Proverbs 29

Lao Bible 2012 (ພຣະຄຳພີສັກສິ)

← Chapter 28 Jump to: Chapter 30 →

1ຄົນທີ່ສືບຕໍ່ດື້ດ້ານຕໍ່ຄຳບອກສອນ ກໍຈະຫຼົ້ມຈົມຈົນເຫລືອແກ້ໃນມື້ໜຶ່ງ.

2ເມື່ອຄົນຊອບທຳຄອງອຳນາດ ປະຊາຊົນກໍເປັນສຸກ ແຕ່ເມື່ອຄົນອະທຳຄອງອຳນາດປະຊາຊົນກໍເປັນທຸກ.

3ລູກທີ່ເຫັນຄຸນຄ່າຂອງປັນຍາ ບິດາກໍພາກພູມໃຈນຳ. ຄົນໂງ່ງ່າວເສຍເງິນຍ້ອນໃຊ້ຈ່າຍກັບໂສເພນີ.

4ເມື່ອກະສັດເປັນຫ່ວງນຳຄວາມຍຸດຕິທຳ ປະເທດຊາດກໍເຂັ້ມແຂງ, ແຕ່ເມື່ອເພິ່ນເປັນຫ່ວງນຳແຕ່ເງິນຄຳ ເພິ່ນກໍຈະເຮັດໃຫ້ປະເທດຊາດຫຼົ້ມຈົມລົງໄດ້.

5ຄົນທີ່ປະຈົບປະແຈງໝູ່ຄູ່ ກໍຫ້າງແຮ້ວໃສ່ຕົນເອງ.

6ຄົນຊົ່ວຮ້າຍຖືກແຮ້ວໃນບາບກຳຂອງຕົນ ໃນຂະນະທີ່ຄົນສັດຊື່ ມີຄວາມສຸກແລະມີອິດສະລະພາບ.

7ຄົນດີຮູ້ຈັກສິດທິຂອງຄົນທຸກ, ແຕ່ຄົນຊົ່ວບໍ່ເຂົ້າໃຈໃນເລື່ອງນີ້ເລີຍ.

8ຄົນທີ່ບໍ່ນັບຖືຜູ້ອື່ນ ພາໃຫ້ທັງເມືອງຫຍຸ້ງຍາກ ຄົນມີປັນຍາກໍໃຫ້ທຸກສິ່ງສະຫງົບສຸກໄດ້.

9ເມື່ອຄົນມີປັນຍາຟ້ອງຄົນໂງ່ຈ້າ ຄົນໂງ່ຈ້າກໍມີແຕ່ເວົ້າຈາດົ່ງດັງຫຍໍ້ຫຍັນ.

10ຄົນກະຫາຍເລືອດກຽດຊັງຄົນສັດຊື່, ແຕ່ຄົນຊອບທຳຈະຄຸ້ມຄອງ ຊີວິດຂອງລາວໄວ້.

11ຄົນໂງ່ຈ້າເປັ່ງຄວາມໂມໂຫອອກມາ, ແຕ່ວ່າຄົນທີ່ຢັ້ງຄິດກໍທົນທານແລະອົດທົນໄວ້ໄດ້.

12ຖ້າຜູ້ປົກຄອງເອົາໃຈໃສ່ຕໍ່ຄຳລາຍງານບໍ່ຈິງ, ຂ້າຣາຊການຂອງເພິ່ນທັງໝົດຈະເປັນຄົນຂີ້ຕົວະ.

13ຄົນທຸກແລະຜູ້ຂົ່ມເຫັງຄົນທຸກນັ້ນ ມີສິ່ງທີ່ເໝືອນກັນ ຄືພຣະເຈົ້າຢາເວປະທານຄວາມສະຫວ່າງໃຫ້ແກ່ຕາຂອງເຂົາທັງສອງ.

14ຖ້າກະສັດປົກປ້ອງສິດທິຂອງຄົນທຸກ ເພິ່ນກໍຈະປົກຄອງໄດ້ດົນນານ.

