1 Samuel 23

Lao Bible 2012 (ພຣະຄຳພີສັກສິ)

← Chapter 22 Jump to: Chapter 24 →

1ດາວິດໄດ້ຍິນວ່າຊາວຟີລິດສະຕິນກຳລັງຕີເອົາເມືອງເກອີລາ ແລະປຸ້ນສະດົມເອົາເຂົ້າທີ່ຫາກໍເກັບກ່ຽວໃໝ່.

2ສະນັ້ນ ລາວຈຶ່ງຖາມພຣະເຈົ້າຢາເວວ່າ, “ຂ້ານ້ອຍຄວນຈະໄປໂຈມຕີພວກຟີລິດສະຕິນຫລືບໍ່?” ພຣະເຈົ້າຢາເວຕອບດາວິດວ່າ, “ຄວນໄປ ໂຈມຕີພວກເຂົາແລະຊ່ວຍເອົາເມືອງເກອີລາໄວ້.”

3ແຕ່ຄົນຂອງດາວິດເວົ້າກັບລາວວ່າ, “ໃນຢູດາຍນີ້ ພວກເຮົາກໍຢ້ານກົວຢູ່ແລ້ວ ຖ້າພວກເຮົາໄປໂຈມຕີກອງທັບຂອງພວກຟີລິດສະຕິນທີ່ເມືອງເກອີລາ ກໍຍິ່ງເປັນໜ້າຢ້ານກົວໃຫຍ່!”

4ສະນັ້ນ ດາວິດຈຶ່ງໄດ້ປຶກສານຳພຣະເຈົ້າຢາເວອີກ ແລະພຣະເຈົ້າຢາເວກໍຕອບດາວິດວ່າ, “ໄປໂຈມຕີເມືອງເກອີລາ ແລະເຮົາຈະໃຫ້ເຈົ້າມີໄຊຊະນະເໜືອພວກຟີລິດສະຕິນ.”

5ດັ່ງນັ້ນ ດາວິດກັບຄົນຂອງເພິ່ນຈຶ່ງໄດ້ໄປໂຈມຕີພວກຟີລິດສະຕິນທີ່ເມືອງເກອີລາ. ພວກເຂົາໄດ້ຂ້າພວກຟີລິດສະຕິນຫລາຍຄົນ ແລະຢຶດເອົາສັດລ້ຽງຂອງພວກເຂົາ. ດັ່ງນັ້ນ ດາວິດຈຶ່ງຊ່ວຍກອບກູ້ເອົາຊາວເມືອງເກອີລາໃຫ້ພົ້ນ.

6ເມື່ອອາບີອາທາລູກຊາຍຂອງອາຮີເມເຫຼັກ ໄດ້ປົບໜີໄປອາໄສຢູ່ນຳດາວິດທີ່ເມືອງເກອີລານັ້ນ ລາວໄດ້ເອົາເອໂຟດໄປນຳ.

7ຕໍ່ມາ ໄດ້ມີຄົນມາບອກກະສັດໂຊນວ່າດາວິດຢູ່ທີ່ເມືອງເກອີລາ ແລະເພິ່ນກໍເວົ້າວ່າ, “ພຣະເຈົ້າມອບດາວິດໄວ້ໃນກຳມືຂອງເຮົາແລ້ວ. ລາວຫ້າງແຮ້ວໃສ່ຕົນເອງທີ່ເຂົ້າໄປຢູ່ໃນເມືອງທີ່ມີກຳແພງອ້ອມ ແລະທັງມີປະຕູອັນແໜ້ນໜາອີກດ້ວຍ.”

8ດັ່ງນັ້ນ ກະສັດໂຊນຈຶ່ງເອີ້ນເອົາທະຫານຂອງຕົນອອກໄປເຮັດເສິກ ແລະມຸ່ງໜ້າໄປທີ່ເມືອງເກອີລາເພື່ອອ້ອມຈັບດາວິດກັບຄົນຂອງເພິ່ນ.

9ເມື່ອດາວິດໄດ້ຍິນວ່າກະສັດໂຊນກຳລັງວາງແຜນໂຈມຕີຕົນ ເພິ່ນກໍສັ່ງປະໂຣຫິດອາບີອາທາວ່າ, “ເອົາເອໂຟດມາພີ້.”

10ແລ້ວດາວິດກໍພາວັນນາອະທິຖານວ່າ, “ຂ້າແດ່ພຣະເຈົ້າຢາເວ ພຣະເຈົ້າຂອງຊາດອິດສະຣາເອນເອີຍ ຂ້ານ້ອຍໄດ້ຍິນວ່າກະສັດໂຊນກຳລັງວາງແຜນເດີນທາງມາທີ່ເມືອງເກອີລາ ເພື່ອຈະທຳລາຍເມືອງນີ້. ເພາະຂ້ານ້ອຍເອງຜູ້ຮັບໃຊ້ຂອງພຣະອົງເປັນຕົ້ນເຫດ.

