1 Samuel 8

Lao Bible 2012 (ພຣະຄຳພີສັກສິ)

← Chapter 7 Jump to: Chapter 9 →

1ເມື່ອຊາມູເອນເຖົ້າແກ່ແລ້ວ ເພິ່ນໄດ້ໃຫ້ພວກລູກຊາຍຂອງຕົນ ຂຶ້ນເປັນຜູ້ປົກຄອງຊາດອິດສະຣາເອນແທນຕົນ.

2ລູກຊາຍຜູ້ກົກຂອງເພິ່ນຊື່ວ່າໂຢເອນ ແລະລູກຊາຍຜູ້ຫລ້າຊື່ວ່າອາບີຢາ. ເຂົາທັງສອງເປັນຜູ້ຕັດສິນຢູ່ທີ່ເມືອງເບເອນເຊບາ.

3ແຕ່ພວກເຂົາບໍ່ໄດ້ປະພຶດຕາມແບບຢ່າງຂອງພໍ່ ພວກເຂົາສົນໃຈນຳແຕ່ເງິນຄຳເທົ່ານັ້ນ. ດັ່ງນັ້ນ ພວກເຂົາຈຶ່ງຮັບສິນບົນແລະບໍ່ໄດ້ຕັດສິນຢ່າງສັດຊື່.

4ແລ້ວພວກຜູ້ນຳຂອງຊາດອິດສະຣາເອນກໍມາປະຊຸມກັນ ແລະພາກັນໄປຫາຊາມູເອນທີ່ເມືອງຣາມາ.

5ພວກເຂົາເວົ້າກັບເພິ່ນວ່າ, “ທ່ານເອີຍ ທ່ານກໍເຖົ້າແກ່ແລ້ວ; ພວກລູກຊາຍຂອງທ່ານບໍ່ໄດ້ປະພຶດຕາມແບບຢ່າງຂອງທ່ານເລີຍ. ສະນັ້ນ ຂໍທ່ານຈົ່ງແຕ່ງຕັ້ງກະສັດໃຫ້ເປັນຜູ້ປົກຄອງພວກຂ້ານ້ອຍສາ ເພື່ອພວກຂ້ານ້ອຍຈະມີກະສັດປົກຄອງດັ່ງປະເທດອື່ນໆ.”

6ຊາມູເອນບໍ່ພໍໃຈໃນສິ່ງທີ່ພວກເຂົາຂໍຮ້ອງວ່າ, “ຂໍທ່ານຈົ່ງແຕ່ງຕັ້ງກະສັດໃຫ້ປົກຄອງພວກຂ້ານ້ອຍ.” ດັ່ງນັ້ນ ເພິ່ນຈຶ່ງພາວັນນາອະທິຖານຕໍ່ພຣະເຈົ້າຢາເວ

7ແລະພຣະເຈົ້າຢາເວກ່າວວ່າ, “ຈົ່ງຟັງທຸກໆສິ່ງທີ່ປະຊາຊົນເວົ້າຕໍ່ເຈົ້າ. ພວກເຂົາບໍ່ໄດ້ປະຖິ້ມເຈົ້າ, ແຕ່ໄດ້ປະຖິ້ມເຮົາຕ່າງຫາກ ໂດຍບໍ່ຍອມຮັບເອົາເຮົາເປັນເຈົ້າຊີວິດຂອງພວກເຂົາຕໍ່ໄປ.

8ນັບຕັ້ງແຕ່ເຮົາໄດ້ນຳພວກເຂົາອອກມາຈາກປະເທດເອຢິບພຸ້ນ ພວກເຂົາໄດ້ເຫີນຫ່າງຈາກເຮົາແລະໄປຂາບໄຫວ້ບັນດາພະອື່ນ. ດຽວນີ້ພວກເຂົາກຳລັງປະພຶດຕໍ່ເຈົ້າດັ່ງທີ່ພວກເຂົາເຄີຍປະພຶດຕໍ່ເຮົາ.

9ສະນັ້ນ ເຈົ້າຈົ່ງຟັງພວກເຂົາ, ແຕ່ໃຫ້ຕັກເຕືອນພວກເຂົາຢ່າງໜັກແໜ້ນ ແລະທັງອະທິບາຍສູ່ພວກເຂົາໃຫ້ຮູ້ວ່າ ກະສັດຂອງພວກເຂົານັ້ນຈະປົກຄອງພວກເຂົາຢ່າງໃດ?”

10ຊາມູເອນຈຶ່ງບອກປະຊາຊົນທີ່ມາຂໍໃຫ້ມີກະສັດ ຕາມທຸກໆສິ່ງທີ່ພຣະເຈົ້າຢາເວໄດ້ບອກເພິ່ນ.

