1 Samuel 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1ປະມານໜຶ່ງເດືອນຕໍ່ມາ ເຈົ້ານາຮາດກະສັດແຫ່ງອຳໂມນໄດ້ຍົກທັບມາໂຈມຕີເມືອງຢາເບັດກີເລອາດ ແລະປິດລ້ອມເມືອງໄວ້. ຊາວເມືອງຢາເບັດຈຶ່ງເວົ້າກັບເຈົ້ານາຮາດວ່າ, “ຈົ່ງເຮັດສັນຍາກັບພວກຂ້ານ້ອຍສາ ແລ້ວພວກຂ້ານ້ອຍກໍຈະຮັບທ່ານເປັນຜູ້ປົກຄອງ.”

2ນາຮາດຕອບວ່າ, “ເຮົາຈະເຮັດສັນຍາກັບພວກເຈົ້າໃນເງື່ອນໄຂຂໍ້ໜຶ່ງຄື: ເຮົາຈະເຈາະແກ່ນຕາເບື້ອງຂວາທຸກຄົນ ເພື່ອນຳຄວາມອັບອາຍມາສູ່ຊາດອິດສະຣາເອນທັງໝົດ.”

3ພວກຜູ້ນຳຊາວຢາເບັດຈຶ່ງເວົ້າວ່າ, “ຂໍໃຫ້ເວລາພວກເຮົາເຈັດວັນ ເພື່ອຈະໄດ້ໃຊ້ຄົນນຳຂ່າວໄປທົ່ວດິນແດນອິດສະຣາເອນ. ຖ້າບໍ່ມີຜູ້ໃດຊ່ວຍເຫລືອພວກເຮົາ ພວກເຮົາກໍຈະຍອມຈຳນົນຕໍ່ທ່ານ.”

4ຄົນນຳຂ່າວໄດ້ມາທີ່ເມືອງກີເບອາບ່ອນທີ່ໂຊນຢູ່. ເມື່ອຄົນບອກຂ່າວນີ້ສູ່ຊາວເມືອງຟັງ ປະຊາຊົນກໍຮ້ອງໄຫ້ດ້ວຍຄວາມໝົດຫວັງ.

5ສ່ວນໂຊນນັ້ນກຳລັງຈູງງົວມາແຕ່ນາ ເພິ່ນຖາມວ່າ, “ມີຫຍັງເກີດຂຶ້ນ? ເປັນຫຍັງທຸກຄົນຈຶ່ງຮ້ອງໄຫ້?” ພວກເຂົາບອກເລື່ອງທີ່ຄົນນຳຂ່າວຈາກຢາເບັດໄດ້ມາລາຍງານນັ້ນສູ່ລາວຟັງ.

6ເມື່ອໂຊນໄດ້ຍິນຂ່າວນັ້ນ ພຣະວິນຍານຂອງພຣະເຈົ້າໄດ້ເຂົ້າຄວບຄຸມລາວ ແລະລາວໃຈຮ້າຍຂຶ້ນ.

7ລາວໄດ້ຂ້າງົວເຖິກສອງໂຕແລະປາດຊີ້ນເປັນຕ່ອນໆ ແລ້ວໃຫ້ຄົນນຳຂ່າວມານັ້ນຖືໄປທົ່ວດິນແດນອິດສະຣາເອນ ພ້ອມທັງເຕືອນວ່າ, “ຜູ້ໃດກໍຕາມທີ່ບໍ່ຕິດຕາມໂຊນແລະຊາມູເອນໄປສູ່ສະໜາມຮົບ ງົວເຖິກຂອງຜູ້ນັ້ນຈະຕ້ອງຖືກຂ້າຢ່າງດຽວກັນນີ້ແຫຼະ.” ປະຊາຊົນອິດສະຣາເອນເກີດຢ້ານກົວຕໍ່ສິ່ງທີ່ພຣະເຈົ້າຢາເວອາດຈະກະທຳ. ສະນັ້ນ ພວກເຂົາໝົດທຸກຄົນຈຶ່ງພ້ອມກັນມາໂດຍບໍ່ມີການຍົກເວັ້ນ.

8ໂຊນໃຫ້ພວກເຂົາເຕົ້າໂຮມກັນຢູ່ທີ່ເມືອງເບເຊັກ ໂດຍມີຈຳນວນພົນດັ່ງນີ້: ຊາວອິດສະຣາເອນສາມແສນຄົນ ແລະຊາວຢູດາສາມສິບພັນຄົນ.

