Proverbs 18

Lao Bible 2012 (ພຣະຄຳພີສັກສິ)

← Chapter 17 Jump to: Chapter 19 →

1ຄົນທີ່ບໍ່ຖືກກັບໝູ່ເພື່ອນກໍສົນໃຈນຳແຕ່ຕົນເອງ ລາວບໍ່ເຫັນດີກັບສິ່ງທີ່ທຸກໆຄົນຮູ້ວ່າຖືກຕ້ອງ.

2ຄົນໂງ່ຈ້າບໍ່ສົນເຖິງຄວາມເຂົ້າໃຈ ລາວຢາກເຮັດໄປແຕ່ສິ່ງທີ່ສໍ່ໃຫ້ເຫັນວ່າຕົນເປັນຄົນສະຫລາດ.

3ບາບກັບຄວາມອັບອາຍໄປຄູ່ກັນ ເມື່ອສິ້ນກຽດສັກສີຄວາມປະໝາດກໍເກີດຂຶ້ນແທນທີ່.

4ຄຳເວົ້າຂອງຄົນອາດເປັນບໍ່ເກີດແຫ່ງປັນຍາ ເລິກດັ່ງມະຫາສະໝຸດແລະສົດໃສດັ່ງສາຍນໍ້າ.

5ເຂົ້າຂ້າງຄົນຜິດແລະບິດເບືອນຄວາມຍຸດຕິທຳເປັນການບໍ່ຖືກຕ້ອງ.

6ເມື່ອຄົນໂງ່ຈ້າເລີ່ມຜິດຖຽງກັນ ການຊົກຕ່ອຍກັນກໍມັກເກີດຂຶ້ນ.

7ເມື່ອຄົນໂງ່ຈ້າລັ່ນປາກກໍກຳລັງທຳລາຍຕົນເອງ ຍ້ອນຕິດກັບດັກໃນຖ້ອຍຄຳທີ່ຕົນເວົ້ານັ້ນ.

8ການເວົ້າຂວັນນິນທາຄົນເໝືອນອາຫານທີ່ມີຣົດຊາດແຊບ ແລະມັນຊຶມເຂົ້າໄປເຖິງສ່ວນເລິກຂອງຮ່າງກາຍ.

9ຄົນຂີ້ຄ້ານກໍຊົ່ວຊ້າສໍ່າກັບຄົນທີ່ທຳລາຍໝູ່ເພື່ອນຂອງຕົນເອງ.

10ພຣະນາມຂອງພຣະເຈົ້າຢາເວເປັນດັ່ງປ້ອມທີ່ເຂັ້ມແຂງ ຄືບ່ອນທີ່ຄົນຊອບທຳໄປຢູ່ຢ່າງປອດໄພໄດ້.

11ຄົນຮັ່ງມີຄິດເອົາເອງວ່າຊັບສົມບັດປ້ອງກັນຕົນໄດ້ດັ່ງປ້ອມມີກຳແພງປ້ອງກັນເມືອງ.

12ການອວດດີນັ້ນນຳຄົນໄປສູ່ໄພພິບັດ ການຖ່ອມຕົວນຳຄົນໃຫ້ມີກຽດ.

13ຟັງກ່ອນຈຶ່ງຕອບ ການຕອບກ່ອນໂດຍບໍ່ຟັງເປັນຄວາມໂງ່ງ່າວແລະຄວາມອັບອາຍ.

14ຈິດໃຈຂອງຄົນທົນຕໍ່ຄວາມເຈັບປ່ວຍໄດ້, ແຕ່ຜູ້ທີ່ມີຈິດໃຈຊອກຊໍ້າຈະທົນໄດ້ຢ່າງໃດ?

15ຄົນສະຫລາດຢາກຮໍ່າຮຽນສຶກສາ ໂດຍຕັ້ງໃຈຫາຄວາມຮູ້ໃສ່ຕົວໄວ້.

16ມີຂອງຂວັນໄປພ້ອມໄຂປ່ອງທາງສູ່ທຸກຢ່າງ ຄົນສຳຄັນກໍເຂົ້າພົບໄດ້ຢ່າງແສນງ່າຍດາຍ.

17ຄົນທຳອິດທີ່ເວົ້າໃນສານເບິ່ງຄືເປັນຜູ້ຖືກຕ້ອງ ຈົນກວ່າຄູ່ແຂ່ງໂຕ້ແຍ້ງລາວຄືນ.

18ຖ້າວ່າສອງຄົນມີອຳນາດໂຕ້ຖຽງກັນໃນສານ ຈົ່ງລະງັບເຫດການໂດຍການໃຊ້ສະຫລາກ.

19ຄວາມຊ່ວຍເຫລືອຂອງອ້າຍເອື້ອຍນ້ອງ ກໍສໍ່າກັບກຳແພງເມືອງທີ່ເຂັ້ມແຂງ, ແຕ່ການຜິດຖຽງກັນ ກໍສໍ່າກັບເຫລັກໄລປະຕູອັດຕັນຕົນໄວ້.

20ຄົນຊ່າງເວົ້າກໍສາມາດຫາລ້ຽງທ້ອງຂອງຕົນ ຄຳປາກຂອງຄົນພາໃຫ້ຕົນອີ່ມທ້ອງ.

21ຄຳປາກຊີ້ຂາດຊີວິດວ່າຈະຢູ່ຫລືຕາຍ ຄົນປາກບອນກໍຮັບກຳຍ້ອນຄຳປາກ.

22ຜູ້ທີ່ມີເມຍກໍພົບຂອງມີຄ່າ ເປັນການສະແດງວ່າພຣະເຈົ້າຢາເວດີຕໍ່ຕົນ.

23ຄົນທຸກຈົນອ້ອນວອນຂໍຄວາມເມດຕາ, ແຕ່ຄົນຮັ່ງມີຕອບຄືນມາຢ່າງຫຍາບຊ້າ.

24ເພື່ອນບາງຄົນນຳຄວາມຈິບຫາຍມາໃຫ້, ແຕ່ໝູ່ເພື່ອນບາງຄົນສັດຊື່ກວ່າອ້າຍເອື້ອຍນ້ອງ.

← Chapter 17 Jump to: Chapter 19 →