Proverbs 4

Lao Bible 2012 (ພຣະຄຳພີສັກສິ)

← Chapter 3 Jump to: Chapter 5 →

1ພວກລູກໆເອີຍ ຈົ່ງຟັງສິ່ງທີ່ພໍ່ຂອງພວກເຈົ້າບອກສອນ ຈົ່ງຕັ້ງຈິດຕັ້ງໃຈຟັງ ແລະພວກເຈົ້າກໍຈະມີຄວາມເຂົ້າໃຈ.

2ສິ່ງທີ່ພໍ່ບອກສອນພວກເຈົ້ານີ້ເປັນສິ່ງທີ່ດີ ສະນັ້ນ ຈົ່ງພາກັນຈື່ຈຳເອົາໄວ້ໝົດທຸກສິ່ງ.

3ເມື່ອພໍ່ຍັງເປັນເດັກນ້ອຍຢູ່ນັ້ນ ຄືເປັນລູກຄົນດຽວຂອງພໍ່ແມ່

4ປູ່ຂອງເຈົ້າກໍໄດ້ບອກສອນພໍ່ເໝືອນກັນ ເພິ່ນເຄີຍເວົ້າວ່າ, “ຈົ່ງຈື່ຈຳຄຳທີ່ພໍ່ບອກສອນແລະຢ່າລືມໄລຈັກເທື່ອ. ຈົ່ງເຮັດຕາມຄຳທີ່ພໍ່ບອກສອນແລະເຈົ້າຈະມີຊີວິດຢູ່.

5ຈົ່ງຮັບເອົາປັນຍາແລະຄວາມຮູ້ແຈ້ງເຫັນຈິງ ຢ່າລືມໄລແລະຢ່າຫລີກໜີຈາກຖ້ອຍຄຳແຫ່ງປາກຂອງເຮົາ.

6ຢ່າປະຖິ້ມປັນຍາ ເພາະປັນຍາຈະຄຸ້ມຄອງເຈົ້າໄວ້ ຈົ່ງຮັກແພງປັນຍາ ແລະປັນຍາຈະຮັກສາເຈົ້າໄວ້ໃຫ້ປອດໄພ.

7ປັນຍາແມ່ນສິ່ງສຳຄັນອັນສຸດຍອດ. ສະນັ້ນ ຈົ່ງຫາເອົາປັນຍາໃຫ້ໄດ້ ຈົ່ງຍອມເສຍທຸກສິ່ງທີ່ເຈົ້າມີຢູ່ເພື່ອຈະກາຍເປັນຄົນມີປັນຍາ.

8ຈົ່ງຮັກແພງປັນຍາ ແລະປັນຍາຈະເຮັດໃຫ້ເຈົ້າຍິ່ງໃຫຍ່ ຈົ່ງກອດເອົາປັນຍາໄວ້ ເພາະປັນຍາຈະນຳເອົາກຽດສັກສີມາສູ່ເຈົ້າ.

9ປັນຍາຈະເປັນມົງກຸດອັນສະຫງ່າຣາສີເທິງຫົວຂອງເຈົ້າ.”

10ລູກເອີຍ ຈົ່ງຟັງ ຈົ່ງເອົາໃຈໃສ່ຕໍ່ຄຳທີ່ພໍ່ບອກສອນ ເພື່ອເຈົ້າຈະມີຊີວິດຍືນຍາວ.

11ພໍ່ໄດ້ບອກສອນເຈົ້າເຖິງປັນຍາ ແລະການດຳເນີນຊີວິດໃນທາງອັນຖືກຕ້ອງ.

12ບໍ່ມີສິ່ງໃດທີ່ຈະຂັດຂວາງທາງເດີນຂອງເຈົ້າ ຖ້າເຈົ້າດຳເນີນຊີວິດຢ່າງຄົນມີປັນຍາ ເມື່ອເຈົ້າແລ່ນ ເຈົ້າຈະບໍ່ເຕະສະດຸດລົ້ມ.

13ຈົ່ງຈື່ຈຳເອົາໄວ້ສະເໝີສິ່ງທີ່ເຈົ້າໄດ້ຮຽນຮູ້ມາແລ້ວນັ້ນ. ການສຶກສາຄືຊີວິດຂອງເຈົ້າ ຈົ່ງເຝົ້າຮັກສາເອົາສິ່ງນີ້ໄວ້ໃຫ້ດີ.

