaliwo nnamulondo abiri mu nnya, nga ku nnamulondo kutuddeko abakadde abiri mu bana abambadde engoye enjeru, nga ku mitwe gyabwe kuliko engule eza zaabu.

5Mu nnamulondo nga mufubutukamu ebimyanso, amaloboozi n'okubwatuka kw'eggulu; mu maaso ga nnamulondo nga waliwo ettawaaza musanvu ezaaka, gy'emyoyo omusanvu egya Katonda.

6Mu maaso ga nnamulondo nga waliwo ekyali ng'ennyanja ey'ekirawuli, ng'ejjinja ettangaavu. Ate mu makkati n'okwetooloola nnamulondo waaliwo ebiramu bina ebijjudde amaaso wonna mu maaso n'emabega.

7Ekiramu ekisooka kyali kifaanana ng'empologoma; ekiramu ekyokubiri kyali kifaanana ng'akate akalume, ekiramu ekyokusatu kyalina obwenyi ng'obw'omuntu; ate ekiramu ekyokuna nga kiri ng'empungu ebuuka.

8Ebiramu ebyo ebina, buli kimu nga kirina ebiwaawaatiro mukaaga; nga birina amaaso kungulu wonna ne munda, nga byogera emisana n'ekiro awatali kuweera nti: “Mutuukirivu, mutuukirivu, mutuukirivu, Omukama Katonda Omuyinza wa buli kantu, eyaliwo, aliwo era ajja.”

9Ebiramu ebyo bwe byabanga biwa ekitiibwa n'ettendo era nga byebaza oyo atudde ku nnamulondo, omulamu emirembe n'emirembe,

10nga n'abakadde abiri mu abana beeyala mu maaso g'oyo atudde ku nnamulondo, ne bamusinza oyo omulamu emirembe n'emirembe; engule zaabwe nga bazikasuka mu maaso ga nnamulondo nga bwe bagamba nti:

11“Osaanidde, ayi Mukama era Katonda waffe, okufuna ekitiibwa n'ettendo n'obuyinza, kubanga ggwe watonda ebintu byonna; olw'okwagala kwo, byabeerawo era ne bitondebwa.”

← Chapter 3 Jump to: Chapter 5 →