1 Samuel 13

Lao Bible 2012 (ພຣະຄຳພີສັກສິ)

← Chapter 12 Jump to: Chapter 14 →

2ກະສັດໂຊນໄດ້ເລືອກເອົາຊາຍສະກັນຊາວອິດສະຣາເອນສາມພັນຄົນ ໂດຍໄດ້ແບ່ງເອົາສອງພັນຄົນໃຫ້ຢູ່ກັບຕົນທີ່ມິກມາດ ແລະທີ່ເຂດເນີນພູຂອງເບັດເອນ, ແຕ່ທະຫານໜຶ່ງພັນຄົນນັ້ນ ເພິ່ນໃຫ້ໄປກັບໂຢນາທານລູກຊາຍຂອງຕົນ ທີ່ເມືອງກີເບອາໃນເຂດແດນຂອງເຜົ່າເບັນຢາມິນ. ສ່ວນທີ່ເຫຼືອນັ້ນ ເພິ່ນໄດ້ສັ່ງໃຫ້ກັບຄືນເມືອບ້ານເຮືອນຂອງໃຜລາວ.

3ໂຢນາທານໄດ້ຂ້າຜູ້ບັນຊາການທະຫານຟີລິດສະຕິນ ໃນເມືອງເກບາ ແລະຊາວຟີລິດສະຕິນທັງໝົດກໍໄດ້ຍິນກ່ຽວກັບເລື່ອງນີ້. ແລ້ວກະສັດໂຊນກໍໄດ້ສົ່ງຄົນນຳຂ່າວເປົ່າແກໄປທົ່ວປະເທດ ເພື່ອເກນເອົາຊາວເຮັບເຣີເຂົ້າເຮັດເສິກ.

4ເມື່ອຊາວອິດສະຣາເອນທັງໝົດໄດ້ຍິນຂ່າວວ່າ, ກະສັດໂຊນໄດ້ຂ້າຜູ້ບັນຊາການທະຫານຟີລິດສະຕິນ ແລະຊາວຟີລິດສະຕິນກໍກຽດຊັງພວກຕົນ. ສະນັ້ນ ພວກເຂົາຈຶ່ງຕອບສະໜອງຄຳຮຽກຮ້ອງ ເພື່ອເຂົ້າໄປສົມທົບກັບກະສັດໂຊນທີ່ເມືອງກິນການ.

5ພວກຟີລິດສະຕິນໄດ້ທ້ອນໂຮມກຳລັງກັນມາຕໍ່ສູ້ພວກອິດສະຣາເອນ. ພວກເຂົາມີລົດຮົບສາມສິບພັນຄັນ, ທະຫານມ້າຫົກພັນຄົນ ແລະມີທະຫານຫລວງຫລາຍດັ່ງເມັດດິນຊາຍທີ່ຝັ່ງທະເລ. ພວກເຂົາໄດ້ໄປສູ່ມິກມາດທີ່ທາງຕາເວັນອອກຂອງເບັດອາເວນ ແລະຕັ້ງຄ້າຍຢູ່ທີ່ນັ້ນ.

6ຕໍ່ມາ ພວກເຂົາໄດ້ບຸກໂຈມຕີພວກອິດສະຣາເອນຢ່າງດຸເດືອດ ຈົນພວກອິດສະຣາເອນຢູ່ໃນທ່າຈົນຕາແຈ. ພວກອິດສະຣາເອນບາງຄົນໄດ້ໜີໄປລີ້ຢູ່ໃນຖໍ້າ, ໃນໂກນ, ຢູ່ໃນລະຫວ່າງໂງ່ນຫີນ, ຢູ່ໃນຫລຸມ ແລະຢູ່ໃນນໍ້າສ້າງ.

7ສ່ວນຄົນອື່ນໆອີກໄດ້ຂ້າມແມ່ນໍ້າຈໍແດນໜີໄປ ຢູ່ໃນເຂດແດນຂອງເມືອງກາດແລະເມືອງກີເລອາດ. ສ່ວນກະສັດໂຊນນັ້ນຍັງຢູ່ໃນເມືອງກິນການ ແລະປະຊາຊົນທີ່ຢູ່ນຳເພິ່ນກໍຕົກສະທ້ານຢ້ານກົວຫລາຍ.

8ກະສັດໂຊນໄດ້ຄອຍຖ້າຢູ່ເຈັດວັນຕາມຄຳແນະນຳຂອງຊາມູເອນ, ແຕ່ຊາມູເອນຍັງບໍ່ທັນມາຮອດກິນການເທື່ອ. ສ່ວນປະຊາຊົນຕ່າງກໍຄ່ອຍໆໜີໄປຈາກກະສັດໂຊນ;

9ດັ່ງນັ້ນ ເພິ່ນຈຶ່ງກ່າວແກ່ພວກເຂົາວ່າ, “ຈົ່ງເອົາເຄື່ອງເຜົາບູຊາກັບເຄື່ອງບູຊາເພື່ອຄວາມສາມັກຄີທຳມາໃຫ້ເຮົາ.” ເພິ່ນໄດ້ຖວາຍເຄື່ອງເຜົາບູຊານັ້ນ

10ແລະພໍໝົດພິທີແລ້ວ ຊາມູເອນກໍມາເຖິງ. ກະສັດໂຊນຈຶ່ງອອກໄປຕ້ອນຮັບເພິ່ນ

11ແຕ່ຊາມູເອນຖາມວ່າ, “ເຈົ້າໄດ້ເຮັດຫຍັງລົງໄປນັ້ນ?” ກະສັດໂຊນຈຶ່ງຕອບວ່າ, “ປະຊາຊົນກຳລັງໜີໄປຈາກຂ້າພະເຈົ້າ ແລະທ່ານເອງກໍບໍ່ທັນມາຕາມທີ່ໄດ້ກ່າວໄວ້; ນອກຈາກນີ້ອີກ ພວກຟີລິດສະຕິນກຳລັງທ້ອນໂຮມກັນຢູ່ທີ່ມິກມາດ.

12ດັ່ງນັ້ນ ຂ້າພະເຈົ້າຈຶ່ງຄິດວ່າ, ‘ຊາວຟີລິດສະຕິນຈະມາໂຈມຕີທີ່ເມືອງກິນການນີ້ ແລະເຮົາກໍບໍ່ໄດ້ຂໍຄວາມເຫັນຈາກພຣະເຈົ້າຢາເວກ່ອນ.’ ສະນັ້ນ ຂ້າພະເຈົ້າຈຶ່ງຖວາຍເຄື່ອງບູຊາດ້ວຍໄຟຕາມທີ່ຕົນຮູ້ສຶກ.”

13ຊາມູເອນຕອບວ່າ, “ເປັນການໂງ່ຈ້າທີ່ສຸດທີ່ເຮັດເຊັ່ນນັ້ນ ເຈົ້າບໍ່ໄດ້ເຊື່ອຟັງຄຳສັ່ງຂອງພຣະເຈົ້າຢາເວ ພຣະເຈົ້າຂອງເຈົ້າທີ່ໄດ້ໃຫ້ແກ່ເຈົ້າ. ຖ້າເຈົ້າເຊື່ອຟັງແລ້ວ ພຣະເຈົ້າຢາເວກໍຈະໃຫ້ເຈົ້າແລະເຊື້ອສາຍຂອງເຈົ້າ ໄດ້ປົກຄອງຊາດອິດສະຣາເອນຕະຫລອດໄປ.

14ແຕ່ບັດນີ້ ການປົກຄອງຂອງເຈົ້າຈະບໍ່ຍືນຍົງຕໍ່ໄປ ເພາະເຈົ້າບໍ່ເຊື່ອຟັງພຣະເຈົ້າຢາເວ. ພຣະເຈົ້າຢາເວຈະຊອກຫາຊາຍຄົນໜຶ່ງຕາມທີ່ພຣະອົງປະສົງ ແລະພຣະເຈົ້າຢາເວຈະແຕ່ງຕັ້ງລາວ ໃຫ້ເປັນຜູ້ປົກຄອງປະຊາຊົນຂອງພຣະອົງ.”

15ຊາມູເອນຈຶ່ງຈາກເມືອງກິນການໄປຕາມທາງຂອງຕົນ. ສ່ວນປະຊາຊົນທີ່ຍັງເຫລືອຢູ່ກໍຕິດຕາມໂຊນໄປສົມທົບກັບທະຫານຂອງເພິ່ນ. ພວກເຂົາໄດ້ອອກຈາກເມືອງກິນການໄປ ຈົນຮອດເມືອງກີເບອາໃນເຂດແດນເບັນຢາມິນ. ກະສັດໂຊນໄດ້ກວດກາເບິ່ງທະຫານຂອງຕົນ ຈຶ່ງເຫັນວ່າມີຢູ່ປະມານຫົກຮ້ອຍຄົນ.

16ກະສັດໂຊນກັບໂຢນາທານລູກຊາຍຂອງຕົນແລະພວກທະຫານ ໄດ້ຕັ້ງຄ້າຍຢູ່ທີ່ເມືອງເກບາໃນເຂດແດນເບັນຢາມິນ. ສ່ວນພວກຟີລິດສະຕິນນັ້ນໄດ້ຕັ້ງຄ້າຍຢູ່ທີ່ມິກມາດ.

17ທະຫານຟິລິດສະຕິນໄດ້ຈາກຄ້າຍຂອງພວກເຂົາໄປຫາຫລອນໂຈມຕີ ໂດຍຈັດທະຫານເປັນສາມໝວດດັ່ງນີ້: ໝວດທີໜຶ່ງໄປທາງໂອຟະຣາໃນເຂດແດນຊູອານ,

18ໝວດທີສອງໄປທາງເມືອງເບັດໂຮໂຣນ, ແລະໝວດທີສາມໄປທາງຊາຍແດນທີ່ຢູ່ຊື່ກັບຮ່ອມພູເຊບົວອິມແລະຖິ່ນແຫ້ງແລ້ງກັນດານ.

19ໃນເວລານັ້ນ ຊາດອິດສະຣາເອນບໍ່ໄດ້ມີຊ່າງຕີເຫລັກອີກແລ້ວ ເພາະຊາວຟີລິດສະຕິນຫ້າມບໍ່ໃຫ້ຊາວເຮັບເຣີຕີດາບແລະຫອກ.

20ຊາວອິດສະຣາເອນຈຳເປັນຕ້ອງເອົາໄຖ, ສຽມ, ຂວານ ແລະກ່ຽວ ຂອງພວກເຂົາໄປໃຫ້ພວກຟີລິດສະຕິນຝົນໃຫ້

21ຄ່າຝົນຂວານແລະແປງໄມ້ບັງຄັບງົວ ຕົກເປັນເງິນໜຶ່ງຫລຽນ ແລະຄ່າຝົນໄຖແລະສຽມຕົກເປັນເງິນສອງຫລຽນ.

22ສະນັ້ນ ໃນມື້ສູ້ຮົບກັນນັ້ນ ບໍ່ມີທະຫານອິດສະຣາເອນຄົນໃດມີດາບແລະຫອກ ນອກຈາກກະສັດໂຊນແລະໂຢນາທານລູກຊາຍຂອງເພິ່ນເທົ່ານັ້ນ.

23ພວກຟີລິດສະຕິນໄດ້ສົ່ງທະຫານໝວດໜຶ່ງ ໄປທີ່ຊ່ອງແຄບມິກມາດເພື່ອປ້ອງກັນທີ່ນັ້ນໄວ້.

← Chapter 12 Jump to: Chapter 14 →