14ຢ່າຍ່າງຕາມທາງຂອງຄົນຊົ່ວຮ້າຍ ຢ່າເຮັດຕາມແບບຢ່າງຂອງຄົນບໍ່ດີ.

15ຢ່າເຮັດເຊັ່ນນັ້ນເດີ ຈົ່ງຫລີກເວັ້ນຈາກຄວາມຊົ່ວ ຈົ່ງຜີກໜີແລະເດີນໄປຕາມທາງຂອງເຈົ້າ.

16ຄົນຊົ່ວບໍ່ຫ່ອນນອນຫລັບໄດ້ຈົນກວ່າພວກເຂົາໄດ້ໄປເຮັດຜິດມາ. ພວກເຂົານອນມືນຕາ ຈົນກວ່າໄດ້ທຳຮ້າຍຄົນແລ້ວຈຶ່ງນອນຫລັບໄດ້.

17ການຊົ່ວຊ້າແລະການຮຸນແຮງຄືເຄື່ອງກິນແລະເຄື່ອງດື່ມຂອງພວກເຂົາ.

18ທາງຂອງຄົນຊອບທຳເດີນໄປນັ້ນເປັນດັ່ງຕາເວັນຂຶ້ນໃນຍາມເຊົ້າ ໂດຍສ່ອງແສງເຫລື້ອມໃສຂຶ້ນໄປຈົນກວ່າກາງເວັນມາຮອດ.

19ສ່ວນທາງຂອງຄົນຊົ່ວຮ້າຍນັ້ນກໍມືດມິດດັ່ງກາງຄືນ. ພວກເຂົາລົ້ມລົງແຕ່ບໍ່ເຫັນສິ່ງທີ່ພວກເຂົາສະດຸດລົ້ມນັ້ນໄດ້.

20ລູກເອີຍ ຈົ່ງເອົາໃຈໃສ່ໃນສິ່ງທີ່ພໍ່ບອກສອນ. ຈົ່ງຟັງຖ້ອຍຄຳຂອງພໍ່.

21ຢ່າປ່ອຍໃຫ້ຖ້ອຍຄຳນັ້ນໜີໄປຈາກເຈົ້າ ຈົ່ງຈື່ຈຳແລະເກັບກຳເອົາຖ້ອຍຄຳນັ້ນໄວ້ໃນໃຈເຈົ້າ.

22ຖ້ອຍຄຳເຫຼົ່ານັ້ນຈະໃຫ້ຊີວິດແກ່ຜູ້ທີ່ຄົ້ນພົບ ແລະປິ່ນປົວເນື້ອກາຍຂອງຜູ້ນັ້ນທັງສິ້ນ.

23ຈົ່ງລະວັງສິ່ງທີ່ເຈົ້າຄິດຢູ່ໃນໃຈໃຫ້ດີ ເພາະຊີວິດຂອງຄົນຖືກຫລໍ່ຫລອມຂຶ້ນໂດຍຄວາມນຶກຄິດ.

24ຢ່າໃຫ້ປາກເຈົ້າເວົ້າຈັກເທື່ອເຖິງສິ່ງທີ່ບໍ່ເປັນຄວາມຈິງ. ຢ່າຫຍຸ້ງກ່ຽວກັບສິ່ງໃດໆທີ່ພົວພັນກັບການຫລອກລວງ.

25ຈົ່ງໃຫ້ສາຍຕາເຈົ້າຈ້ອງເບິ່ງຊື່ໜ້າຄົນ ແນມໄປຢ່າງຊື່ກົງດ້ວຍຄວາມໜັກແໜ້ນ.

26ຈົ່ງວາງແຜນຢ່າງຮອບຄອບໃນສິ່ງທີ່ເຈົ້າກະທຳ ແລະສິ່ງໃດໆທີ່ເຈົ້າກະທຳໄປກໍຈະເປັນການຖືກຕ້ອງ.

27ຈົ່ງຫລີກເວັ້ນຈາກຄວາມຊົ່ວ ແລະຍ່າງຊື່ກົງໄປ ຢ່າກ້າວອອກໄປຈາກທາງເດີນທີ່ຖືກຕ້ອງ.

← Chapter 3 Jump to: Chapter 5 →