Proverbs 7

Lao Bible 2012 (ພຣະຄຳພີສັກສິ)

← Chapter 6 Jump to: Chapter 8 →

1ລູກເອີຍ ຈົ່ງຈື່ຈຳສິ່ງທີ່ພໍ່ບອກສອນ ແລະຢ່າລືມໄລສິ່ງທີ່ພໍ່ບອກເຈົ້າໃຫ້ປະພຶດ.

2ຈົ່ງເຮັດຕາມສິ່ງທີ່ພໍ່ບອກ ແລະເຈົ້າກໍຈະມີຊີວິດ. ຈົ່ງຕັ້ງໜ້າຮັກສາຄຳສັ່ງສອນຂອງພໍ່ໄວ້ດັ່ງເຈົ້າຮັກສາແກ້ວຕາເຈົ້າເອງ.

3ຈົ່ງຖືຮັກສາຄຳສັ່ງສອນຂອງພໍ່ໄວ້ກັບເຈົ້າຢູ່ທຸກເວລາ ຈົ່ງບັນທຶກສິ່ງນັ້ນໄວ້ຢູ່ໃນຈິດໃຈເຈົ້າ.

4ຈົ່ງຮັກແພງປັນຍາ ດັ່ງຮັກແພງນ້ອງສາວ ແລະຮັກແພງຄວາມເຂົ້າໃຈອັນແທ້ຈິງ ດັ່ງຮັກແພງໝູ່ທີ່ໃກ້ຊິດສະໜິດແໜ້ນ.

5ຖ້ອຍຄຳນັ້ນຈະຮັກສາເຈົ້າໄວ້ ບໍ່ໃຫ້ໄປຫຍຸ້ງກ່ຽວກັບເມຍຂອງຄົນອື່ນ ແລະຈາກບັນດາຜູ້ຍິງທີ່ປາກຫວານໃຈສົ້ມ.

6ວັນໜຶ່ງ ຂ້າພະເຈົ້າໄດ້ຫລຽວອອກໄປທາງປ່ອງຢ້ຽມເຮືອນຂອງເຮົາ

7ແລະຂ້າພະເຈົ້າໄດ້ເຫັນຊາຍໜຸ່ມຫລາຍຄົນທີ່ຍັງອ່ອນຕໍ່ໂລກຍ່າງໄປມາ, ແຕ່ໃນບັນດາຄົນເຫຼົ່ານັ້ນ ຂ້າພະເຈົ້າໄດ້ສັງເກດເຫັນຊາຍຄົນໜຶ່ງທີ່ໂງ່ຈ້າເບົາປັນຍາຜິດທຳມະດາ.

8ລາວຍ່າງໄປຕາມຖະໜົນເຖິງແຈທາງບ່ອນຍິງຄົນໜຶ່ງອາໄສຢູ່ ລາວຍ່າງຊື່ໄປທີ່ເຮືອນຂອງນາງ

9ໃນເວລາມືດຄຶ້ມຂອງຕອນແລງມື້ໜຶ່ງ.

10ແລ້ວນາງກໍອອກມາພົບຊາຍຄົນນີ້ໂດຍແຕ່ງຕົວດັ່ງຍິງແມ່ຈ້າງວາງອຸບາຍຫລອກລໍ້ຄົນ.

11ນາງເປັນແມ່ເລງທີ່ບໍ່ມີຢາງອາຍ ແລະມັກຍ່າງໄປຕາມຖະໜົນຫົນທາງເລື້ອຍໆ.

12ນາງມັກຢືນຄອຍຖ້າຢູ່ຕາມແຈທາງ ບາງເທື່ອກໍຢູ່ກາງຖະໜົນ ບາງເທື່ອກໍຢູ່ຕາມທ້ອງຕະຫລາດ.