11ເພິ່ນອະທິບາຍວ່າ, “ກະສັດຂອງພວກເຈົ້າຈະປະຕິບັດຕໍ່ພວກເຈົ້າດັ່ງນີ້: ເພິ່ນຈະເອົາລູກຊາຍຂອງພວກເຈົ້າໄປເປັນທະຫານ, ບາງຄົນຈະເປັນທະຫານປະຈຳລົດຮົບ, ບາງຄົນຈະເປັນທະຫານມ້າ ແລະບາງຄົນຈະເປັນທະຫານໜ່ວຍກ້າຕາຍ.

12ເພິ່ນຈະແຕ່ງຕັ້ງເຂົາບາງຄົນໃຫ້ເປັນນາຍພັນ ແລະໃຫ້ບາງຄົນເປັນນາຍຮ້ອຍ. ລູກຊາຍຂອງພວກເຈົ້າຈະຕ້ອງໄຖນາແລະກ່ຽວເຂົ້າໃຫ້ເພິ່ນ ແລະເຮັດອາວຸດແລະເຄື່ອງຮົບປະຈຳລົດຮົບໃຫ້ເພິ່ນ.

13ສ່ວນລູກສາວຂອງພວກເຈົ້າຈະຕ້ອງແຕ່ງນໍ້າຫອມໃຫ້ເພິ່ນ ແລະເຮັດວຽກເປັນແມ່ຄົວແລະເປັນຜູ້ເຮັດເຂົ້າໜົມໃຫ້ເພິ່ນ.

14ເພິ່ນຈະຢຶດເອົານາທົ່ງດີທີ່ສຸດຂອງພວກເຈົ້າ ພ້ອມທັງສວນອະງຸ່ນແລະສວນໝາກກອກເທດຂອງພວກເຈົ້າ ໄປໃຫ້ພວກຂ້າຣາຊການຂອງເພິ່ນ.

15ເພິ່ນຈະຫັກເອົາໜຶ່ງສ່ວນສິບຂອງເຂົ້າສາລີແລະໝາກອະງຸ່ນຂອງພວກເຈົ້າ ສຳລັບນາຍທະຫານປະຈຳວັງແລະສຳລັບຂ້າຣາຊການຄົນອື່ນໆຂອງເພິ່ນ.

16ເພິ່ນຈະເອົາບັນດາຄົນຮັບໃຊ້ທັງຊາຍຍິງກັບຝູງງົວ ແລະຝູງລໍໂຕດີທີ່ສຸດຂອງພວກເຈົ້າໄປໃຊ້ເຮັດວຽກໃຫ້ເພິ່ນ.

17ເພິ່ນຈະຫັກເອົາໜຶ່ງສ່ວນສິບຂອງຝູງສັດຂອງພວກເຈົ້າ ແລະພວກເຈົ້າຈະເປັນທາດຮັບໃຊ້ຂອງເພິ່ນ.

18ເມື່ອເວລາມາເຖິງ ພວກເຈົ້າຈະຈົ່ມຢ່າງຂົມຂື່ນໃນຈິດໃຈ ເພາະກະສັດທີ່ພວກເຈົ້າໄດ້ເລືອກເອົານັ້ນ, ແຕ່ພຣະເຈົ້າຢາເວຈະບໍ່ຟັງຄຳຈົ່ມໃດໆຂອງພວກເຈົ້າທັງສິ້ນ.”

19ຝ່າຍປະຊາຊົນບໍ່ສົນໃຈຕໍ່ຄຳເວົ້າຂອງຊາມູເອນເລີຍ ແຕ່ກັບຕອບວ່າ, “ບໍ່! ພວກຂ້ານ້ອຍຕ້ອງການກະສັດ

20ເພື່ອວ່າພວກຂ້ານ້ອຍຈະເປັນດັ່ງຊົນຊາດອື່ນໆ ໂດຍມີກະສັດຂອງຕົນເອງເພື່ອປົກຄອງພວກຂ້ານ້ອຍ ແລະເພື່ອນຳໜ້າພວກຂ້ານ້ອຍອອກໄປສູ່ສະໜາມຮົບ.”

21ຊາມູເອນໄດ້ຟັງເລື່ອງຕ່າງໆທີ່ພວກເຂົາໄດ້ເວົ້າມາ ແລະເພິ່ນກໍນຳເອົາເລື່ອງເຫຼົ່ານັ້ນໄປກ່າວກັບພຣະເຈົ້າຢາເວ.

22ພຣະເຈົ້າຢາເວໄດ້ກ່າວກັບຊາມູເອນວ່າ, “ຈົ່ງເຮັດໃນສິ່ງທີ່ພວກເຂົາຕ້ອງການ ແລະແຕ່ງຕັ້ງກະສັດໃຫ້ພວກເຂົາ.” ແລ້ວຊາມູເອນກໍບອກໃຫ້ພວກຜູ້ຊາຍອິດສະຣາເອນທັງໝົດກັບເມືອ.

← Chapter 7 Jump to: Chapter 9 →