11ຊາວເມືອງເກອີລາຈະມອບຂ້ານ້ອຍໃຫ້ກະສັດໂຊນຫລືບໍ່? ເພິ່ນຈະມາແທ້ຕາມທີ່ຂ້ານ້ອຍໄດ້ຍິນນີ້ບໍ? ຂ້າແດ່ພຣະເຈົ້າຢາເວ ພຣະເຈົ້າຂອງຊາດອິດສະຣາເອນ ໂຜດຕອບຂ້ານ້ອຍດ້ວຍເຖີດ.” ພຣະເຈົ້າຢາເວຕອບວ່າ, “ໂຊນຈະມາແທ້.”

12ດາວິດຖາມອີກວ່າ, “ຊາວເມືອງເກອີລາຈະມອບທະຫານຂອງຂ້ານ້ອຍກັບຂ້ານ້ອຍເອງ ໃຫ້ກະສັດໂຊນຫລືບໍ່?” ພຣະເຈົ້າຢາເວຕອບວ່າ, “ພວກເຂົາຈະມອບ”.

13ດັ່ງນັ້ນ ດາວິດພ້ອມດ້ວຍທະຫານທັງໝົດປະມານຫົກຮ້ອຍຄົນ ຈຶ່ງອອກໜີຈາກເມືອງເກອີລາໃນທັນທີ ແລະເຄື່ອນຍ້າຍໄປເລື້ອຍໆ. ເມື່ອກະສັດໂຊນໄດ້ຍິນວ່າ ດາວິດໄດ້ປົບໜີຈາກເມືອງເກອີລາໄປແລ້ວ ເພິ່ນກໍໄດ້ລົ້ມເລີກແຜນການຂອງຕົນເສຍ.

14ດາວິດໄດ້ລີ້ຢູ່ທີ່ແຖບເນີນພູໃນຖິ່ນແຫ້ງແລ້ງກັນດານໃກ້ກັບເມືອງຊີເຟ. ຝ່າຍກະສັດໂຊນນັ້ນກໍພະຍາຍາມຊອກຫາດາວິດຢູ່ເລື້ອຍໆ; ແຕ່ພຣະເຈົ້າຢາເວບໍ່ໄດ້ມອບລາວໃຫ້ກະສັດໂຊນ.

15ດາວິດຮູ້ດີວ່າ ກະສັດໂຊນໄດ້ອອກຕາມຫາເພື່ອຈະຂ້າຕົນ. ດາວິດໄດ້ອາໄສຢູ່ທີ່ເມືອງໂຮເຣັດໃນຖິ່ນແຫ້ງແລ້ງກັນດານ ໃກ້ກັບເມືອງຊີເຟ.

16ໂຢນາທານໄດ້ໄປຫາດາວິດທີ່ນັ້ນ ແລະໃຫ້ກຳລັງໃຈເພິ່ນດ້ວຍຄວາມເຊື່ອໝັ້ນວ່າ ພຣະເຈົ້າຢາເວຈະເປັນຜູ້ປົກປັກຮັກສາ

17ໂດຍເວົ້າວ່າ, “ຢ່າຢ້ານເລີຍ ກະສັດໂຊນພໍ່ຂອງຂ້ອຍເຮັດຫຍັງໃຫ້ເຈົ້າບໍ່ໄດ້ດອກ. ເພິ່ນຮູ້ຈັກດີວ່າເຈົ້າຄົນດຽວເທົ່ານັ້ນ ທີ່ຈະເປັນກະສັດຂອງຊາດອິດສະຣາເອນ ແລະຂ້ອຍກໍຈະເປັນຜູ້ຮອງຂອງເຈົ້າ.”

18ທັງສອງໄດ້ເຮັດພັນທະສັນຍາຢູ່ຊ້ອງໜ້າພຣະເຈົ້າຢາເວ. ດາວິດຍັງອາໄສຢູ່ທີ່ໂຮເຣັດ ສ່ວນໂຢນາທານນັ້ນໄດ້ຄືນເມືອເຮືອນຂອງຕົນ.

19ມີຊາວເມືອງຊີເຟບາງຄົນໄດ້ໄປຫາກະສັດໂຊນຢູ່ທີ່ເມືອງກີເບອາ ແລະບອກເພິ່ນວ່າ, “ດາວິດກຳລັງລີ້ຢູ່ໃນເຂດແດນຂອງພວກຂ້ານ້ອຍທີ່ໂຮເຣັດຕາມເທິງພູຮາກີລາ ທາງພາກໃຕ້ຂອງຖິ່ນແຫ້ງແລ້ງກັນດານຢູດາຍ.