13ນາງໂດດກອດຊາຍໜຸ່ມທັງຈູບລາວ ແລະໃຊ້ແສງຕາຈ້ອງເບິ່ງໜ້າລາວພ້ອມທັງເວົ້າວ່າ,

14“ມື້ນີ້ຂ້ອຍໄດ້ນຳເຄື່ອງໄປຖວາຍບູຊາ ແລະກໍໄດ້ຊີ້ນມາຈາກເຄື່ອງບູຊານັ້ນ.

15ດັ່ງນັ້ນ ຂ້ອຍຈຶ່ງອອກມາຄອຍຖ້າເຈົ້າ ຂ້ອຍຕ້ອງການພົບເຈົ້າ ແລະເຈົ້າກໍຢູ່ທີ່ນີ້ແລ້ວເດ

16ຂ້ອຍໄດ້ປູບ່ອນນອນຂອງຂ້ອຍໄວ້ດ້ວຍຜ້າປ່ານຫລາຍສີຈາກເອຢິບ.

17ຂ້ອຍພົມຜ້າປູບ່ອນດ້ວຍນໍ້າຫອມຈາກຢາງໄມ້, ນໍ້າຫອມອາໂລ ແລະກຳຍານຫອມ.

18ມາເທາະ ໃຫ້ພວກເຮົາມາອີ່ມເອີບຄວາມຮັກນຳກັນຕະຫລອດຄືນ. ພວກເຮົາຈະມີຄວາມສຸກຢູ່ໃນອ້ອມກອດຂອງກັນແລະກັນ.

19ຜົວຂອງຂ້ອຍບໍ່ຢູ່ເຮືອນເພາະລາວເດີນທາງໄກ.

20ລາວໄດ້ຖືເງິນໄປນຳເປັນຈຳນວນຫລວງຫລາຍ ແລະຈະກັບມາພາຍໃນສອງອາທິດ.”

21ນາງຫລອກລໍ້ຊາຍຄົນນີ້ໃຫ້ຫລົງສະເໜ່ ດ້ວຍຄຳເວົ້າຈາອັນອ່ອນຫວານຂອງນາງ.

22ທັນໃດນັ້ນ ລາວກໍຕິດຕາມນາງໄປດັ່ງງົວເຖິກທີ່ຖືກຈູງໄປຂ້າ ດັ່ງກວາງທີ່ຖືກຕ້ອນລົງໄປໃນຫລຸມ

23ບ່ອນທີ່ລູກທະນູຈະແທງທະລຸຫົວໃຈ. ຊາຍຄົນນີ້ເປັນດັ່ງນົກກຳລັງເຂົ້າໄປໃນຕະຂ່າຍ ໂດຍບໍ່ຮູ້ວ່າຊີວິດຕົນນັ້ນຕົກຢູ່ໃນອັນຕະລາຍ.

24ພວກລູກໆເອີຍ ບັດນີ້ຈົ່ງຟັງພໍ່ເທີ້ນ ຈົ່ງເອົາໃຈໃສ່ຕໍ່ຄຳທີ່ພໍ່ບອກສອນ.

25ຢ່າໃຫ້ແມ່ຍິງເຊັ່ນນັ້ນຊະນະໃຈເຈົ້າໄດ້ ຢ່າຫລົງໄຫລໄປກັບນາງ.

26ນາງໄດ້ເຮັດໃຫ້ຜູ້ຊາຍຫລາຍຄົນຈິບຫາຍ ແລະຍັງເປັນຕົ້ນເຫດໃຫ້ຫລາຍຄົນຕາຍໄປຈົນນັບບໍ່ຖ້ວນ.

27ຖ້າພວກເຈົ້າໄປທີ່ເຮືອນຂອງນາງ ກໍສໍ່າກັບວ່າໄປສູ່ໂລກຂອງຄົນຕາຍເສຍແລ້ວ ຄືໄປສູ່ຄວາມຕາຍທາງລັດ.

← Chapter 6 Jump to: Chapter 8 →