9ພວກເຂົາບອກຄົນນຳຂ່າວມາຈາກຢາເບັດກີເລອາດນັ້ນວ່າ, “ຈົ່ງບອກປະຊາຊົນຂອງພວກເຈົ້າວ່າ ມື້ອື່ນເຊົ້າກ່ອນທ່ຽງ ພວກຂ້ອຍຈະໄປຊ່ວຍກອບກູ້ເອົາພວກເຈົ້າ.” ເມື່ອຊາວຢາເບັດໄດ້ຮັບຂ່າວນັ້ນ ພວກເຂົາກໍຊົມຊື່ນຍິນດີຫຼາຍ ແລະເວົ້າຕໍ່ເຈົ້ານາຮາດວ່າ,

10“ມື້ອື່ນ ພວກເຮົາຈະຍອມຈຳນົນຕໍ່ທ່ານ ທ່ານຈະເຮັດກັບພວກເຮົາຢ່າງໃດກໍໄດ້ ຕາມທີ່ທ່ານຕ້ອງການ.”

11ມື້ໃໝ່ມາແຕ່ເດິກໆ ໂຊນໄດ້ແບ່ງທະຫານຂອງຕົນອອກເປັນສາມໝວດ. ເມື່ອເຊົ້າມາ ພວກເຂົາໄດ້ມຸ້ງໜ້າໄປສູ່ຄ້າຍຂອງພວກສັດຕູ ແລະໂຈມຕີຊາວອຳໂມນ. ພວກເຂົາໄດ້ຂ້າເປັນໝູ່ຊາວອຳໂມນຈົນຮອດທ່ຽງ. ສ່ວນພວກທີ່ລອດຊີວິດໄດ້ນັ້ນກໍແຕກຊະກັນໄປ ແຕ່ລະຄົນຕ່າງກໍແລ່ນໜີໄປເອົາຕົວລອດ.

12ແລ້ວປະຊາຊົນອິດສະຣາເອນກໍເວົ້າຕໍ່ຊາມູເອນວ່າ, “ພວກທີ່ເວົ້າວ່າ, ໂຊນບໍ່ສົມທີ່ຈະເປັນກະສັດນັ້ນຢູ່ໃສ? ຈົ່ງໄປຈັບເອົາພວກເຂົາມາໃຫ້ພວກເຮົາຂ້າຖິ້ມເສຍ.”

13ແຕ່ໂຊນເວົ້າວ່າ, “ມື້ນີ້ ຈະບໍ່ມີຜູ້ໃດຖືກປະຫານຊີວິດ ເພາະແມ່ນມື້ທີ່ພຣະເຈົ້າຢາເວຊ່ວຍກອບກູ້ເອົາຊາດອິດສະຣາເອນ.”

14ແລ້ວຊາມູເອນກໍກ່າວວ່າ, “ໃຫ້ພວກເຮົາທຸກຄົນໄປທີ່ເມືອງກິນການ ແລະປະກາດແຕ່ງຕັ້ງໂຊນຢູ່ທີ່ນັ້ນອີກເທື່ອໜຶ່ງ ໃຫ້ເປັນກະສັດຂອງພວກເຮົາ.”

15ດັ່ງນັ້ນ ພວກເຂົາທັງໝົດຈຶ່ງພາກັນໄປທີ່ເມືອງກິນການ. ແລະໃນທີ່ນັ້ນ ໂດຍຊ້ອງໜ້າພຣະເຈົ້າຢາເວ ພວກເຂົາໄດ້ປະກາດແຕ່ງຕັ້ງໂຊນໃຫ້ເປັນກະສັດ. ພວກເຂົາໄດ້ຖວາຍເຄື່ອງບູຊາເພື່ອຄວາມສາມັກຄີທຳຕໍ່ໜ້າພຣະເຈົ້າຢາເວ ແລະ ໂຊນພ້ອມກັບປະຊາຊົນອິດສະຣາເອນທຸກຄົນໄດ້ສະຫລອງຢ່າງຍິ່ງໃຫຍ່ໃນທີ່ນັ້ນ.

← Chapter 10 Jump to: Chapter 12 →