1 Samuel 31

Lao Bible 2012 (ພຣະຄຳພີສັກສິ)

← Chapter 30 Jump to:

1ພວກຟີລິດສະຕິນໄດ້ເຮັດເສິກກັບພວກອິດສະຣາເອນຢູ່ທີ່ເທິງພູກິນໂບອາ. ໃນບ່ອນນັ້ນ ພວກອິດສະຣາເອນໄດ້ຖືກຂ້າເປັນຈຳນວນຫລວງຫລາຍ. ສ່ວນທີ່ເຫຼືອນັ້ນກໍໄດ້ປົບໜີໄປ ມີທັງກະສັດໂຊນແລະພວກລູກຊາຍຂອງເພິ່ນດ້ວຍ.

2ແຕ່ພວກຟີລິດສະຕິນໄລ່ທັນ ຈຶ່ງໄດ້ຂ້າລູກຊາຍທັງສາມຂອງກະສັດໂຊນເຊັ່ນ: ໂຢນາທານ, ອາບີນາດາບ ແລະມັນກີຊູອາ.

3ມີການຕໍ່ສູ້ກັນຢ່າງດຸເດືອດຢູ່ອ້ອມຮອບກະສັດໂຊນ. ສະນັ້ນ ເພິ່ນຈຶ່ງຖືກລູກທະນູຂອງສັດຕູແລະບາດເຈັບຢ່າງສາຫັດ.

4ເພິ່ນເອີ້ນບອກຊາຍໜຸ່ມຜູ້ທີ່ຖືອາວຸດໃຫ້ເພິ່ນວ່າ, “ຈົ່ງຖອດດາບຂອງເຈົ້າອອກຂ້າຂ້ອຍສາ ເພື່ອພວກຟີລິດສະຕິນຄົນທີ່ບໍ່ໄດ້ຮັບພິທີຕັດ ຈະບໍ່ໄດ້ດູຖູກຂ້ອຍແລະຂ້າຂ້ອຍ.” ແຕ່ຊາຍໜຸ່ມຄົນນັ້ນຢ້ານໂພດຈຶ່ງບໍ່ກ້າຂ້າ. ສະນັ້ນ ກະສັດໂຊນຈຶ່ງຖອດດາບຂອງຕົນອອກມາແລະຂ້າຕົນເອງເສຍ.

5ເມື່ອຊາຍໜຸ່ມເຫັນວ່າກະສັດໂຊນໄດ້ສິ້ນໃຈຕາຍໄປແລ້ວ ລາວກໍຊັກດາບອອກມາແລະຂ້າຕົນເອງຕາຍໄປກັບກະສັດໂຊນ.

6ກະສັດໂຊນກັບລູກຊາຍສາມຄົນພ້ອມທັງຊາຍໜຸ່ມຜູ້ທີ່ຖືດາບໃຫ້ເພິ່ນນັ້ນ ໄດ້ຕາຍໄປຢ່າງນີ້ແຫລະ ຄົນຂອງໂຊນທຸກຄົນໄດ້ຕາຍໄປໃນວັນນັ້ນ.

7ເມື່ອພວກອິດສະຣາເອນທີ່ຢູ່ທາງຮ່ອມພູຢິດຊະເຣນຟາກໜຶ່ງອີກ ແລະພວກທີ່ຢູ່ທາງທິດຕາເວັນອອກຂອງແມ່ນໍ້າຈໍແດນໄດ້ຍິນຂ່າວວ່າ ທະຫານອິດສະຣາເອນໄດ້ປົບໜີໄປ ແລະກະສັດໂຊນກັບພວກລູກຊາຍກໍຖືກຂ້າແລ້ວ. ດັ່ງນັ້ນ ພວກເຂົາຈຶ່ງປະຖິ້ມບ້ານເຮືອນຂອງພວກຕົນແລະປົບໜີໄປ. ແລ້ວພວກຟີລິດສະຕິນກໍເຂົ້າມາຢຶດເອົາເມືອງ.

8ວັນຕໍ່ມາ ຫລັງຈາກການສູ້ຮົບຢຸດຕິລົງແລ້ວ ພວກຟີລິດສະຕິນຈຶ່ງໄປຫາປົດເອົາເຄື່ອງຂອງຄົນທີ່ຕາຍໄປແລ້ວ. ພວກເຂົາໄດ້ພົບຊາກສົບຂອງກະສັດໂຊນ ພ້ອມກັບຊາກສົບຂອງລູກຊາຍທັງສາມຂອງເພິ່ນທີ່ເທິງພູກິນໂບອາ.

9ພວກເຂົາຈຶ່ງຕັດເອົາຫົວກະສັດໂຊນ, ແກ້ເຄື່ອງອາວຸດອອກ ແລະສົ່ງຄົນນຳຂ່າວໄປທົ່ວຟີລິດສະຕິນ ເພື່ອແຈ້ງຂ່າວດີໄປເຖິງວັດຕ່າງໆທີ່ມີຮູບເຄົາຣົບ ແລະໄປເຖິງປະຊາຊົນຂອງພວກເຂົາທຸກໆຄົນ.

10ແລ້ວພວກເຂົາກໍເອົາອາວຸດຂອງເພິ່ນໄປບັນຈຸໄວ້ຢູ່ໃນວັດຂອງເຈົ້າແມ່ອັດສະຕາກ ແລະຕອກຊາກສົບຂອງເພິ່ນໃສ່ກັບກຳແພງເມືອງເບັດຊານ.

11ເມື່ອຊາວເມືອງຢາເບັດກີເລອາດໄດ້ຍິນວ່າ ພວກຟີລິດສະຕິນໄດ້ປະຕິບັດຕໍ່ກະສັດໂຊນເຊັ່ນນັ້ນ,

12ຄົນທີ່ອົງອາດກ້າຫານ ກໍອອກເດີນທາງໄປທີ່ເມືອງເບັດຊານຕະຫລອດຄືນ. ພວກເຂົາໄດ້ເອົາຊາກສົບຂອງກະສັດໂຊນກັບຂອງພວກລູກຊາຍຂອງເພິ່ນລົງມາຈາກກຳແພງເມືອງ ແລະນຳຊາກສົບເຫຼົ່ານັ້ນໄປທີ່ເມືອງຢາເບັດ ແລະຈູດໃນທີ່ນັ້ນ.

13ພວກເຂົາເອົາກະດູກໄປຝັງໄວ້ໃນເມືອງ ຢູ່ລຸ່ມກົກໄມ້ຕົ້ນໜຶ່ງຊື່ວ່າ ຕາມາຣີທີ່ເມືອງຢາເບັດ ແລະພາກັນອົດອາຫານເປັນເວລາເຈັດວັນ.

← Chapter 30 Jump to: