Proverbs 6

Lao Bible 2012 (ພຣະຄຳພີສັກສິ)

← Chapter 5 Jump to: Chapter 7 →

1ລູກເອີຍ ເຈົ້າໄດ້ສັນຍາຮັບຜິດຊອບຕໍ່ໜີ້ສິນຂອງຄົນອື່ນບໍ?

2ເຈົ້າຖືກຈັບຍ້ອນຖ້ອຍຄຳຈາກສົບຂອງເຈົ້າ ຫລືຖືກບ້ວງແຮ້ວຍ້ອນຄຳສັນຍາຈາກປາກຂອງເຈົ້າເອງບໍ?

3ລູກເອີຍ ຖ້າເປັນດັ່ງນັ້ນ ເຈົ້າກໍຢູ່ໃຕ້ອຳນາດຂອງຄົນນັ້ນສາແລ້ວ ແຕ່ນີ້ແມ່ນວິທີອອກຂອງເຈົ້າເດີ: ຈົ່ງຟ້າວໄປຫາລາວແລະຂໍໃຫ້ລາວປ່ອຍເຈົ້າ.

4ຢ່າໃຫ້ເຈົ້າໄດ້ນອນເສີຍຫລືຢຸດພັກຜ່ອນ.

5ຈົ່ງອອກໜີຈາກບ້ວງແຮ້ວດັ່ງນົກຫລືກວາງທີ່ກຳລັງປົບໜີຈາກນາຍພານ.

6ຄົນຂີ້ຄ້ານຄວນຮຽນຮູ້ເອົາບົດຮຽນຈາກຊີວິດຂອງມົດ

7ພວກມັນບໍ່ມີຜູ້ນຳ ບໍ່ມີນາຍ ຫລືຜູ້ປົກຄອງ,

8ແຕ່ພວກມັນສະສົມອາຫານໄວ້ໃນລະດູຮ້ອນເພື່ອຕຽມໄວ້ສຳລັບລະດູໜາວ.

9ຄົນຂີ້ຄ້ານຈະນອນຢຽດຢູ່ດົນປານໃດ? ເມື່ອໃດນໍລາວຈຶ່ງຈະຕື່ນຂຶ້ນ?

10ລາວເວົ້າວ່າ, “ຂ້ອຍຈະນອນພັກຜ່ອນໜ້ອຍໜຶ່ງ, ຂໍຢຽດເສັ້ນຢຽດເອັນ ມືກອດເອິກນອນພັກຜ່ອນບຶດໜຶ່ງເສຍກ່ອນ.”

11ແຕ່ໃນຂະນະທີ່ລາວນອນຫລັບຢູ່ນັ້ນ ຄວາມທຸກລຳບາກກໍຈະມາໂຈມຕີລາວດັ່ງມີຄົນໜຶ່ງຖືອາວຸດມາປຸ້ນລາວ.

12ຄົນໂລເລກັບຄົນຊົ່ວຮ້າຍມັກທ່ຽວໄປຫາຕົວະ.

13ພວກເຂົາຍິກຄີ້ວລິ່ວຕາເພື່ອຫລອກລວງເຈົ້າ

14ແຜນການອັນຊົ່ວຮ້າຍໃນແນວຄິດອັນເປິເປື້ອນຂອງພວກເຂົານັ້ນ ສ້າງຄວາມເດືອດຮ້ອນໃຫ້ທຸກບ່ອນ.

15ດ້ວຍເຫດນັ້ນ ຄວາມພິນາດຈະທຳລາຍພວກເຂົາໂດຍບໍ່ຮູ້ຕົວ ແລະເຄາະຮ້າຍອັນເຖິງຕາຍກໍຈະຕົກຖືກພວກເຂົາເຈົ້າ.

16ມີເຈັດຢ່າງທີ່ພຣະເຈົ້າຢາເວກຽດຊັງ ແລະຜ່ອນຜັນໃຫ້ບໍ່ໄດ້: ຕາທີ່ຈອງຫອງ ລີ້ນທີ່ເວົ້າຕົວະ ມືທີ່ຂ້າຄົນບໍ່ມີຄວາມຜິດ ໃຈທີ່ຄິດແຜນການຊົ່ວຮ້າຍ ຕີນທີ່ຟ້າວແລ່ນໄປເຮັດຊົ່ວ ຜູ້ທີ່ເວົ້າຄຳພະຍານບໍ່ຈິງຕໍ່ສູ້ຄົນອື່ນ ແລະຜູ້ທີ່ຫາເລື່ອງໃຫ້ພີ່ນ້ອງຜິດຖຽງກັນ.

20ລູກເອີຍ ຈົ່ງເຮັດຕາມຄຳທີ່ພໍ່ບອກສອນ ແລະຢ່າລືມໄລຄຳສັ່ງສອນຂອງແມ່ເຈົ້າ.

21ຈົ່ງຖືຮັກສາຖ້ອຍຄຳຂອງເພິ່ນໄວ້ສະເໝີ ແລະຝັງຖ້ອຍຄຳນັ້ນໄວ້ຢູ່ໃນຈິດໃຈເຈົ້າ.

22ຄຳສັ່ງສອນຂອງເພິ່ນຈະນຳພາເມື່ອເຈົ້າເດີນທາງ ຄຸ້ມຄອງເຈົ້າຍາມກາງຄືນ ແລະແນະນຳເຈົ້າໃນເວລາກາງເວັນ.

23ຄຳສັ່ງສອນຂອງເພິ່ນເປັນແສງແຈ້ງເຍືອງທາງເດີນ ຄຳບອກເຕືອນຂອງເພິ່ນສັ່ງສອນເຈົ້າໃຫ້ຮູ້ຈັກການດຳເນີນຊີວິດ.

24ຖ້ອຍຄຳນັ້ນ ຮັກສາເຈົ້າໃຫ້ພົ້ນຈາກຍິງຊົ່ວໄດ້ ຄືຈາກຄຳເວົ້າອັນລໍ້ລວງຂອງເມຍຄົນອື່ນ.

25ຢ່າໃຫ້ຄວາມງາມຂອງນາງເປັນທີ່ຍົວະເຍົ້າໃຈເຈົ້າໄດ້ ຢ່າໃຫ້ສາຍຕາອັນຫວານແກມລວງຂອງນາງ ເປັນແຮ້ວດັກຈັບເຈົ້າໄດ້.

26ສຳລັບຍິງໂສເພນີນັ້ນ ຈ້າງນອນນຳໄດ້ດ້ວຍລາຄາພຽງໜ້ອຍດຽວ, ແຕ່ສຳລັບຍິງທີ່ມີຜົວແມ່ນຈະທຳລາຍຊີວິດຂອງເຈົ້າ.

27ໃຜແດ່ທີ່ຫອບຖ່ານໄຟແດງໃສ່ໜ້າເອິກໂດຍເສື້ອຂອງຕົນບໍ່ໄໝ້?

28ໃຜແດ່ທີ່ຍ່າງໃນຖ່ານໄຟແດງແລ້ວໂດຍທີ່ໄຟບໍ່ໄໝ້ຕີນ?

29ຜູ້ທີ່ນອນນຳເມຍຂອງຊາຍອື່ນກໍເປັນອັນຕະລາຍ. ດັ່ງນີ້ແຫລະ ຜູ້ໃດກໍຕາມທີ່ເຮັດດັ່ງນີ້ ຈະໄດ້ຮັບໂທດຢ່າງທໍລະມານ.

30ຄົນເຮົາບໍ່ຫ່ອນຊັງຄົນຂີ້ລັກໄດ້ ຖ້າລາວລັກຍ້ອນຄວາມຫິວ,

31ແຕ່ຖ້າຖືກຈັບໄດ້ ລາວຕ້ອງຈ່າຍຄືນເຈັດເທົ່າ ຄືລາວຕ້ອງເສຍທຸກສິ່ງທີ່ຕົນມີຢູ່.

32ແຕ່ຊາຍທີ່ຫລິ້ນຊູ້ເປັນຜູ້ໄຮ້ຄວາມຮູ້ສຶກ ລາວມີແຕ່ທຳລາຍຕົນເອງ.

33ລາວຈະຖືກລົດກຽດແລະຖືກຕົບຕີ ລາວຈະເປັນທີ່ອັບອາຍຕໍ່ໄປເລື້ອຍໆ.

34ຜົວເກີດໂມໂຫຂຶ້ນຍ້ອນຫຶງຫວງເມຍ ການແກ້ແຄ້ນຂອງລາວບໍ່ມີຂອບເຂດ.

35ລາວຈະບໍ່ຍອມຮັບເອົາຄ່າທຳຂວັນໃດໆ ຂອງຂວັນກອງຖ້ວມຫົວ ກໍຈະບໍ່ຊ່ວຍໃຫ້ລາວຊ່ວງເຊົາໂມໂຫໄດ້.

← Chapter 5 Jump to: Chapter 7 →