Proverbs 5

Lao Bible 2012 (ພຣະຄຳພີສັກສິ)

← Chapter 4 Jump to: Chapter 6 →

1ລູກເອີຍ ຈົ່ງເອົາໃຈໃສ່ຟັງປັນຍາແລະຄວາມຮູ້ແຈ້ງເຫັນຈິງ.

2ແລ້ວເຈົ້າກໍຈະຮູ້ຈັກປະພຶດຕົນຢ່າງເໝາະສົມ ແລະຖ້ອຍຄຳຂອງເຈົ້າຈະສະແດງໃຫ້ເຫັນວ່າເຈົ້າມີຄວາມຮູ້.

3ຮີມສົບເມຍຂອງຊາຍອື່ນອາດຫວານຊື່ນດັ່ງນໍ້າເຜິ້ງ ແລະການຈູບຂອງນາງອາດຫລ່ຽນໄຫລດັ່ງນໍ້າມັນໝາກກອກເທດ,

4ແຕ່ໃນທີ່ສຸດ ນາງບໍ່ໄດ້ປະຫຍັງໄວ້ໃຫ້ນອກຈາກຄວາມຂົມຂື່ນແລະເຈັບປວດ.

5ນາງຈະນຳເອົາເຈົ້າລົງໄປໃນໂລກຂອງຄົນຕາຍ ຫົນທາງທີ່ນາງຍ່າງແມ່ນນຳໄປສູ່ຄວາມຕາຍ.

6ນາງບໍ່ຢູ່ໃນທາງທີ່ນຳໄປສູ່ຊີວິດ, ແຕ່ເດີນໂຊເຊໄປແລະບໍ່ຮູ້ຈັກຄັກແນ່ວ່າແມ່ນຫຍັງກຳລັງເກີດຂຶ້ນ.

7ພວກລູກໆເອີຍ ບັດນີ້ຈົ່ງຟັງພໍ່ເທີ້ນ ແລະຢ່າລືມໄລຄຳທີ່ພໍ່ບອກສອນ.

8ຈົ່ງຫລີກໜີຈາກຜູ້ຍິງຢ່າງນັ້ນ ແມ່ນແຕ່ປະຕູເຮືອນຂອງນາງກໍຢ່າສູ່ໄປໃກ້

9ຖ້າເຈົ້າໄປ ເຈົ້າຈະເອົາກຽດທີ່ເຄີຍມີໃຫ້ຄົນອື່ນ ແລະພວກເຈົ້າຈະຕາຍແຕ່ຍັງໜຸ່ມດ້ວຍນໍ້າມືຂອງພວກທີ່ຂາດຄວາມເມດຕາ.

10ແມ່ນແລ້ວ ຄົນແປກໜ້າຈະເອົາຊັບສິນທັງໝົດຂອງພວກເຈົ້າໄປ ແລະສິ່ງທີ່ພວກເຈົ້າຊອກຫາມາໄດ້ທັງໝົດກໍຈະຕົກເປັນຂອງຄົນອື່ນ.

11ເຈົ້າຈະນອນຄວນຄາງຕາຍຢູ່ເທິງຕຽງ ເນື້ອໜັງຕົນຕົວຂອງເຈົ້າຈະມີແນວກັດກິນ

12ແລະເຈົ້າກໍຈະເວົ້າວ່າ, “ຊັ້ນແຫລະ ເພາະຂ້ອຍບໍ່ມັກໃຫ້ຄົນອື່ນຕັກເຕືອນ ແລະບໍ່ຍອມໃຫ້ຜູ້ອື່ນດັດແປງກໍ່ສ້າງ.

13ຂ້ອຍບໍ່ໄດ້ຟັງຄຳຂອງຄູສັ່ງສອນ. ຂ້ອຍບໍ່ໄດ້ເອົາໃຈໃສ່ຕໍ່ຄຳເວົ້າຂອງເພິ່ນ.

14ແລະໃນທັນໃດນັ້ນ ຂ້ອຍພົບວ່າຕົນເອງໄດ້ຖືກຂາຍໜ້າໃນທ່າມກາງມະຫາຊົນ.”

15ຈົ່ງສັດຊື່ຕໍ່ເມຍຂອງເຈົ້າ ແລະມອບຄວາມຮັກໃຫ້ແກ່ນາງແຕ່ຜູ້ດຽວ.

16ລູກທີ່ເຈົ້າໄດ້ນຳຍິງຄົນອື່ນບໍ່ມີຫຍັງດີສຳລັບເຈົ້າ.

17ລູກຂອງເຈົ້າຄວນໃຫຍ່ຂຶ້ນມາເພື່ອຊ່ວຍເຫລືອເຈົ້າ ແລະບໍ່ແມ່ນສຳລັບຊ່ວຍຜູ້ອື່ນ.

18ສະນັ້ນ ຈົ່ງເປັນສຸກຢູ່ກັບເມຍຂອງເຈົ້າ ແລະຈົ່ງພົບຄວາມຊົມຊື່ນຍິນດີກັບຍິງທີ່ເຈົ້າແຕ່ງງານນຳ

19ຄືຜູ້ທີ່ເປັນໜ້າຮັກດັ່ງກວາງແມ່ ແລະງາມສະຫງ່າດັ່ງເຍືອງຜາ. ຈົ່ງໃຫ້ສະເໜ່ຂອງນາງເຮັດໃຫ້ເຈົ້າມີຄວາມສຸກໃຈ ຈົ່ງໃຫ້ຄວາມຮັກຂອງນາງຈັບໃຈຂອງເຈົ້າໄວ້.

20ລູກເອີຍ ເປັນຫຍັງເຈົ້າຈຶ່ງຕ້ອງເອົາຄວາມຮັກຂອງເຈົ້າໃຫ້ແກ່ຍິງອື່ນ? ເປັນຫຍັງເຈົ້າຈຶ່ງໄປຫາຄວາມສຸກກັບເມຍຂອງຊາຍອື່ນ?

21ພຣະເຈົ້າຢາເວເຫັນທຸກໆສິ່ງທີ່ເຈົ້າເຮັດເດີ ບໍ່ວ່າເຈົ້າໄປທາງໃດພຣະອົງກຳລັງເຝົ້າເບິ່ງຢູ່.

22ຄວາມຜິດນັ້ນ ຄຸມຂັງຜູ້ທີ່ເຮັດຜິດ ການບາບຂອງຄົນຊົ່ວກໍເປັນບ້ວງແຮ້ວ. ພວກເຂົາຖືກຈັບໃນຕາໜ່າງແຫ່ງບາບຂອງພວກເຂົາເອງ.

23ພວກເຂົາຕາຍໄປເພາະພວກເຂົາບໍ່ມີການຄວບຄຸບຕົນເອງ. ຄວາມໂງ່ຈ້າອັນສຸດຂີດຂອງພວກເຂົາສົ່ງພວກເຂົາໄປສູ່ຂຸມຝັງສົບ.

← Chapter 4 Jump to: Chapter 6 →