15ການແອບສອນແລະການວາງລະບຽບນັ້ນເປັນການດີສຳລັບເດັກ ຖ້າລູກເຮັດຕາມໃຈຕົນເອງ ແມ່ກໍຈະໄດ້ຮັບຄວາມອັບອາຍຂາຍໜ້າ.

16ເມື່ອຄົນຊົ່ວຄອງອຳນາດ ອາດຊະຍາກຳກໍທະວີຄູນ, ແຕ່ຄົນຊອບທຳຈະເຫັນລາວຫຼົ້ມຈົມລົງໃນມື້ໜຶ່ງ.

17ຈົ່ງຕີສອນລູກຂອງເຈົ້າ ແລະພວກເຂົາຈະໃຫ້ເຈົ້າໄດ້ເຊົາເມື່ອຍ ພວກເຂົາຈະໃຫ້ຄວາມປິຕິຍິນດີແກ່ໃຈຂອງເຈົ້າ.

18ຊົນຊາດໃດທີ່ບໍ່ມີນິມິດ ຊົນຊາດນັ້ນກໍຈະຈິບຫາຍ, ແຕ່ຄວາມສຸກເປັນຂອງຄົນທີ່ຖືຮັກສາກົດບັນຍັດຂອງພຣະເຈົ້າ.

19ພຽງແຕ່ໃຊ້ຖ້ອຍຄຳເທົ່ານັ້ນ ຈະສອນຄົນຮັບໃຊ້ບໍ່ໄດ້ ເຖິງແມ່ນວ່າພວກເຂົາເຂົ້າໃຈ, ແຕ່ພວກເຂົາກໍຈະບໍ່ເຮັດຕາມ.

20ຄົນໂງ່ຈ້າກໍຍັງມີຄວາມຫວັງກວ່າຄົນທີ່ເວົ້າບໍ່ຄິດ.

21ຜູ້ທີ່ລ້ຽງດູຄົນຮັບໃຊ້ຕາມໃຈພວກເຂົາຕັ້ງແຕ່ພວກເຂົາຍັງເປັນເດັກນ້ອຍມາ, ມື້ໜຶ່ງ ລາວຈະເປັນເຈົ້າຂອງທຸກສິ່ງທີ່ເຈົ້າມີ.

22ຄົນທີ່ໂມໂຫງ່າຍ ກໍ່ໃຫ້ເກີດຜິດຖຽງກັນ ແລະນຳຄວາມເດືອດຮ້ອນມາໃຫ້.

23ການອວດດີພາໃຫ້ຕົນຕົກຕໍ່າ, ແຕ່ການຖ່ອມຕົວນັ້ນເຮັດໃຫ້ຄົນນັບຖື.

24ຜູ້ທີ່ສົມຮູ້ຮ່ວມຄິດກັບຄົນຂີ້ລັກ ກໍເປັນສັດຕູຕໍ່ຕົນເອງ ລາວຈະຖືກບອກໃຫ້ສາບານ, ແຕ່ບໍ່ກ້າເປີດເຜີຍຄວາມຈິງໄດ້.

25ຜູ້ທີ່ກັງວົນນຳຄົນເວົ້າໃຫ້ ກໍເປັນອັນຕະລາຍ, ແຕ່ຜູ້ທີ່ໄວ້ວາງໃຈໃນພຣະເຈົ້າຢາເວ ກໍມີຄວາມປອດໄພ.

26ທຸກຄົນຍ່ອມຕ້ອງການຄົນດີມາປົກຄອງ, ແຕ່ຄວາມຍຸດຕິທຳໄດ້ມາທາງພຣະເຈົ້າຢາເວເທົ່ານັ້ນ.

27ຄົນຊອບທຳກຽດຊັງຄົນຊົ່ວແລະຄົນຊົ່ວກໍກຽດຊັງຄົນຊອບທຳ.

← Chapter 28 Jump to: Chapter 30 →