Proverbs 9

Lao Bible 2012 (ພຣະຄຳພີສັກສິ)

← Chapter 8 Jump to: Chapter 10 →

1ປັນຍາໄດ້ສ້າງເຮືອນຂອງຕົນດ້ວຍເສົາເຈັດຕົ້ນ.

2ປັນຍາໄດ້ຂ້າສັດສຳລັບງານກິນລ້ຽງສະຫລອງ ປົນເຄື່ອງເທດໃສ່ເຫຼົ້າອະງຸ່ນ ແລະຈັດແຈງໂຕະໄວ້ດ້ວຍ.

3ປັນຍາສົ່ງສາວໃຊ້ທັງຫລາຍອອກໄປເອີ້ນຈາກທີ່ສູງສຸດຢູ່ໃນເມືອງວ່າ,

4“ຈົ່ງເຂົ້າມາເຖີດຄົນໂງ່ຈ້າເອີຍ.” ແລະຕໍ່ຄົນໂງ່ຈ້ານັ້ນປັນຍາໄດ້ເວົ້າວ່າ,

5“ຈົ່ງມາກິນເຂົ້າແລະດື່ມເຫຼົ້າອະງຸ່ນທີ່ເຮົາໄດ້ປະສົມໄວ້.

6ຈົ່ງໜີຈາກໝູ່ທີ່ໂງ່ຈ້ານັ້ນສາ ແລ້ວເຈົ້າກໍຈະມີຊີວິດຢູ່ ຈົ່ງເດີນຕາມທາງແຫ່ງຄວາມຮອບຮູ້.”

7ຖ້າເຈົ້າບອກສອນຄົນອວດດີຜູ້ໜຶ່ງ ເຈົ້າກໍຈະໄດ້ຮັບແຕ່ການດູໝິ່ນນິນທາ. ຖ້າເຈົ້າຕັກເຕືອນຄົນຊົ່ວຜູ້ໜຶ່ງ ເຈົ້າກໍຈະໄດ້ຮັບແຕ່ຄວາມເຈັບປວດ.

8ຢ່າບອກສອນຄົນທີ່ອວດດີຈັກເທື່ອ ເພາະລາວຈະຊັງເຈົ້າຍ້ອນຄຳບອກສອນນັ້ນ ແຕ່ຖ້າເຈົ້າບອກສອນຄົນມີປັນຍາ ລາວຈະນັບຖືເຈົ້າ.

9ທຸກສິ່ງທີ່ເຈົ້າເວົ້າກັບຄົນມີປັນຍາຈະເພີ່ມປັນຍາໃຫ້ລາວ. ສິ່ງໃດທີ່ເຈົ້າບອກຄົນຊອບທຳກໍເທົ່າກັບເພີ່ມຄວາມຮູ້ແກ່ລາວຕື່ມຂຶ້ນ.

10ການຢຳເກງພຣະເຈົ້າຢາເວເປັນບໍ່ເກີດແຫ່ງປັນຍາ. ຖ້າເຈົ້າຮູ້ອົງບໍຣິສຸດເຈົ້າກໍມີຄວາມຮູ້ແຈ້ງເຫັນຈິງ.

11ປັນຍາຈະເຮັດໃຫ້ເຈົ້າມີຊີວິດຍືນຍາວ.

12ຖ້າເຈົ້າມີປັນຍາ ເຈົ້າເອງກໍຈະໄດ້ຮັບຜົນກຳໄລເພີ່ມ, ແຕ່ຖ້າເຈົ້າບໍ່ຍອມຮັບປັນຍາ ເຈົ້າເອງກໍຈະທົນທຸກ.

13ຄວາມໂງ່ຈ້າເປັນດັ່ງແມ່ຍິງທີ່ມັກຈົ່ມວ່າ ອັບປັນຍາ ແລະໜ້າດ້ານ.

14ນາງນັ່ງທີ່ປະຕູເຮືອນຂອງຕົນ ຫລືນັ່ງຢູ່ບ່ອນສູງໆໃນເມືອງ

15ແລະເອີ້ນໃສ່ຄົນຜ່ານໄປມາ ຜູ້ທີ່ໃສ່ໃຈກິດທຸລະຂອງຕົນເອງວ່າ,

16“ຄົນໂງ່ຈ້າເອີຍ ລ້ຽວເຂົ້າມາພີ້” ນາງເວົ້າຕໍ່ຄົນໂງ່ຈ້າວ່າ,

17“ນໍ້າທີ່ລັກມາກໍຫວານກວ່າ ເຂົ້າທີ່ລັກມາກໍແຊບດີ.”

18ຜູ້ທີ່ຕົກເປັນເຫຍື່ອຂອງນາງບໍ່ຮູ້ຈັກວ່າມີຄົນຕາຍຢູ່ທີ່ນັ້ນ ຜູ້ທີ່ເຂົ້າໄປແລ້ວນັ້ນ ບັດນີ້ ກໍຢູ່ໃນແດນມໍຣະນາເສຍແລ້ວ.

← Chapter 8 Jump to: Chapter 10 →