1 Samuel 29

Lao Bible 2012 (ພຣະຄຳພີສັກສິ)

← Chapter 28 Jump to: Chapter 30 →

1ພວກຟີລິດສະຕິນໄດ້ນຳເອົາທະຫານຂອງຕົນໄປເຕົ້າໂຮມກັນຢູ່ທີ່ອາເຟັກ ຊຶ່ງໃນຂະນະດຽວກັນນັ້ນພວກອິດສະຣາເອນກໍໄດ້ຕັ້ງຄ້າຍ ຢູ່ທີ່ນໍ້າພຸໃນຮ່ອມພູຢິດຊະເຣນ.

2ພວກເຈົ້ານາຍຟີລິດສະຕິນໄດ້ຍົກທັບເປັນກອງຮ້ອຍແລະກອງພັນ ມຸ່ງໜ້າອອກໄປ. ສ່ວນດາວິດກັບຄົນຂອງຕົນນັ້ນຢູ່ທາງຫລັງກັບເຈົ້າອາກີເຊ.

3ເມື່ອແມ່ທັບຂອງພວກຟີລິດສະຕິນຫລຽວເຫັນພວກເຂົາຈຶ່ງຖາມວ່າ, “ພວກເຮັບເຣີເຫຼົ່ານີ້ມາເຮັດຫຍັງຢູ່ໃນທີ່ນີ້?” ເຈົ້າອາກີເຊຕອບວ່າ, “ຜູ້ນີ້ແມ່ນດາວິດຜູ້ຮັບໃຊ້ຂອງໂຊນ ກະສັດຂອງຊາດອິດສະຣາເອນ. ລາວຢູ່ນຳເຮົາມານານພໍສົມຄວນແລ້ວ. ນັບຕັ້ງແຕ່ມື້ທີ່ລາວໄດ້ມາຢູ່ນຳເຮົາ ລາວບໍ່ໄດ້ເຮັດຜິດຫຍັງໃຫ້ເຮົາເຫັນເລີຍ.”

4ແຕ່ແມ່ທັບຂອງພວກຟີລິດສະຕິນໃຈຮ້າຍໃຫ້ເຈົ້າອາກີເຊ ແລະເວົ້າຕໍ່ລາວວ່າ, “ສົ່ງຊາຍຄົນນີ້ກັບເມືອເມືອງທີ່ທ່ານໄດ້ມອບໃຫ້ລາວສາ ຢ່າໃຫ້ລາວອອກໄປສູ່ສະໜາມຮົບກັບພວກເຮົາເລີຍ ເພາະລາວອາດຫັນກັບມາຕໍ່ສູ້ພວກເຮົາໃນເວລາສູ້ຮົບກັນກໍໄດ້. ແມ່ນຫຍັງຈະດີກວ່າສຳລັບລາວ ຖ້າບໍ່ແມ່ນການຂ້າຄົນຂອງພວກເຮົາ ເພື່ອໃຫ້ນາຍຂອງລາວພໍໃຈລາວຄືນ?

5ບໍ່ແມ່ນດາວິດຄົນນີ້ບໍ ທີ່ພວກຜູ້ຍິງໄດ້ຮ້ອງເພງຊົມເຊີຍ ຕອນທີ່ພວກເຂົາຟ້ອນລຳທຳເພງນັ້ນວ່າ, ‘ໂຊນໄດ້ຂ້າຫລາຍພັນຄົນ ແຕ່ດາວິດໄດ້ຂ້າຫລາຍໝື່ນຄົນ.”’

6ດັ່ງນັ້ນ ເຈົ້າອາກີເຊຈຶ່ງຮ້ອງດາວິດມາ ແລະບອກວ່າ, “ຂ້ອຍສາບານໂດຍພຣະເຈົ້າຢາເວອົງຊົງຊີວິດຢູ່ວ່າ ເຈົ້າໄດ້ສະແດງຄວາມຈົງຮັກພັກດີຕໍ່ຂ້ອຍ ແລະຂ້ອຍກໍພໍໃຈໃຫ້ເຈົ້າອອກໄປຕໍ່ສູ້ໃນສະໜາມຮົບນຳຂ້ອຍ. ນັບຕັ້ງແຕ່ມື້ທີ່ເຈົ້າໄດ້ມາຫາຂ້ອຍ ຂ້ອຍກໍບໍ່ເຫັນຄວາມຜິດໃນຕົວຂອງເຈົ້າແຕ່ຢ່າງໃດເລີຍ, ແຕ່ກະສັດຄົນອື່ນບໍ່ເຫັນດີໃນຕົວເຈົ້າ.

7ດັ່ງນັ້ນ ຈົ່ງກັບຄືນເມືອຢ່າງສັນຕິສຸກ ແລະຢ່າເຮັດອັນໃດທີ່ເຮັດໃຫ້ພວກເຈົ້ານາຍຟີລິດສະຕິນບໍ່ພໍໃຈນຳເຈົ້າ.”

8ດາວິດຕອບເຈົ້າອາກີເຊວ່າ, “ທ່ານເອີຍ ຂ້ານ້ອຍໄດ້ເຮັດຫຍັງຜິດແດ່? ທ່ານມີຫຍັງຕ້ອງຕິຂ້ານ້ອຍ? ນັບຕັ້ງແຕ່ມື້ທີ່ຂ້ານ້ອຍເລີ່ມເຂົ້າຮັບໃຊ້ທ່ານມາຈົນເຖິງປະຈຸບັນ ກໍເພື່ອຂ້ານ້ອຍຈະໄດ້ອອກໄປຕໍ່ສູ້ເຫຼົ່າສັດຕູຂອງທ່ານ ບໍ່ແມ່ນບໍ?”

9ເຈົ້າອາກີເຊຕອບດາວິດວ່າ, “ຂ້ອຍເອງເຫັນພ້ອມ ຂ້ອຍຖືວ່າເຈົ້າເປັນຜູ້ສັດຊື່ດັ່ງເທວະດາຕົນໜຶ່ງຂອງພຣະເຈົ້າ, ແຕ່ບັນດາເຈົ້ານາຍຟີລິດສະຕິນຄົນອື່ນໆໄດ້ບອກວ່າ, ເຈົ້າຈະໄປສູ່ສະໜາມຮົບນຳບໍ່ໄດ້.

10ສະນັ້ນ ດາວິດເອີຍ ໃນມື້ອື່ນເຊົ້າ ໃຫ້ພວກເຈົ້າທຸກຄົນທີ່ໄດ້ໜີຈາກກະສັດໂຊນມາຫາຂ້ອຍນັ້ນ ລຸກແຕ່ເຊົ້າໆ ແລະອອກໜີໄປໃນທັນທີທີ່ຟ້າສະຫວ່າງ.”

11ໃນມື້ເຊົ້າຕໍ່ມາ ດາວິດພ້ອມກັບຄົນຂອງເພິ່ນກໍເລີ່ມອອກເດີນທາງໄປແຕ່ເຊົ້າໆ ກັບຄືນເມືອຟີລິດສະຕິນ. ຝ່າຍພວກຟີລິດສະຕິນກໍໄດ້ເດີນທາງຕໍ່ໄປສູ່ຢິດຊະເຣນ.

← Chapter 28 Jump to: Chapter 30 →