20ພວກຂ້ານ້ອຍຮູ້ດີວ່າ ທ່ານຕ້ອງການຕົວຂອງດາວິດຫລາຍເທົ່າໃດ. ສະນັ້ນ ຂໍເຊີນທ່ານໄປທີ່ເຂດແດນຂອງພວກຂ້ານ້ອຍ ແລະພວກຂ້ານ້ອຍຈະມອບລາວໃຫ້ທ່ານ.”

21ກະສັດໂຊນຕອບວ່າ, “ຂໍໃຫ້ພຣະເຈົ້າຢາເວອວຍພອນພວກເຈົ້າທີ່ມີນໍ້າໃຈອັນດີຕໍ່ເຮົາ.

22ເພື່ອຄວາມແນ່ໃຈໃຫ້ພວກເຈົ້າໄປເບິ່ງອີກເທື່ອໜຶ່ງ ແລະຖາມເບິ່ງວ່າມັນຢູ່ບ່ອນໃດແທ້ໆ ແລະແມ່ນຜູ້ໃດແດ່ເຫັນມັນຢູ່ທີ່ນັ້ນ ເຮົາໄດ້ຍິນວ່າມັນເປັນຄົນທີ່ມີເລ້ຫລ່ຽມຫລາຍທີ່ສຸດ.

23ສະນັ້ນ ຈົ່ງໄປສືບເບິ່ງຢ່າງຄັກແນ່ວ່າມັນຢູ່ບ່ອນໃດແທ້ໆ ແລະໃຫ້ນຳເອົາລາຍລະອຽດຕ່າງໆມາລາຍງານເຮົາທັນທີ ແລ້ວເຮົາຈະໄປກັບພວກເຈົ້າ. ຖ້າມັນຍັງຢູ່ໃນເຂດນັ້ນ ເຮົາຈະຕາມໄປຂ້າມັນ. ເຖິງແມ່ນວ່າເຮົາຈະຕ້ອງຊອກຄົ້ນຫາມັນທົ່ວທັງດິນແດນຢູດາຍກໍຕາມ.”

24ດັ່ງນັ້ນ ພວກເຂົາຈຶ່ງໄດ້ກັບຄືນເມືອເມືອງຊີເຟກ່ອນກະສັດໂຊນ. ສ່ວນດາວິດແລະຄົນທັງຫລາຍຂອງຕົນນັ້ນໄດ້ອາໄສຢູ່ໃນຖິ່ນແຫ້ງແລ້ງກັນດານມາໂອນ ໃນອາຣາບາທາງທິດໃຕ້ຂອງເຢຊີໂມນ.

25ກະສັດໂຊນກັບທະຫານຂອງເພິ່ນໄດ້ອອກໄປຊອກຫາດາວິດ ແຕ່ເພິ່ນຮູ້ເລື່ອງນີ້ກ່ອນ ຈຶ່ງໄດ້ປົບໜີໄປທີ່ເນີນພູຫີນ ໃນຖິ່ນແຫ້ງແລ້ງກັນດານມາໂອນ ແລະອາໄສຢູ່ໃນທີ່ນັ້ນ. ເມື່ອກະສັດໂຊນຮູ້ຂ່າວນີ້ ເພິ່ນກໍອອກຕາມລ່າດາວິດ.

26ກະສັດໂຊນກັບທະຫານຂອງຕົນຢູ່ທາງພູເບື້ອງໜຶ່ງ ສ່ວນດາວິດກັບຄົນທັງຫລາຍຂອງເພິ່ນກໍຢູ່ທາງພູເບື້ອງໜຶ່ງອີກ. ໃນຂະນະທີ່ດາວິດກັບຄົນທັງຫລາຍຂອງຕົນກຳລັງປົບໜີຈາກກະສັດໂຊນກັບທະຫານຂອງເພິ່ນ ຊຶ່ງພວມໄລ່ຕາມມາເກືອບຈະຈັບພວກເພິ່ນໄດ້ນັ້ນ

27ກໍມີຄົນນຳຂ່າວມາບອກກະສັດໂຊນວ່າ, “ພວກຟີລິດສະຕິນກຳລັງຮຸກຮານປະເທດຊາດບ້ານເມືອງ ຮີບກັບຄືນເມືອໄວໆ!”

28ດັ່ງນັ້ນ ກະສັດໂຊນຈຶ່ງເລີກໄລ່ຕາມດາວິດ ແລະກັບຄືນໄປຕໍ່ສູ້ພວກຟີລິດສະຕິນ. ດ້ວຍເຫດນີ້ ບ່ອນນີ້ຈຶ່ງມີຊື່ວ່າເນີນພູແຫ່ງການແຍກຈາກກັນ.

29ດາວິດໄດ້ອອກໜີໄປສູ່ອານາເຂດເອນເກດີ ແລະໄດ້ຫລົບລີ້ຢູ່ໃນທີ່ນັ້ນ.

← Chapter 22 Jump to: Chapter 24 →